كەزىندە ءوزىنىڭ كوپتەگەن اندەرىمەن تىڭدارمان قاۋىمنىڭ العىسىنا بولەنگەن سازگەر جارلىقاسىن داۋلەت بۇگىن تىڭنان ءبىر تۇرەن سالعانداي، قازاق ەپوسىن جاستارعا دارىپتەۋگە بولمايدى دەپ مالىمدەدى. "اسىل ارنا" تەلە ارناسىنا بەرگەن سۇحباتىندا سازگەر جاستار اراسىندا عاشىقتار كۇنى اتالىپ كەتكەن ۆالەنتين كۇنىن تويلاۋعا بايلانىستى: "ۆالەنتين كۇنى – حالىقتى ازعىندىققا شاقىراتىن مەيرام. ونى بىرەۋلەر «قوزى كورپەش-بايان سۇلۋ» دەپ وزگەرتىپتى. جاپالاقتى تاسپەن ۇرساڭ دا، تاستى جاپالاقپەن ۇرساڭ دا جاپالاق ولمەي مە؟ ءوزىڭىز ويلاپ كورىڭىزشى، قوزى كورپەش، بايان سۇلۋ دەگەن كىمدەر؟ قوزىنى قودار ءولتىرىپ تاستاعان سوڭ، بايان دا وزىنە قول جۇمساپ ءولدى دە، ءبىر مولاعا كىردى. ءوزىن-وزى ءولتىرىپ، جانازاسى شىقپاي، ءبىر مولاعا جاتقان ادامدى كىمگە ۇلگى قىلىپ وتىرمىز"، -دەگەن.
قازاق فولكلورىنىڭ كوركەم دە قۇندى سالاسى – ەپوستىق جىرلار ەكەنى ەكى جاسار بالاعا دا ءمالىم. ەپوس دەپ وقيعاسى ەل، حالىق ومىرىنەن الىنعان، وبرازدارى ءىرى ءارى كەمەلدى تۇردە جاسالىپ، باتىرلىق نەمەسە عاشىقتىق سيۋجەتكە قۇرىلعان ۇلكەن ەپيكالىق جىر–داستانداردى ايتاتىن بولساق اۋزىمىزعا ءبىرىنشى وسى "قوزى كورپەش-بايان سۇلۋ" تۇسەتىنى تاعىى راس. ال سازگەر بولسا اتالمىش سەنارييدەگى بارلىق ەپوستىق جىرلار جاستاردى سۋيسيدكە تاربيەلەيتىندىكتەن ولاردى مۇلدە وقىتپاۋ كەرەك ەكەن-مىس. سوندا ادەبيەتىمىزدىڭ كلاسسيكالارىنىڭ ءبىرقاتارى، مىسالى، "قوزى كورپەش-بايان سۇلۋداعى" بايان، "باقىتسىز جامالداعى" جامال ت.ب تۇككە تۇرعىسىز دۇنەلەر بوپ قالعانى ما؟
