الماتى اكىمدىگى ناۋرىز مەيرامىنا دايىندىق جۇمىسىن ءالى باستاماعان، دەپ جازادى Qamshy.kz اقپارات اگەنتتىگى.

كۇن مەن ءتۇن تەڭەلىپ، قىس بويى قار قۇرساۋىندا جاتقان بار تىرشىلىك وياناتىن، جەر مەن كوك جاڭاراتىن ۇلىستىڭ ۇلى كۇنىنە بىرەر اي قالدى. الايدا تىرپ ەتكەن قالا باسشىلىعى جوق. ناۋرىزعا دايىندىق بارىسىنا وراي جىبەرگەن ساۋالىمىزعا اكىمدىك: «ناۋرىز مەيرامىنىڭ كونسەپسياسى ازىرلەنۋ ۇستىندە»، – دەگەن جاۋاپ قاتتى.

ال كۇنتىزبە بويىنشا اۋىساتىن جاڭا جىلعا دايىندىق بارىسىن 2017 جىلى قازاندا اكىمدىكتەن سۇراستىرعانىمىزدا وزىمىزگە كەرەكتى جاۋاپتى سول ايدا-اق الدىق. وندا مەرەكەگە دايىندىق تاۋەلسىزدىك كۇنىنەن كەيىن باستالاتىنى، جەرگىلىكتى بيۋدجەتتەن 600 ميلليونداي قارجى بولىنگەنى، قالانى بەزەندىرۋ ءۇشىن قانداي ديزاين ەلەمەنتتەرى قولدانىلاتىنى بۇگە-شۇگەسىنە دەيىن جازىلعان.

جاڭا جىلعا دايىندىقتىڭ بىلتىر شىن مانىسىندە قاشان باستالعانى قالا تۇرعىندارىنا ءمالىم. تاۋەلسىزدىك كۇنى بىلاي تۇرسىن، جەلتوقسان ايى كىرمەي جاتىپ قالا ءتۇرلى-تۇستى جىلتىراقتارعا تۇنىپ تۇردى. دۇكەندەر مەن ءىرى ساۋدا ورتالىقتارىنىڭ ءىشى-سىرتى بەزەندىرىلىپ، شىرشالار ورناتىلدى. جاڭاجىلدىق كوڭىل كۇيدى كۇزدىڭ قارا سۋىعىندا-اق سەزىنگەن ەدىك. مەرەكەگە وراي ءتۇرلى جەڭىلدىكتەر جاسالىپ، بايقاۋلار وتكىزىلدى. سوندا الماتى اكىمدىگىنىڭ ەكى سويلەگەنى مە؟

بۇل – ءار جىل سايىن ايتىلىپ جۇرگەن ءبىر سارىندى اڭگىمە. ايتا-ايتا شارشاعان حالىقتىڭ قاراسى كوپ. عاسىرلار بويى قازاقپەن بىرگە جاساسقان ءتول مەيرامىمىز سوۆەت يدەولوگياسىمەن كەلگەن جاڭا جىلدىڭ تاساسىندا قالىپ قويعالى قاشان. دالەل كەرەك پە؟ ءقازىر ەلىمىزدىڭ كەي وڭىرىندە ۇلىستىڭ ۇلى كۇنى ءبىر-اق كۇن تويلانادى. قالا تۇرعىندارى مەرەكەنى تەك 22 ناۋرىزدا سەزىنە الادى. وندا دا الاڭعا بارىپ، جارتى كۇن كونسەرت تاماشالايدى. ءبىر كەسە ناۋرىزكوجەسىن ءىشىپ، ءان تىڭداۋمەن-اق ۋاقىتى وتەدى. اكىمدىك وكىلدەرى ءبىر كۇندىك ءىس-شاراعا بولا سونشا شابىلامىز با دەپ وتىرعان شىعار.

ناۋرىز مەيرامى جونىندە پرەزيدەنت نۇرسۇلتان نازاربايەۆ: «تاريحى تەرەڭدە جاتقان ناۋرىز مەرەكەسى قازاق جەرىندە ءارقاشان تويلانعان، الايدا ءبىر زامانداردا حالقىمىز ونى جوعالتىپ الدى. ەلىمىز تاۋەلسىزدىك العاننان كەيىن ءتول مەرەكەمىزدى ءبىز قايتادان جاڭعىرتتىق. بۇل كۇنى ۇرىسقان اعايىن تابىساتىن، رەنجىسىپ قالعان جاستار قايتادان تابىسىپ، ماحابباتتارىن ارتتىرىپ، باس قوساتىن، بارلىق جامانشىلىق ۇمىتىلاتىن، جاقسىلىققا قاراي بەت بۇراتىن كەز بولعان. تۇبىندە ءبىزدىڭ ناعىز جاڭا جىلىمىز وسى ناۋرىز مەيرامى بولۋى قاجەت. جۇڭگو ءوزىنىڭ جاڭا جىلىن اقپاننىڭ ورتاسىندا ءبىر اپتا تويلايدى. شىعىستىڭ بارلىق حالقىنىڭ ءوز جاڭا جىلدارى بار. ءبىز دە تۇبىندە ءوز مەرەكەمىزگە كەلۋىمىز كەرەك»، – دەگەن بولاتىن. قۇيىپ الاتىن كۇلاق، ءتۇيىپ الاتىن كوڭىل بولسا، قانەكي؟ الايدا ەلباسىنىڭ بۇل ءسوزىن الماتى اكىمدىگى ەسكەرە مە؟