عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا «اققۋلار ۇيىقتاعاندا» قويىلىمىنىڭ پرەمەراسى بولدى.
درامالىق قويىلىمنىڭ اۆتورى – جازۋشى-دراماتۋرگ نۇرعالي وراز. رەجيسسەرى – ەرجان قاۋلانوۆ.
پوەما اۆتورى مۇقاعالي ماقاتايەۆتىڭ تۋعان كۇنىنە تۇسپا-تۇس كەلگەن پرەمەراعا جينالعان حالىقتىڭ قاراسى قالىڭ بولدى.
مۇقاعالي پوەماسىنىڭ مازمۇنى كوپشىلىككە تانىس. بالاسىنىڭ ءومىرى ءۇشىن كۇرەسكەن انا، ايدىنىندا جۇزگەن اققۋىن قيمايتىن جەتىمكول قاسىرەتى جىرلانادى. قويىلىمعا بارعان كورەرمەن دە سونى كورگىسى كەلدى. «اتتەڭ-اي» دەيمىز وسى تۇستا. مۇقاعاليدىڭ پوەماسىنىڭ اتى بەرىلىپ، اقىننىڭ بىر-ەكى ولەڭى وقىلعانى بولماسا، پوەما مەن قويىلىمنىڭ اۋىز تولتىرىپ ايتار بايلانىسى دا جوق.
قويىلىم بارىسىندا بىرەسە ءوزىڭدى مۇقاعاليدىڭ ادەبي كەشىندە وتىرعانداي سەزىنەسىڭ، بىرەسە پوەماعا تۇك قاتىسى جوق قويىلىمدى تاماشالاۋعا كەلگەندەي بولاسىڭ.
جاساندى تۇسىك جاساتۋ، ۇلكەنگە دەگەن قۇرمەتتىڭ ازايۋى، جاستاردىڭ ومىردەن ءتۇڭىلىپ، بار كىنانى اعا بۋىنعا ارتۋى – ايتا-ايتا اقجەم بولعان تاقىرىپ. اۆتورلار سوندا دا قايتالاۋدان جالىقپايدى.
ال ارتىستەردىڭ دايىندىعى كەمشىن سياقتى. جانارىندا وت ويناعان اكتەر ول ساحنادا بولمادى، كورەرمەندى ءۇيىرىپ اكەتە المادى. ويتكەنى قول سوققان حالىقتىڭ شاپالاعى شاشىراڭقى شىعىپ جاتتى. قويىلىمنىڭ ۋاقىتى دا تىم قىسقا. لوگيكالىق ءتۇيىنى جوق. سپەكتاكلدىڭ ءبىتىپ قالعانىن كورەرمەن جان-جاعىنا جالتاقتاي قاراپ تۇسىنۋمەن بولدى.
تەك ەڭ سوڭىندا عانا «اققۋلار ۇيىقتاعاندا» پوەماسى مەن درامالىق قويىلىمنىڭ ازدى-كوپتى بايلانىسى بايقالادى. داستاندا اققۋ مەن بالانىڭ دەمى قاتار ۇزىلسە، قويىلىمدا ءسابي دۇنيەگە كەلىپ، اققۋ ءوز كولىنە ورالادى.
ايتۋ – پارىز، شەشىم شىعارۋ اركىمنىڭ – ءوز ەركىندە. قويىلىمعا كوزى قاراقتى كورەرمەن ۋاقىت وتە كەلە ءوز باعاسىن بەرەرى حاق. ول ءۇشىن تەاترعا بارىڭىز، قۇرمەتتى وقىرمان!
ايگەرىم تاۋباي
پىكىر قالدىرۋ