ەرىك ماعزۇم ۇلى اسانبايەۆ — قازاقتىڭ كورنەكتى مەملەكەت قايراتكەرى، ديپلومات، ەكونوميكا  عىلىمدارىنىڭ  دوكتورى، پروفەسور. ەرىك ماعزۇم ۇلى — بۇگىنگى قازاق تاريحىندا تۇعىرى بيىك تۇلعا. ونىڭ ومىرلىك جولى، ساياسي مۇراسى  ءار ادامعا ۇلگى بولارلىقتاي. ەڭبەك جولىن سوناۋ 60-شى جىلدارى قازاق كسر قارجى مينيسترلىگىندە قاراپايىم  قىزمەتتەن باستاعان ول ءوزىنىڭ ءبىلىمى مەن ەڭبەكقورلىعىنىڭ ارقاسىندا ۇلكەن، جاۋاپتى قىزمەتتەرگە قول جەتكىزدى.

ايتا كەتسەك، قازاق كسر قارجى ءمينيسترىنىڭ ورىنباسارى، قازاق كسر مينيسترلەر كەڭەسىنىڭ ءتوراعاسىنىڭ ورىنباسارى، قازاقستان كومپارتياسىنىڭ ورتالىق كوميتەت حاتشىسى جانە وك-دە ءبىرقاتار بولىمدەرىندە قارجى، ساۋدا، عىلىم جانە ءبىلىم مەكەمەلەرى، ەكونوميكا ءبولىمى مەڭگەرۋشىسى قىزمەتتەرىن  اتقاردى. كەڭەستىك كەزەڭدە جيناقتالعان وسىنداي قىزمەت پەن تاجيربيە جيناعى ەڭسەلى ەلىمىز ەگەمەندىك العاندا ەرىك ماعزۇمۇلىن جاس مەملەكەتتىڭ حاس ساياساتكەرىنە اينالدىردى.

1991 جىلى جالپى حالىقتىق سايلاۋدا نۇرسۇلتان ءابىش ۇلى نازاربايەۆ قازاقستان رەسپۋبليكاسىنىڭ تۇڭعىش پرەزيدەنتى بولىپ، ال ەرىك ماعزۇم ۇلى اسانبايەۆ تۇڭعىش جانە سوڭعى  ۆيسە-پرەزيدەنت بولىپ سايلانادى.  اسانبايەۆ بۇل قىزمەتتى 1996 جىلعا دەيىن اتقارىپ كەلدى. ۆيسە-پرەزيدەنت لاۋازىمىندا ەرىك ماعزۇم ۇلى ەلىمىزدىڭ قالىپتاسۋ كەزەڭىندە ايانباي قىزمەت ەتتى.

ونىڭ وسى قىزمەتتە قازاقستاننىڭ ەگەمەن ەل بولىپ قالىپتاسۋى مەن دامۋ ستراتەگيسى اتتى باعدارلامادا باسشىلىق ەتۋى جاس مەملەكەتتىڭ ەلدىگىن نىعايتۋداعى بىردەن ءبىر قادام ەدى. ەرىك ماعزۇم ۇلى ءوز سوزىندە بۇل باعدارلاما جايلى «سۆيدەتەلي» جۋرنالىنىڭ تىلشىسىنە بەرگەن سۇحباتىندا «ءبىز ەگەمەندىك الدىق، وزىندىك دامۋ جولىن تاڭدادىق، الايدا، وتكەننەن ساباق الىپ، بولاشاقتى ايقىنداۋ ءۇشىن ءبىز ءوز قۇندىلىقتارىمىزدى سارالاپ، العا قويعان ماقساتتارىمىزعا جەتۋ ءۇشىن دۇرىس باعىت-باعدار انىقتاۋ قاجەت بولدى.

پەرزيدەنتتىڭ شەشىمىمەن كۇردەلى پروبلەمالاردى انىقتاۋ پروسەستەرى  كەزەڭىندە ورىن العان زەرتتەۋلەر مەن ۇسىنىستار ۇلكەن، اۋقىمدى دا ماڭىزدى قۇجاتقا اينالدى. بۇل پروگراممالى قۇجات تەك ىشكى سۇرانىستى قامتاماسىز ەتىپ قويماي، الەم الدىندا ەلىمىزدىڭ ءپوزيتيۆتى ءيميدجىن قالىپتاستىردى. وسى تۇرعىدان مەن بۇل قۇجاتتا انىقتالعان باعىت باعدارلارعا بۇگىنگى ۋاقىت وتكەلىنەن وڭ باعامدى بەرەر ەدىم» دەپ جاۋاپ بەرگەن ەكەن. سونىمەن قاتار، ەرىك ماعزۇم ۇلى 1990-شى جىلدارداردىڭ باسىنداعى كادرلىق تاپشىلىق كەزەڭىندە دە مەملەكەتتىك قىزمەتكەرلەر قاتارىن جاس جانە وزات ويلى ازاماتتارمەن تولىقتىرا ءبىلدى.

ەلىمىزدىڭ قازىرگى ءبىر قاتار قايراتكەرلەرى كەزىندە اسانباەتىڭ قولاستىندا ىستەپ، ونىڭ مەكتەبىنەن وتكەن.  سولاردىڭ ءبىرى بەلگىلى مەملەكەت قايراتكەرى، ديپلومات، ينتەللەكتۋال تولەگەن تىلەك ۇلى جۇكەيەۆ ەرىك ماعزۇم ۇلى جايلى، ونىڭ بىلىمدىلىگىن ءسوز ەتكەندە «اسانبايەۆ — ەرەكشە تۇلعا. ەگەر ول امەريكادا ءومىر سۇرگەندە كولۋمبيا نەمەسە چيكاگو ۋنيۆەرسيتەتتەرىنىڭ پروفەسسورى بولار ەدى. ءتىپتى، نوبەل سىيلىعىنىڭ يەگەرى بولاتىن ەدى» دەيدى. بۇگىن 22 اقپان كۇنى قازاقستان رەسپۋبليكاسىنىڭ ۆيسە-پرەزيدەنت لاۋازىمى قىزمەتىنىڭ جويىلۋىنا 22 جىل تولدى. بۇل قىزمەتتى اتقارعان ەرىك ماعزۇم ۇلى اسانبايەۆ تاريحقا تۇڭعىش جانە سوڭعى ۆيسە-پرەزيدەنت بولىپ ەندى. قىزمەت تە ەرەكشە، قىزمەتتى اتقارعان ادام دا ەرەكشە.

ابىلاي سارسەنبايەۆ

جاس الاش گازەتى