چەرنوگوريا استاناسى پودگوريسادا بەلگىسىز ادام اقش ەلشىلىگىنىڭ عيماراتىنا قاراي گراناتا لاقتىرىپ، ءوزىن جارىپ جىبەردى. چەرنوگوريا باق-ىنىڭ حابارلاۋىنشا، وقيعا 22 اقپان كۇنى تاڭعا جۋىق ۋاقىتتا بولدى. Portalanalitika.me سايتىنىڭ اقپاراتى بويىنشا، جەرگىلىكتى تۇرعىندار ءتۇن جارىمىنا قاراي جارىلىس ءۇنىن ەستىگەن، دەپ Qamshy.kz اقپارات اگەنتتىگى ازاتىققا سۇيەنىپ جازادى. 

پوليسيانىڭ ءاتى-جونىن اتاماعان قىزمەتكەرى Reuters اگەنتتىگىنە توتەنشە وقيعا بولعانىن عانا ايتىپ، باسقا اقپارات بەرمەدى. اگەنتتىكتىڭ پودگوريساداعى فوتو ءتىلشىسى پوليسيانىڭ ەلشىلىك ورنالاسقان كوشەنى قورشاعانىن، ەلشىلىك ايتارلىقتاي زاقىمدانعانى بايقالمايتىنىن حابارلادى.

پوليسيا جانكەشتى دەلىنگەن ادامنىڭ ءوزىن نە ءۇشىن جارىپ جىبەرگەنى ازىرگە بەلگىسىز ەكەنىن ايتادى. اقش-تىڭ پودگوريساداعى ەلشىلىگى قاۋىپسىزدىك شاراسىنىڭ كۇشەيتىلگەنىن حابارلاپ، امەريكالىقتارعا پودگوريساداعى حالىق كوپ جۇرەتىن جەرلەرگە بارماۋعا جانە جاعدايدى باق-تان باقىلاپ وتىرۋعا كەڭەس بەردى.

بۇرىن يۋگوسلاۆيا قۇرامىندا بولعان شاعىن عانا چەرنوگوريا مەملەكەتى بىلتىر مامىردا ناتو-عا قوسىلعان. چەرنوگورياداعى جانە بالقان تۇبەگىندەگى رەسەيشىل ادامدار ەلدىڭ ناتو-عا قوسىلۋىنا قارسى شىققان.