الماتىدا حالىقتىق داۋىس بەرۋ ارقىلى ەڭ ۇزدىك بايان سۇلۋ وبرازىن تاڭداۋ شاراسى باستالدى. «BAYAN SULU-2018» حالىقتىق بەينە - حالىق تاڭداۋى» دەگەن اتقا يە بولعان باستاماعا قوستانايلىق «بايان سۇلۋ» كونديتەرلىك فابريكاسى قولداۋ كورسەتىپ وتىر. سايىس جەڭىمپازى 2018 جىلدىڭ 15 ءساۋىرى، ياعني ۇلتتىق عاشىقتار كۇنىندە بەلگىلى بولماق، دەپ جازادى Qamshy.kz اقپارات اگەنتتىگى. 

جۋىردا ۇلتتىق ارنا ەكرانىنان تاريحي تاقىرىپتاعى وتاندىق شىعارىلىم - «قوزى كورپەش – بايان سۇلۋ» تەلەحيكاياسى كورسەتىلدى. تۋىندىنىڭ كورەرمەندەر كوكەيىندە ۇنامسىز وي قالىپتاستىرىپ، رەزونانستىڭ ورىن الۋىنا ۇيىتقى بولعانى جاسىرىن ەمەس. سىني پىكىرلەر اسىرەسە، باستى كەيىپكەر بايان سۇلۋدىڭ وبرازىنا باعىتتالدى، ياعني «...كورەرمەن قاۋىم ءوز قالاۋىنداعى شىنايى، جىرداعى بەينەمەن ۇشتاساتىن قازاق ارۋىن كورە المادى». ۇيىمداستىرۋشىلاردىڭ ايتۋىنشا، بۇل جاعداي - قازاق حالقىنىڭ وسى تۇستا ءوز ويىن بىلدىرگىسى كەلگەندىگىنىڭ ايقىن مىسالى جانە حالىقتىڭ سۇيىكتى كەيىپكەرىن تاڭداۋعا قاتىسۋعا نيەتتى ەكەنىن انىق اڭعارتادى.

«ءبىز قىزۋ تالقىعا ءتۇسىپ وتىرمىز. قوعامىمىزدا شىنايى بايان سۇلۋ بەينەسىن دارىپتەيتىن تۇسىنىكتى تولىق قالىپتاستىرۋعا ۇلەس قوسساق دەيمىز. سوندىقتان دا قازاقستاندىقتارعا قاراكوز ارۋلارىمىزدىڭ اراسىنان ۇلتىمىزدىڭ سۇيىكتى وبرازىنا اقىلى مەن كوركى ساي كەلەتىن، ونىمەن ۇشتاساتىن بەينەنى انىقتاۋ مۇمكىندىگىن ۇسىنۋدى ءجون سانادىق»، - دەيدى «بايان سۇلۋ» كونديتەرلىك فابريكاسىنىڭ وكىلى جانە ۇيىمداستىرۋ كوميتەتىنىڭ ءتوراعاسى مارلەن ابىلعازينوۆ.

سايىسقا قاتىسۋ ءۇشىن 18 جانە 35 جاس ارالىعىنداعى قىز-كەلىنشەكتەر www.halykbayansulu.kz سايتىنداعى ارنايى انكەتانى تولتىرىپ، ءوز فوتوسى جانە ۆيدەو-اقپاراتتى جۇكتەۋى كەرەك. ۆيدەودا قاتىسۋشى بايان سۇلۋ وبرازىنىڭ قازاق حالقىنا ەرەكشەلىك سيپاتىن جانە وسى بەينەنى سومداۋعا نەگە ول لايىقتى ەكەندىگى تۋرالى اڭگىمەلەۋى ءتيىس. سايىس 2018 جىلدىڭ 15 اقپانى مەن 31 ناۋرىزى ارالىعىندا وتەدى. وسى ۋاقىت ارالىعىندا ينتەرنەت قولدانۋشىلار ءوز داۋىستارىن بەرە دا الادى.

حالىقتىڭ داۋىس بەرۋ ناتيجەسىنىڭ نەگىزىندە فينالدىق كەزەڭگە 5 قاتىسۋشى وتكىزىلەدى. مەرەكەلىك اقتىق باسەكە 15 ءساۋىر كۇنى الماتى قالاسىندا وتەدى. ءادىلقازىلار القاسىنىڭ شەشىمىمەن بەس قاتىسۋشىنىڭ اراسىنان ءبىر جەڭىمپاز انىقتالادى. سايىستاعى ءادىلقازىلار القاسى قۇرامىن قوعام قايراتكەرلەرى، مادەنيەت جانە ب ا ق وكىلدەرى، سونداي-اق تانىمال بلوگەرلەر مەن مەديا-تۇلعالار قۇرايدى. جەڭىمپاز ارۋ سۋپەر-جۇلدە – اۆتوكولىككە يە بولىپ، جىل بويىنا «بايان سۇلۋ» كونديتەرلىك ماركاسىنىڭ رەسمي بەينەسى بولىپ تانىلادى. سونداي-اق، ەكىنشى (تروپيكالىق ارالعا 2 ادامعا ارنالعان جولداما)، ءۇشىنشى (سمارتفون)، ءتورتىنشى جانە بەسىنشى جۇلدەلى ورىندارعا دا (اقشالاي سەرتيفيكاتتارى) سىيلىقتار قاراستىرىلعان.

ءبىز ءوزىمىزدىڭ ءتول مەرەكە - «قوزى كورپەش – بايان سۇلۋ» عاشىقتار كۇنىنىڭ كەڭ ناسيحاتتالىپ، تويلانۋىن قولدايمىز. سوندىقتان دا، بۇل داۋىس بەرۋدىڭ ءوتۋى ورىندى-اق، جانە ءار وتانداسىمىز بەي-جاي قالماي، داۋىس بەرۋ ارقىلى ءوز ويىن بىلدىرە الادى، ياعني بۇل دەگەنىمىز – وتكەن ءداستۇرىمىز بەن ۇلتتىق نەگىزىمىزدى ۇلىقتاۋ»،- دەيدى «ايقىن» گازەتىنىڭ باس رەداكتورى نۇرتورە ءجۇسىپ.

15 ساۋىردە ەل تۇرعىندارى سەگىزىنشى رەت «قوزى كورپەش – بايان سۇلۋدىڭ» ماڭگىلىك ماحاببات سيمۆولىن دارىپتەيتىن - ۇلتتىق عاشىقتار كۇنىن تويلايدى