قوعامعا قاتىستى كىشىگىرىم كوممەنتاريي بەرمەك تۇگىلى، ءوز ءومىرى جايلى ارنايى سۇحبات بەرۋى سيرەك انشىلەردىڭ ءبىرى - ءمادينا ءسادۋاقاسوۆا. وتكەن جىلى ول تۇرمىسقا شىعىپ، سوسىن ۇلدى بولعاندا ەل كادىمگىدەي دۇرلىگىپ ەدى. اسىرەسە، الەۋمەتتىك جەلىلەردىڭ جارىلا جازداعانى راس. «قازاقستان داۋسىندا» قازىلىق ەتكەنى بولماسا، وسى ءبىر جىل ىشىندە ەش جەردە ول ءوزىنىڭ جەكە ءومىرى جايلى ءلام دەپ اۋزىن اشقان جوق. سودان دا شىعار، ەل اراسىندا «ءمادينا ءوي دەپتى، ءبۇي دەپتى» دەگەن سوزدەر تاراپ كەتتى. سونىڭ قايسىسى قاۋەسەت، قايسىسى راس؟ كۇنى كەشە ول استانا ارناسىنداعى «سىرلاسۋعا» قوناق بولدى. سوندا سول جەردەن كوكەيدە جۇرگەن كۇماندى جايتتاردىڭ جاۋابىن ءتىزىپ الىپ ەدىك...
1.ءمادينانىڭ «Forbes» جۋرنالىنداعى باي انشىلەر تىزىمىندە ءتورتىنشى ەكەنى راس پا؟ – قالاي دەسەم ەكەن؟.. روزا باعلانوۆا «حالىق ءوزىنىڭ جاقسى كورەتىن ءانشىسىن اش قالدىرمايدى، توڭدىرمايدى جانە جاياۋ جۇرگىزبەيدى» دەگەن بولاتىن. راسىندا، ەكىنشى رەت تۇرمىسقا شىققانعا دەيىن مەندە ءبارى بولدى: استانانىڭ ورتالىعىنان ەليتالى ءۇي، ءتۇرلى قىمبات اشەكەيلەر، كيىم-كەشەك، ءبارى-بارى... ءبىراق، مەن وعان ءوزىمدى باي، باقىتتى سەزىنگەن جوقپىن. سەبەبى كەشكە ۇيگە كەلگەندە مەنى سۇپ-سۋىق بولمەلەر قارسى الاتىن. مەنى تۇسىنەتىن، مەنى كۇتەتىن ءتىرى جان جوق... كەيدە كوز جاسىما ەرىك بەرىپ: «قاشان مەنىڭ ءوز وتباسىم بولادى ەكەن؟..» دەيتىنمىن. ءقازىر مەنىڭ جانىمدا كۇيەۋىم، بالام، ەنەم، ەكى قاينىم بار. مەيلى ءزاۋلىم سارايدا تۇرمايتىن شىعارمىز، ءبىراق باقىتتى بولۋىمىزعا اياداي بولسا دا سول ءۇش بولمەنىڭ ءوزى جەتكىلىكتى ەكەن. ءار تاڭدا ۇلىمنىڭ ءۇيدى باسىنا كوتەرە جىلاپ وياتقانى، ءبارىمىزدىڭ سوعان ازان-قازان بولعانىمىزدىڭ ءوزى سوزبەن جەتكىزە الماس ءبىر باقىت!
2. ولجاسپەن ونى قوسقان «وقىس وقيعا» دەگەن راس پا؟ – وسىعان دەيىن ەش جەردە ايتپاعان ەدىم، نەگىزى وقيعا بىلاي بولدى: «ەكى-ۇش جىلداي بۇرىن استانادا جۇرگەن كەزىمدە كەنەت ماعان وقىس حابار جەتتى. قوڭىراۋ شالىپ تۇرعان الماتىداعى پاتەرىممەن ىرگەلەس كورشىم ەكەن: «ءمادينا، ءسىزدىڭ ءۇيىڭىزدىڭ ەسىگى اشىق تۇر، سوعان قاراعاندا، ۇرى تۇسكەن-اۋ» دەدى. داۋسى دىرىلدەپ تۇر. قاپەلىمدە نە ىستەرىمدى بىلمەي ساسقالاقتادىم دا قالدىم. «قۇداي-اۋ، كىمگە ايتامىن، نە ىستەيمىن؟» دەپ تۇرعانىمدا، نەگە ەكەنىن بىلمەيمىن، ويىما بىردەن ولجاس ءتۇستى. دەرەۋ ۇيالى تەلەفونىمداعى كونتاكتىلەر اراسىنان سونىڭ ءنومىرىن تەردىم. ول ارتىق سوزگە كەلمەستەن، بىردەن ايتىلعان ادرەسكە «ۇشتى». ارتىنشا «ءمادينا، وزىڭە بەكەم بول، ءۇي ءىشىنىڭ استاڭ-كەستەڭى شىعىپ جاتىر، ۇرى ءتۇسىپتى» دەدى. كوندىم. نە ىستەي الامىن. ءبىراق مەن ول «توناۋدان» ەشتەڭە جوعالتقان جوقپىن، قايتا ءوزىمنىڭ ناعىز ومىرلىك سەرىگىمدى تاپتىم. «ءماسساعان، ءبىر اۋىز ءسوزىم ءۇشىن بار تىرلىگىن تاستاپ كىرىسىپ كەتكەن ادام، مەنى ناعىز تۇسىنەتىن ادام وسى ۋاقىتقا دەيىن مەنىڭ جانىمدا جۇرگەن ەكەن عوي» دەدىم...
3. ...قابدەش ءجۇمادىلوۆتىڭ كەلىنى مە؟ – يا، راس. شىنىمدى ايتسام، قازاقتا مۇنداي جازۋشى بارىن بىلسەم دە، شىعارمالارىن وقىماعان ەكەنمىن وعان دەيىن. بالا كۇتىپ ۇيدە وتىرعان ءبىر جىلدا، «ءوز ايىبىمدى وتەدىم».
4.ءانشى تاعى جۇكتى مە؟ – مەن جايلى مۇنداي اقپارات قايدان شىققانىن بىلمەدىم. ايتەۋىر ەلدەر قوڭىراۋ شالىپ، حابارلاما جازىپ، ءار ءتۇرلى جەلىلەر ارقىلى قۇتتىقتاپ جاتتى. ءتىپتى ءوزىم دە «سولاي بوپ قالدى ما، شىنىندا» دەگەن ويعا قالدىم. (كۇلدى) ءبىراق، ول تەك جاقسى ءسوز بولدى... كىم ءبىلسىن؟.. "الاش ايناسى"
