رەسەيلىك Regnum.ru باسىلىمى كيريلل ءيستوميننىڭ قازاقستانداعى لاتىندانۋ پروسەسىنە وراي ءوز پايىمىن جاريالادى. ءيستوميننىڭ ايتۋىنشا، قازاقستان پرەزيدەنتى نۇرسۇلتان نازاربايەۆتىڭ لاتىن ءالىپبيىنىڭ جاڭا نۇسقاسىن بەكىتۋ تۋرالى جارلىققا قول قويۋى رەسەيدە تۇراتىن قازاقتار ءۇشىن جاعىمسىز جاڭالىق بولىپ وتىر.

«ولار ءۇنسىز وتىر، سەبەبى وتاندارىنا ساتقىندىق جاساعىسى كەلمەيدى»، - دەپ جازدى ساراپشى ءوز ماقالاسىندا. ونىڭ ايتۋىنشا، مۇنداي پروسەسس رەسەيدەگى قازاقتاردىڭ جاعدايىن قيىنداتادى.

ونداي جاعدايلارعا بىرنەشە مىسال كەلتىرىپ ءوتتى.

«بىرىنشىدەن، قازاقتار ءۇشىن ىڭعايسىزدىق جاعداي تۋادى. ساياساتكەرلەر لاتىنعا كوشۋ ءۇردىسىن انتيرەسەيلىك ساياساتقا قاتىسى جوق دەگەنىمەن، بۇعان سەنۋ قيىن. قازاقستاننىڭ ۇلتشىل كۇشتەرى وسىنداي ءادىس ارقىلى كەڭەستىك داۋىرمەن قوش ايتىسىپ، «رەسەي يمپەرياليزمىنىڭ» تاعى ءبىر بەتىن جابادى.

بۇل قوشتاسۋ انتيرەسەيلىك ساياسات اياسىندا جۇزەگە اسپاق. ارينە، عىلىمي تۇرعىدان العاندا سلاۆياندار مەن تۇركىلەردىڭ تىلدەرىندەگى ايىرماشىلىق بارىمىزگە ايان. تۇركى فونەتيكاسىن لاتىن ءالىپبيى ارقىلى جەتكىزۋ الدەقايدا وڭاي. الايدا مۇندا ءبىر ساياساتتىڭ جاتقانىن ەسكەرۋ قاجەت، ول – ءالىپبي رەفورماسى اياسىنداعى ساياسي سيپات».

سونداي-اق رەسەيدە تۇرىپ جاتقان قازاقتاردىڭ سانىن دا كورسەتىپ وتكەن. «2010 جىلعى ساناق بويىنشا 647 مىڭ ادام، ال بۇكىل الەم بويىنشا قازاقتاردىڭ سانى 15 ميلليونعا جەتەدى. قازاقستاندا 11،7 ميلليون قازاق بار. ءسىبىر اۋدانىندا دا قازاقتاردىڭ ۇلكەن دياسپوراسى بار. ومسك وبلىسىندا 78 مىڭ قازاق بولسا، التاي رەسپۋبليكاسىندا 12 مىڭ، نوۆوسيبيرسك وبلىسىندا 8-11 مىڭ قازاق تۇرادى. قازاقستاننىڭ تاريحى اركىمگە ءمالىم، اركىم ءۇشىن باعالى. قازاق ءتىلىن دە بىلەدى، مادەنيەتى دە تاڭسىق ەمەس. ال قازاق ءتىلىنىڭ لاتىنعا كوشۋى ولاردىڭ جاعدايدىڭ قيىنداتۋى مۇمكىن».

ءيستوميننىڭ پايىمىنشا، رەسەيلىك قازاقتار اراسىندا ساۋاتتىلىق تومەندەپ، شاتاسۋلار ورىن الادى.

ايتا كەتەيىك، قازاقستاندا لاتىن گرافيكاسىنا نەگىزدەلگەن جاڭا قازاق ءالىپبيى بەكىتىلدى. 26 قازاندا مەملەكەت باسشىسى نۇرسۇلتان نازاربايەۆ ءتيىستى جارلىققا قول قويعان. قازاقستانداعى رەسەيدىڭ توتەنشە جانە وكىلەتتى ەلشىسى ميحايل بوچارنيكوۆ قازاقستاننىڭ لاتىنعا كوشۋى تۋراسىندا ءوز پىكىرىن ءبىلدىردى. ەلشىنىڭ ايتۋىنشا، رەسەي ەگەمەن قازاقستاننىڭ مەملەكەتتىك ءتىلىن لاتىن الىپبيىنە كوشىرۋىنە تۇسىنىستىكپەن ءارى قۇرمەتپەن قارايدى.