تالدىقورعانداعى مەكتەپتەردىڭ بىرىندە پيلوتتىق رەجيمدە «كاسىپكەرلىك جانە بيزنەس نەگىزدەرى» ەنگىزىلدى، دەپ جازادى Qamshy.kz اقپارات اگەنتتىگى.
تالدىقورعان قالاسىنىڭ شوقان ءۋاليحانوۆ اتىنداعى №10 مەكتەپ-گيمنازياسىندا تاجىريبە جۇزىندە «كاسىپكەرلىك جانە بيزنەس نەگىزدەرى» اتتى جاڭا ءپان وقىتىلۋدا. ساباقتار اپتاسىنا ءبىر رەت 10 سىنىپ وقۋشىلارى ءۇشىن جۇرگىزىلەدى. ءپاندى ەنگىزۋدەگى باستى ماقسات - مەكتەپ وقۋشىلارىنا كاسىبي باعدار بەرۋ، كاسىپكەرلىك قىزمەتتى جۇرگىزۋگە داعدىلاندىرۋ.
«ءپان پيلوتتىق رەجيمدە وقىتىلىپ جاتىر. ونىڭ قورىتىندىسى بويىنشا الداعى ۋاقىتتا ءوڭىرىمىزدىڭ بارلىق مەكتەپتەرىندە ەنگىزۋ جوسپارلانعان. وقۋشىلارعا ءبىلىم بەرۋ پروسەسىنە مۇعالىمدەرمەن قاتار، كاسىپكەرلەر دە قاتىسادى. باعدارلاما بىرنەشە كەزەڭدەرگە بولىنگەن، وقىتۋ بىرتىندەپ وتكىزىلەدى. كۋرس سوڭىنا قاراي مەكتەپ تۇلەكتەرى كاسىپكەرلىك نەگىزدەرى بويىنشا بازالىق بىلىمدەرى قالىپتاسادى»، - دەيدى الماتى وبلىسى كاسىپكەرلەر پالاتاسى ادامي كاپيتالدى دامىتۋ ءبولىمىنىڭ ساراپشىسى ارداك كاچكاروۆا.
ساراپشىنىڭ ايتۋىنشا، تەوريامەن قاتار، تاجىريبەلىك ساباقتار ءتۇرلى كاسىپورىندار نەگىزىندە وتەدى. تابىستى كاسىپكەرلەرمەن كەزدەسۋ، شەبەرلىك سىنىپتارى ۇيىمداستىرىلادى.
كاسىپكەرلىك نەگىزدەرى بويىنشا العاشقى ساباقتاردىڭ بىرىنە وڭىرلىك كاسىپكەرلەر پالاتاسىنىڭ بيزنەس-ترەنەرى الەكساندر كۋزنەسوۆ قاتىستى. ول وقۋشىلاردىڭ قويعان ساۋالدارىنا جاۋاپ بەردى.
«قانداي بيزنەس ءتۇرىن اشسام بولادى جانە اقشانى قايدان الامىن؟» دەگەن سۇراققا بىلاي جاۋاپ بەرگىم كەلەدى. وزگەلەردەن ۇزدىك مەڭگەرگەن، «قولىمنان كەلەدى» دەگەن ىسپەن اينالىسۋ كەرەك جانە كورسەتىلەتىن قىزمەتتىڭ سۇرانىس دەڭگەيىن ءبىلۋ قاجەت. سۇرانىس بار بولعان تۇستا تاۋاردى نەمەسە قىزمەتتى بىلەتىن بولادى، ونى ساتىپ الادى جانە ءىسىڭىز ورگە دومالايدى. كاسىپتى ءوز قارجىڭىزعا باستاعان دۇرىس. ارينە، بۇل قيىن بولعانىمەن، ەڭ ءتيىمدى جول بولىپ سانالادى»، - دەيدى مامان.
جاڭا ءپاننىڭ باعدارلاماسىنا ەكونوميكالىق تەرميندەر، بيزنەس-جوسپاردى ازىرلەۋ، زاڭدى تۇلعانى تىركەۋ، قارجىلىق ەسەپ، بيزنەستى قۇقىقتىق رەتتەۋ سىندى تاقىرىپتار ەنگەن.
الداعى كەزەڭدە ءبىلىم جانە عىلىم مينيسترلىگى سىناما ءپاندى ەلىمىزدەگى بارلىق مەكتەپتەر، كوللەدجدەر مەن جوو-لار باعدارلاماسىنا ەنگىزۋدى جوسپارلاپ وتىر.
پىكىر قالدىرۋ