ءىنىڭىز، ۇلىڭىز، ءقارىنداس-سىڭلىڭىز بولاشاقتا بەدەلدى، ابىرويلى ءھام سىيلى بولعانىن قالاساڭىز، جاقسىلاپ وقىڭىز.

ءبىرىنشى: تاربيە ۇيدەن باستالادى. سوندىقتان ۇيدە جاقسى ءسوز ايتىپ، كوڭىلدى سويلەسىڭىز. شىلىم مەن الكوگولدىڭ زيانى تۋرالى كۇنىنە 1 مەزگىل قۇلاعىنا قۇيىپ وتىرىڭىز. 

ەكىنشى: بالاڭىزدىڭ بولمەسىن كومپيۋتەر، ويىنشىق، ت. ب. قاجەتسىز گادجەتتەرگە تولتىرماي، قابىرعاعا الەم كارتاسىن ءىلىپ، سورەلەردى كىتاپتارعا تولتىرىڭىز. الەم كارتاسى − تۇنىپ تۇرعان ەنسيكلوپەديا! قاراعان سايىن بالانىڭ الەم تانۋعا قىزىعۋشىلىعى ارتا تۇسەدى. ول قىزىعۋشىلىعى كىتاپ وقۋعا يتەرمەلەيدى. ال كىتاپ − سارقىلماس بايلىق! 

ءۇشىنشى: اقشانى كەرەكسىز جۇمساق ويىنشىقتارعا شاشقانشا الاش كوسەمدەرىنىڭ، ۇلت ماقتانىشتارىنىڭ پورترەتىن جاساتىپ، قابىرعاعا ءىلىڭىز نەمەسە شاعىن البوم، بۋكلەتتەر جاساپ بەرىڭىز. ول كىسىلەردىڭ كىم ەكەنىن، ەل ءۇشىن نە ىستەگەنىن، قانشا تەر توككەنىن ايتۋدان جالىقپاڭىز. بۇل ونىڭ الداعى ۋاقىتتا كىمگە قاراپ بوي تۇزەپ، قانداي تۇلعا بولىپ قالىپتاساتىنىنا كومەكتەسەدى. جاستايىنان "بەتمەن"، "سۋپەرمەن"، "ورمەكشى ادام"، "حالكتاردى" كورىپ، سولارعا ەلىكتەگەننەن الدەقايدا جاقسى عوي، سولاي ما؟ 

ءتورتىنشى: ءوزىڭىزدى "سۋپەر ساياساتكەر" ساناپ، بالانىڭ الدىندا كوسىلىپ، پوليسيانى، دارىگەردى، ۇكىمەتتى، ۇستازدى قارالاپ، جەردەن الىپ، جەرگە سالىپ وتىرۋدى دوعارىڭىز! قايتالايمىن، دوعارىڭىز! بالا جاستايىنان مۇندايدى تىڭداسا، قوعامعا قارسى كوزقاراسپەن وسەدى. 

بەسىنشى: بالاڭىز ويىنحانا، تۇنگى كلۋب سوڭىندا كەتپەسىن دەسەڭىز، مەگاسەنتر، ساۋدا ۇيلەرى، كافە-رەستوراندارعا اپاراعانشا مەشىت، كىتاپحانا، مۇراجاي، كەسەنە، مادەني ورتالىقتارعا اپارىپ ۇيرەتىڭىز. مۇنداي ورتادا وسكەن بالا تۇنگى كلۋبتاردان جيىركەنەتىن بولادى.

التىنشى: "وليمپيادادا نەگە قازاق بالاسى جوق؟" - دەگەن سۇراق تۋىنداماس ءۇشىن سىزدەرگە ءوتىنىش: بالاڭىزدى ۇيىرمەگە بەرىڭىز. كۇيگەن دۇنيە كۇيىپ كەتسىن! مەيلى، جاڭا شۋباعا اقشاڭىز جەتپەي قالسىن، سول اقشاعا بالاڭىزعا قاجەتتى سپورت جابدىقتارىن اپەرىڭىز. ۇيگە تۋرنيك، كىر تاستارىن الدىرىڭىز! الدىرا المايسىز با، ۇيىرمەگە بەرە المادىڭىز با − "ءوي، وسى قازاقتار دوپ تەبە المايدى، ءوي، قازاقتاردان تۇك شىقپايدى"، − دەگەن اڭگىمەنى دوعارىڭىز!

جەتىنشى: ءسالت-داستۇردى ۇيرەتۋگە، يمانىن كۇشەيتۋگە، رۋحىن شىڭداۋعا ۋاقىت ءبولىڭىز! 

سەگىزىنشى: ۇلىڭىز كوشەدە توبەلەسىپ كەلسە، ۇرىسىپ، جەكىرۋدىڭ قاجەتى جوق. ول بالا بولعان سوڭ ءبارىبىر توبەلەسەدى. "وي، بالام، ول سەنەن ۇلكەن عوي، سوندا دا تايسالماعان باتىرىم"، − دەپ رۋحتاندىرىپ، "بىرەۋگە ءوزىڭ تيىسپە، تيىسسە، نامىسىڭدى بەرمە"، − دەپ ايتىڭىز! بۇل، مەنىڭشە، ىنجىق، رۋحى ءالسىز قازاق جىگىتتەرىنىڭ سانىن ازايتادى. رۋحتى جىگىتتەر كوبەيسە، ەشقانداي ۇلت توبەمىزگە شىقپاس ەدى...

اتى شىقپاعان قىزىمىز بەن اتىشۋلى باتىر ۇرپاعىمىز كوبەيسىن!
سانالى، ساليقالى ۇرپاق − اتا-انا ءۇشىن ەكى دۇنيەنىڭ دە باقىتى!

ماقسات الييەۆ