ءامىرجان قوسانوۆتىڭ ەكس-بانكير جايىنداعى پىكىرى قانداي؟

ەلىمىزدىڭ بەلدى ساياساتكەرلەرى مۇحتار ءابيازوۆتىڭ حالىقتى كوشەگە شىعىپ، كوتەرىلۋگە شاقىرىپ جاتقان جاتقان ۇندەۋلەرىنە قاتىستى پىكىرلەرىن ءبىلدىرىپ جاتىر. سولاردىڭ ءبىرى ءامىرجان قوسانوۆ جاقىندا عانا «جاس الاش» گازەتىنە بەرگەن سۇحباتىندا ەكس-بانكيردىڭ وسى كۇنگە دەيىن جاساعان ارەكەتتەرىنە باعا بەردى. ساياساتكەر جۇزەگە اسۋ مۇمكىنشىلىگى جوق جالعان ۋادەلەرمەن كوپشىلىكتى الداپ كەلە جاتقان ءابليازوۆتىڭ ساياساتقا كەلۋىنەن باستاپ، بۇگىنگى ۇگىت-ناسيحات جۇمىستارىنا دەيىن توقتالعان.

اۆتور 2001 جىلدارى ەكس-شەنەۋنىكتىڭ ءوز ارىپتەستەرىمەن دۆك-نى قۇرعاندا اشىق تۇردە قولداعانىن جاسىرمادى. ءتىپتى، سوتتى بولىپ، ۇستىنەن ءىس قارالىپ جاتقاندا اقش-تان ادۆوكات الىپ كەلىپ، قورعاشتاعان ەكەن. بتا بانكتى باسقارىپ، ارتىنشا ەلدەن كەتىپ، وپپوزيسيونەر بولعاندا ەسكى وپپوزيسيا وكىلى رەتىندە ىسىنە وڭ باعا بەرگەن. بۇل تۋرالى اۆتور ءوز سوزىندە: «وپپوزيسيا قاتارىندا جۇرگەن كەز كەلگەن ادام قۇرمەتكە لايىق» دەپ اتاپ ءوتتى.

دەگەنمەن ءامىرجان قوسانوۆ فرانسۋز تۇرمەسىنەن شىققان اتىشۋلى ءابليازوۆتىڭ ارەكەتتەرىن اقتاپ الۋعا بولمايتىنىن ايتادى. اۆتور: «ءبىراق فرانسۋز تۇرمەسىنەن شىققان سوڭ ءابليازوۆ ەكى ورەسكەل قاتەلىك جاسادى.

بىرىنشىدەن، ول پاريجدە وتىرىپ، ەل ىشىندە وپپوزيسيالىق ءومىردىڭ سۋىعىنا توڭىپ، ىستىعىنا كۇيىپ كەلە جاتقان، رەجيمنىڭ بار وكتەمدىگى مەن تەپەرىشىنە شىداپ، باسقا ەلگە قاشىپ كەتپەگەن ءبىراز ادامدى تالاعى تارس ايىرىلىپ، قارالاي باستادى. مەنىڭشە، بىرىككىسى كەلەتىن ساياساتكەر ولاي جاسامايدى.

ەكىنشىدەن، وزىنە قاتىستى وتكەن سوت پروسەسىندە وزىنە تاعىلعان بارلىق ايىپقا ءار بابى بويىنشا جاۋاپ بەرۋى كەرەك دەگەن ۇسىنىسىما ول جاۋاپ قاتپادى» دەيدى. ساياساتكەردىڭ ءسوزىنىڭ جانى بار، ەكس-بانكير ساياساتتا جۇرگەندە دە، بيزنەسپەن اينالىسقان دا ەلىمىزدىڭ ساياساتكەرلەرىمەن، وليگارحتارىمەن قويان-قولتىق ارالاستى. ولاردىڭ قىر-سىرىنان دا ازدى-كوپتى حابارى بار. دەگەنمەن ءابليازوۆتىڭ سوڭعى جازبالارى بۇرىنعى ارىپتەستەرىن دە، ەلدەگى بەلدى ساياساتكەرلەردى دە قارالاۋعا باعىتتالعان. اۆتور مۇنى ساياسي پوزيسيادان گورى جەكە باسىنىڭ كەكشىلدىگىنە ۇقساتادى. سونىمەن قاتار ەكس-شەنەۋنىكتىڭ ميللياردتاعان قارجىنى شەتەلگە الىپ كەتپەسە، ءاربىر باب بويىنشا اقتالۋعا مۇمكىندىگىنىڭ بولعاندىعىن العا تارتادى. نە ءۇشىن مۇنداي جولى تاڭداعانى بىزگە دە بەيمالىم.

ءامىرجان قوسانوۆ مۇحتار ءابليازوۆتىڭ ەل بيلىگىن جامانداپ، دۆك-نى قۇرىپ، ۇرانداتىپ وتىرعانىن بىلاي تۇسىندىرەدى: «قۇددى ءبىر ءوز تاعدىرىن شەشەتىن باتىس سوتتارىنا «قازاقستانداعى جالعىز وپپوزيسيونەر – مەن عانامىن!» دەپ سيگنال بەرىپ جاتقان سياقتى. مەنىڭ ويىم باسقاشا: ەگەر دە ورتاق – دەموكراتيا مەن ادىلەتتىك جولىندا كۇرەس – ماقسات بولسا، وندا ءوز ارىپتەستەرىنە كۇيە جاقپاي، كەرىسىنشە، جاقسىلىعىن اسىرىپ، بىر-بىرىمىزگە جاقىنداي ءتۇسۋىمىز كەرەك. ءابليازوۆتان ونداي وڭ نيەت كورگەن جوقپىن.

ءوزىنىڭ وسى كوزقاراسى ارقىلى ول 20 جىلدان استام بيلىككە قارسى شىعىپ، باسىن نارتاۋەكەلگە تىگىپ، حالىقتىڭ ءسوزىن سويلەپ جۇرگەن بارشا قاۋىمنىڭ ەڭبەگىن جوققا شىعارىپ جاتىر دەپ ويلايمىن». اتىشۋلى ەكس-بانكيردىڭ ءاربىر تىكەلەي ەفيرى ەل بيلىگى مەن ساياساتكەرلەرىن جامانداۋدان تۇرادى. سوڭعى ۋاقىتتاردا ۇزەڭگىلەس بولعان ارىپتەستەرىنىڭ ەسىمى دە اشكەرەلەۋ مەن قارالاۋعا تولى پوستتاردىڭ تاقىرىبىنا ارقاۋ بولىپ كەلەدى. وسى كۇنگە دەيىن قاراپايىم حالىق اراسىندا تالقىلاۋ ءجۇرىپ جاتقان ايگىلى ءابليازوۆتىڭ ارەكەتتەرىنە ساياسي تۇرعىدا بەرىلگەن باعانى وقىعىڭىز كەلسە، ماقالانى دا قوسا جىبەرىپ وتىرمىز.

جانات ءبايدىلدا