ش.ايمانوۆ اتىنداعى «قازاقفيلم» كينوستۋدياسىندا «ەلباسى جولى» كينوەپوپەياسى «بەيبىتشىلىك كىندىگى» اتتى كينوكارتيناسىنىڭ قويىلىمدىق قورعالىمى ءوتتى. قورعالىم بارىسىندا ءفيلمنىڭ رەجيسسەرى اقان ساتايەۆ كينوستۋديانىڭ ەكسپەرتتىك كەڭەسىنە دايىندىق كەزەڭىندە اتقارىلعان جۇمىستار تۋرالى ايتىپ، ءتۇسىرىلىم توبىن تانىستىرا وتىرىپ، توپتىڭ تۇسىرىلىمگە دايىن ەكەنىن جەتكىزدى، دەپ حابارلايدى Qamshy.kz اقپارات اگەنتتىگى "قازاقفيلم" كينوستۋدياسىنىڭ باسپا ءسوز قىزمتەىنە سىلتەمە جاساپ.

«بەيبىتشىلىك كىندىگى» ءفيلمى اقمولانىڭ قاراپايىم قالادان جاس وردا – استاناعا اينالۋى مەن كۇنى بۇگىنگە دەيىنگى كەزەڭى تۋرالى باياندايدى. كارتينادا 1994 جىلى استانانىڭ اقمولاعا اۋىسىپ، استانانىڭ قىسقا مەرزىم ىشىندە كۇن ساناپ دامىپ كەلە جاتقانىن جانە ۇزدىك الەم استانالارى قاتارىنا ەنگەنىن كورسەتەدى. 

- ءبىزدىڭ ءفيلمىمىز ساياسات پەن ساياساتكەرلەر تۋرالى. سول سەبەپتەن دە ءبىز پكق، پرەزيدەنت حاتتاماسىنان، كەڭسەسىنەن كەڭەستەر الىپ جاتىرمىز. استانانىڭ تۇرعىزىلۋ كەزىندە ءتۇرلى قيىندىقتار ورىن العانى جانە پرەزيدەنت پەن ونىڭ اينالاسىنداعىلاردىڭ ولاردى قالاي ەڭسەرگەندەرى تۋرالى كوپ اقپارات الدىق. فيلمدەگى نەگىزگى دراماتۋرگيالىق قاقتىعىس تا وسى جايىندا بولماق. بىزگە الماتى مەن استانانىڭ بارلىق مەكەمەلەرى قول ۇشىن سوزۋدا. سول سەبەپتەن دە فيلم وتە شىنايى شىعادى دەپ بىلەمىز. ەڭ باستىسى جاقسى فيلم جاسايمىز دەگەن سەنىمىمىز بار. ونىڭ ۇستىنە، «قازاقفيلم» كينوستۋدياسى كامەرالارعا ارنالعان زاماناۋي وبەكتيۆتەرىن ساتىپ الدى. ەندى تۇسىرىلگەن ماتەريالدىڭ ساپاسى جوعارى بولادى، - دەدى رەجيسسەر.


قورعالىم كەزىندە ءتۇسىرىلىم توبى فيلمدە قولدانىلاتىن بارلىق زاتتار مەن كوستيۋمدەردى اكەپ، كورمە ۇيىمداستىردى. ەكسپەرتتىك كەڭەس الدىندا ءفيلمنىڭ اتقارۋشى پروديۋسەرى ءاليا مەڭدىعوجينا مەن كاستينگ-ديرەكتور جاينا ابدييەۆا ءسوز الىپ، ءتۇسىرىلىم الاڭدارى جانە اكتەرلەرمەن جۇمىس جاسالۋ بارىسىن ايتىپ بەردى. 

- تۇسىرىلىمدەر الماتى مەن استانادا وتەدى. ءبىرىنشى ءتۇسىرىلىم بلوگى جەلتوقسان ايىندا الماتىدا بولادى. سوسىن قاڭتار ايىندا استانادا تۇسىرەمىز. ول جاقتان قايتقان سوڭ، قايتادان الماتىدا جالعاستىرامىز. سونداي-اق، جازعى مەزگىلىندە تۇسىرەتىن ەپيزودتارىمىز دا بار. فيلمگە شەتەلدىك گريم جونىندەگى سۋرەتشىنى شاقىرتتىق، ول كينو سالاسىندا كوپتەگەن جۇلدەلەردىڭ يەگەرى – مارك كۋلەر، - دەدى ءاليا مەڭدىعوجينا.

- ءبىز ءقازىر اكتەرلەردىڭ پلاستيكاسى جانە سويلەۋ مانەرىمەن تىعىز جۇمىس ىستەپ جاتىرمىز، ويتكەنى ولاردىڭ سومدايتىن كەيىپكەرلەرى ومىردە بار كىسىلەر. ءبىز كوپتەگەن مۇراعاتتىق ماتەريالداردى اكتەرلەرگە كورسەتىپ جاتىرمىز، بۇل اكتەردىڭ ءوز رولىنە ەنۋىنە ىقپال ەتەدى، - دەدى كاستينگ-ديرەكتور جاينا ابدييەۆا.

دايىندىق كەزەڭى بارىسىندا ءفيلمنىڭ باستى جانە ەكىنشى پلانداعى اكتەرلەرى بەكىتىلگەن. ەكراندا ن.ءا.نازاربايەۆتى تەاتر جانە كينو اكتەرى مۇرات احمانوۆ سومدايدى. سونىمەن قاتار، فيلمدە ەركەبۇلان دايىروۆ، جان بايجانبايەۆ جانە كوپتەگەن كينو مايتالماندارى بوي كورسەتەدى. 

- باستى رولگە اكتەر ىزدەگەندە ءبىز ءۇشىن پورترەتتىك ۇقساستىعىنان گورى، ونىڭ اكتەرلىك شەبەرلىگى ماڭىزدىراق بولدى. فيلمدە 14 اۋىر گريم بولادى، ونى مارك كۋلەر جاسايدى. سونىڭ كومەگىمەن اكتەردىڭ ەلباسىمەن پورترەتتىك ۇقساستىعىن كەلتىرەمىز. ال ەكىنشى پلانداعى اكتەرلەردى نەگىزەنەن تۇر-الپەتى پروتوتيپكە ۇقسايتىندارىن تاڭدادىق، - دەپ قوستى ا.ساتايەۆ.  


سونداي-اق، قورعالىم كەزىندە اقان ساتايەۆ دەرەكتى ساحنالار بولاتىنىن ايتىپ ءوتتى:
- ءبىز ەلباسىنىڭ جانە كونستيتۋسيالىق بەستىكتىڭ قاتىسۋىمەن اقوردادا تۇسىرىلىمدەر جاسادىق. بۇل استانانىڭ 20 جىلدىعىن اتاپ ءوتۋ تۋرالى جينالىس ساحناسى. 

جوبا قورعالىمىندا ەكسپەرتتىك كەڭەس مۇشەلەرى – تانىمال كينەماتوگرافيستەر جانە كينوستۋديا پرەزيدەنتى باقىت قايىربەكوۆ بولدى. كينوستۋديا باسشىسى شىعارماشىلىق توپقا ساتتىلىك تىلەي وتىرىپ، ءوز ويىن ايتتى. 
- «شىعارماشىلىق توپ پەن سەنىڭ بويىڭدا ءفيلمدى جاساۋعا دەگەن سەنىمىڭ مول بولعانى قۇبا-قۇپ. ءالى ەسىمدە، 1997 جىلى قاتتى اياز بولعان، ودان كەيىن ونداي اياز بولمادى-اۋ دەيمىن. مەنىڭشە، سول ءبىزدىڭ بارىمىزگە جاراتقاننىڭ جىبەرگەن سىناعى دەپ ويلايمىن جانە سول قيىن بەلەستى ءبىز ءبارىمىز دە ەڭسەرە بىلدىك»، - دەدى باقىت قايىربەكوۆ. 

•    ءفيلمنىڭ قويۋشى-وپەراتورى قازاق جانە قىرعىز كينوسىنىڭ مەترى – حاسانبەك قىدىرالييەۆ («كوشپەندىلەر»، «موڭعول»، «اناعا اپارار جول» «باۋىرجان مومىش ۇلى» جانە باسقالار). 
•    كوركەمدىك بولىگىنە جاۋاپتى قويۋشسۋرەتشى نازيرا بايبەكوۆا («قارا شاڭىراق»، «باۋىرجان مومىش ۇلى»، «بريگادا»، «اناعا اپارار جول»، «رايونى» جانە باسقالار). 
•    سونداي-اق، بريتاندىق سۋرەتشى-ۆيزاجيست جانە پروتەز ماكياجى بويىنشا ساراپشى – مارك كۋلەر شاقىرىلعان. ول «گراند بۋداپەشت وتەلى» فيلمىنە جاساعان ۇزدىك ماكياج ءۇشىن «وسكار» جۇلدەسىن جانە «تەمىر لەدي» فيلمىنە جاساعان ۇزدىك ماكياج بەن شاش ۇلگىسى ءۇشىن 87ء-شى بريتان كينو اكادەميسىنىڭ BAFTA سىيلىعىن يەمدەنگەن. 

«ەلباسى جولى. بەيبىتشىلىك كىندىگىندە» ءفيلمىنىڭ شىعارماشىلىق توبى تۇسىرىلىمگە اعىمداعى جىلدىڭ سوڭىنا قاراي شىعادى. ال فيلم قالىڭ كورەرمەندەرگە  2018 جىلدىڭ جەلتوقسان ايىندا جول تارتادى دەپ جوسپارلانۋدا. ءفيلمدى ق ر مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» كينوستۋدياسى مەن «ساتايفيلم» كينوكومپانياسى تۇسىرەدى. 


ءوندىرىسى: ش.ايمانوۆ اتىنداعى «قازاقفيلم» اق، «ساتايفيلم» كينوكومپانياسىنىڭ قاتىسۋىمەن
سەناريي اۆتورلارى: ادىلبەك جاقسىبەكوۆ، تيمۋر جاقسىلىقوۆ 
رەداكتورى: ايدار ەسپەنبەتوۆ
قويۋشى-رەجيسسەرى: اقان ساتايەۆ
قويۋشى-وپەراتورى: حاسانبەك قىدىرالييەۆ
قويۋشى-سۋرەتشى: نازيرا بايبەكوۆا
كوستيۋم جونىندەگى سۋرەتشى: ءاليا ءىسماعۇلوۆا
گريم جونىندەگى سۋرەتشى: ءاليا شمانوۆا
گريم جونىندەگى شاقىرىلعان سۋرەتشى: مارك كۋلەر
كاستينگ-ديرەكتورى: جاينا ابدييەۆا
اتقارۋشى پروديۋسەر: ءاليا مەڭدىعوجينا
ءفيلمنىڭ پروديۋسەرى: اقان ساتايەۆ

اننوتاسياسى: فيلم 1994 جىلدىڭ شىلدە ايىندا نۇرسۇلتان ءابىش ۇلى نازاربايەۆتىڭ پلەنارلىق وتىرىستا استانانىڭ الماتىدان اقمولاعا اۋىستىرىلاتىنى تۋرالى جاريا ەتكەنىمەن باستالادى. ءفيلمنىڭ سوڭى 1998 جىلدىڭ 10 شىلدەسى كۇنى قالا كۇنىن تويلاۋمەن اياقتالادى. پرەزيدەنتتىڭ دىتتەگەن جوسپارى بويىنشا جاڭا استانا تاۋەلسىز قازاقستان مەملەكەتىنىڭ نىشانى بولۋى ءتيىستى. پرەزيدەنت الدىندا ورىندالۋى مۇمكىن ەمەس ماسەلە – قىسقا مەرزىم ىشىندە اسقارالى الاتاۋدان، سارىارقانىڭ كەڭ دالاسىنا استانانى اۋىستىرۋ تۇرادى. 

انىقتامالىق اقپارات: مۇرات نويانباي ۇلى احمانوۆ 1959 جىلى 1 ماۋسىمدا الماتى وبلىسى ۇزىنبۇلاق اۋىلىندا دۇنيەگە كەلگەن. 1984 جىلى الماتى تەاتر-كوركەمسۋرەت ينستيتۋتىن (قازىرگى قازاق ۇلتتىق ونەر اكادەمياسى) اكتەرلىك، 1998 جىلى رەجيسسەرلىك ءبولىمىن بىتىرگەن. اكتەر، قازاقستاننىڭ ەڭبەك سىڭىرگەن ءارتيسى (1998). “قۇرمەت” وردەنىنىڭ يەگەرى (2012). رەسپۋبليكالىق فەستيۆالدەردىڭ 4 دۇركىن باس جۇلدەلەردىڭ يەگەرى.

1976 جىلى قازاق ءان-بي انسامبىلىندە ءبيشى. 1984-1993 جىلدارى -تالدىقورعان وبلىسى دراما تەاترىندا اكتەر، قويۋشى-رەجيسسەر قىزمەتىن اتقارعان. 1999-2001 جىلدارى جەزقازعان مۋزىكالىق دراما تەاترىنىڭ باس رەجيسسەرى. 2001-2005 جىلدارى باتىس قازاقستان وبلىسى دراما تەاترىنىڭ باس رەجيسسەرى. 2005 جىلدان الماتى وبلىسى دراما تەاترىنىڭ ديرەكتورى – كوركەمدىك جەتەكشىسى. قازىرگى تاڭدا ع. مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا ەڭبەك ەتەدى.

م.احمانوۆ 30-عا تارتا رولدە ويناپ، 20-دان استام سپەكتاكلدى ساحنالادى. ول قويعان س.اسىلبەكوۆتىڭ «ءبىر تۇنگى وقيعا» سپەكتاكلى – VI رەسپۋبليكالىق، ءا.تاجىبايەۆتىڭ «التىن كۇمبەز» تاريحي دراماسى X رەسپۋبيلكالىق فەستيۆالدە باس جۇلدە الدى.