25 جەلتوقسان كۇنى وڭتۇستىك قازاقستان وبلىسىنىڭ اۋماعىندا ان-72 ۇشاعىنىڭ اپاتقا ۇشىراپ، 27 ازاماتتىڭ قازا تابۋىنا بايلانىستى وڭتۇستىك قازاقستان وبلىسىندا كەز-كەلگەن سيپاتتاعى مەرەكەلىك شارالاردى وتكىزۋگە تىيىم سالىندى. 

وبلىس اكىمى اسقار مىرزاحمەتوۆتىڭ تاپسىرماسىمەن وبلىستاعى بارلىق مەملەكەتتىك مەكەمەلەردە، ۇيىمداردا كەز-كەلگەن سيپاتتاعى مەرەكەلىك شارالار وتكىزىلمەيتىن بولدى. اكىم قايعىلى وقيعاعا بايلانىستى جاڭا جىلعا قاتىستى وتكىزىلەتىن كەز-كەلگەن ءىس-شارانى تويلاماۋدى تاپسىردى. «بۇل تاپسىرما تىكەلەي مەملەكەتتىك مەكەمەلەر مەن ۇيىمدارعا قاتىستى بولعانىمەن، جەكەمەنشىك مەكەمەلەردىڭ دە مۇنداي شارالاردان باس تارتقانى ابزال. «قايعىنى ەر كوتەرەدى، قازانى ەل كوتەرەدى» دەيدى قازاق حالقى. ەل تىنىشتىعىن كۇزەتىپ جۇرگەن ازاماتتاردىڭ مەرت بولۋى بارشامىزدىڭ ورتاق قايعىمىز. سوندىقتان، ازاماتتار اكىمنىڭ بۇل شەشىمىنە تۇسىنىستىكپەن قارايتىن بولار دەگەن ۇمىتتەمىز» دەدى وبلىس اكىمى اپپاراتى باسشىسىنىڭ ءورىنباسارى-باسپاسوز حاتشىسى بەرىك ءۋالي.

بىزدىڭشە، بۇل باستاما بۇكىل ەل كولەمىندە قولعا الىنۋعا ءتيىس. ويتكەنى جاقىن كۇندە «ابىلايدىڭ اسى» دەيتىندەي سونشالىقتى كۇيىپ تۇرعان ءدۇبىرلى دۇنيە جوق. سوندىقتان قازاق ەلىنىڭ 27 ازاماتىنىڭ قايعىسىن جۇرت بولىپ كوتەرەلىك. مارقۇمداردىڭ جاتقان جەرى ءجانناتتا، توپىراعى تورقا بولسىن!