اكە!... لەيلاڭىزدى ۇمىتىپ كەتتىڭىز بە؟  ۇمىتپادىڭىز، مەنىڭ تاعدىر اۋىرتپالىعىمدى بىرگە كوتەۋگە شاماڭىز جەتپەدى. ءبىر تال لالا گۇلىڭىزدەن شىن بەزدىڭىز بە؟  انامنىڭ كوز جاسى كول بولىپ، ەكى كوزى ءتورت بولىپ ءسىزدى توسۋمەن ءجۇر. ءسىز  مىناۋ ءبىر قوڭىر ەسىكتەن شىعىپ  كەتكەلى باقانداي 9 جىل.  "ات اينالىپ قازىعىن تابار، ەسىكتى قايتا ءبىر قاعار "-دەپ، ۇمىتتەنەمىز. ءۇمىتتىڭ دە ۋاقىت وتكەن سايىن قۇنى كەميدى ەكەن.  ءبىزدىڭ جانۇيامىز ءالى دە شايقالمايتىن بولار، وتكەن ءىستىڭ ءسىز ورالساڭىز ورنى تولار...

مەن ءوزىمدى انامنىڭ الدىندا ىلعي  كىنالى سەزىنەمىن. مەن ءۇشىن انام ەكەۋىڭىزدىڭ ارالارىڭىز سۋىعانداي كورەم. سەزىمدەرىڭىزدەن مەن  جارالدىم. جاندارىڭىزدى ازاپقا سالدىم. سول ءۇشىن ءوزىمدى كىنالاپ كەلەم. مەن انامنىڭ كوز جاسىن كورگەن سايىن ءوزىمدى جەك كورەمىن.

اكە! مەن  سال اۋرۋىمەن ءومىر ەسىگىن اشتىم. العاشقى ەكى جىل مەنى جازىلار دەگەن ۇمىتپەن ءومىر سۇرگەن ەكەنسىزدەر.  ۇيدە ءسىزدىڭ قۇشاعىڭىزدا تۇسكەن سۋرەتتەر كوپ. قابىرعادا دا ءىلۋى تۇر. ءار كەشتە سول سۋرەت مەنىڭ سىرلاسىم بولىپ كەلەدى. ىشىمدەگى اشى مۇڭ مەن ازاپقا  تولى جايىمدى سىزگە ايتامىن.

    بيىل ءبىز جاقتا قار قالىڭ جاۋدى. شاتىرىمىز تەسىلدى. ءۇيدىڭ ىشىنە سۋ تامشىلاپ، مازامىز قاشتى. انامنىڭ دا كۇن وتكەن سايىن جۇزىنەن ءارى كەتىپ، جاعى سۋ الىپ بارادى. مەنى باعام دەپ، جۇرتتىڭ ءۇيىن تازالاۋمەن اينالىسادى. مەن كورشى ءاسيا اپكەنىڭ قاسىندا كوپ بولام. ول كىسىنى جۇرت اقىلى كەم دەيدى. مەنسىنبەيدى. جوق. ول ونداي ەمەس . ول مەنىڭ انام سياقتى  ماعان قامقور. قاسىنان قالدىرمايدى. شاتىردان سۋ كەتكەنىن دە ءبىزدىڭ شاتىردىڭ تۇنەكەسىن ءوزى اۋىستىردى. ەكى اي قىستا جىلۋعا كوپ قارىزدار بولىپ، جىلۋىمىزدى قىرقىپ تاستادى. اكەسىز قيىن... ەر ادامدار انامنىڭ ءسوزىن تىڭدامايدى دا. انام جاعدايدى ايتىپ  شىرىلداعان سايىن مەنىڭ جۇرەگىم ءتىلىنىپ كەتەدى.

اكە!... جانسىز اياعىمنان سىز وتكەندەي سەزىنەمىن. دەنەم ءجيى توڭادى. ءاسيا اپكەنىڭ توق پەشىن قوسىپ وتىرمىز. ول بولمەنى جىلىتۋعا قاۋھارسىز. مەنىڭ جۇرەگىم سياقتى، ءسىزسىز جىلىلىق سەزبەيتىن. اكە، لالا گۇلدەر بۇرشىك جارعاندا كەلەسىز بە؟ قايداسىز؟ ءسىزدى مەنىڭ جايىم الاڭداتپاي ما؟ انامدى ايامايسىز با؟ مەن  ءسىزدى ءبىر كورە السام، ءسىزدى اكەلەر ەدىم. ءسىز كەتكەندە،  مەن - ءتىلسىز ەدىم. مۇڭسىز ەدىم. قوڭىر ەسىكتىڭ تارس جابىلعانى، انامنىڭ ەبىل-دەبىل جىلاعانى ەمىس -ەمىس ەسىمدە. بەس جاستا ەدىم. تاعى ءبىر ۇزاق تەكسەرىلۋدەن كەلگەن كەزىمىز ەدى. سول وقيعادان سوڭ، التى  جاسىمدا ءتىلىم شىقتى.

ءبىر كەلىڭىزشى! سوسىن ءسىزدى قۇشاقتاعان كۇيى سىزدەن ءبىر ساتكە دە اجىراماس ەدىم.  كوڭىلىمدەگى  سان  سۇراقتى قويار ەدىم.  لالا گۇلدەر مەزگىل مەن ءسىزدى جىلداعىداي تاعى ءبىر رەت كۇتەمىن، اكەشىم!..

تۇرىك تىلىنەن اۋدارعان  مەيىرحان مەيرامبەك ۇلى