الماتىدا ءبىلىم سالاسىنداعى جەمقورلىققا قارسى جوبالىق كەڭسە اشىلدى.
ەلىمىزدەگى ءبىلىم وشاقتارىندا جەڭ ۇشىنان جالعاسقان جەمقورلىقپەن كۇرەس كۇشەيەدى. ويتكەنى، سوڭعى ءۇش جىلدا ءبىلىم بەرۋ سالاسىندا 700-گە جۋىق جەمقورلىق فاكتىسى تىركەلىپتى. بۇل تۋرالى بۇگىن الماتىدا وتكەن «سانالى ۇرپاق» رەسپۋبليكالىق فورۋمىندا بەلگىلى بولدى. شاراعا 2000-نان استام ادام قاتىستى. قاتارىندا ستۋدەنتتەر، جوعارعى وقۋ ورىندارى مەن جەرگىلىكتى بيلىك وكىلدەرى بار. فورۋم اياسىندا جەمقورلىققا توتەپ بەرەتىن كەڭسە اشىلدى. شاھار باسشىسى باۋىرجان بايبەك ورتالىق جۇمىسىمەن تانىسىپ شىقتى.
«سانالى ۇرپاق» رەسپۋبليكالىق فورۋمىنا جيىلعان كوپتىڭ قاراسى كوپ. ستۋدەنتتەر، ۇستازدار قاۋىمى مەن ەلدىڭ ءار وڭىرىنەن كەلگەن جوعارعى وقۋ ورىندارىنىڭ باسشىلارى بار. بارلىعىن مازالاعان سۇراق - ءبىلىم سالاسىنداعى جەمقورلىقتى جويۋ. شاراعا جيىلعاندار ستۋدەنتتەر مەن كۋراتورلار اراسىنداعى اشىق، سەنىمدى قارىم-قاتىناستاردى قالىپتاستىرۋ قاجەتتىگىن العا تارتتى.
«الماتى مەكتەپتەرىندە، كوللەدجدەرى مەن ۋنيۆەرسيتەتتەرىندە 500 مىڭعا جۋىق جاستار ءبىلىم الادى. ەل بولاشاعى جاستار دەسەك، بۇگىنگى كۇنى وسى جاستارىمىزبەن جۇمىستا ولاردىڭ بويىندا جەمقورلىققا توزىمسىزدىك تانىتۋ قاعيدالارىن سىڭىرۋگە باسا نازار اۋدارۋ كەرەك. ەلباسى نۇرسۇلتان ءابىش ۇلى نازاربايەۆ ايتقانداي، جەمقورلىقپەن كۇرەستىڭ تيىمدىلىگى بۇكىل قوعامنىڭ جۇمىلىپ، بەلسەندى اتسالىسۋىنا تىكەلەي بايلانىستى بولماق. ولاي بولسا، مۇددەلى مەملەكەتتىك ورگاندار، ۇكىمەتتىك ەمەس ۇيىمدار، ساراپشىلار مەن ۇستازدار قاۋىمى بولىپ قوعامدا جەمقورلىققا مۇلدەم توزبەۋشىلىكتى قالىپتاستىرۋ بارشامىزدىڭ مىندەتىمىز»، - دەدى الماتى قالاسىنىڭ اكىمى باۋىرجان بايبەك.
ەلىمىزدە جەمقورلىق ەڭ كوپ تاراعان سالانىڭ ءبىرى - ءدال وسى ءبىلىم بەرۋ سالاسى ەكەن. اسىرەسە، وڭتۇستىك قازاقستان وبلىسىنىڭ مەكتەپتەرى مەن بالاباقشالارىندا جەمقورلىق ءورشىپ تۇرعان كورىنەدى. ودان كەيىنگى كوشتى سولتۇستىك جانە باتىس قازاقستان وبلىسى جالعاۋدا. شاعىن سىيلىقتان باستاپ، قوماقتى قارجىعا دەيىن پارا الاتىنداردىڭ ۇستىنەن قىلمىستىق ءىس قوزعالسا دا، ارانى اشىلعان اشكوزدەر سانى ازايماي تۇر. سوندىقتان الداعى ۋاقىتتا قازاقستاننىڭ ەڭ ۇزدىك جوعارعى وقۋ ورىندارىنىڭ رەيتينگى جاساقتالماق. ول ءۇشىن جاسىرىن ساۋالناما جۇرگىزىلەدى.
«ءبىزدىڭ مالىمەتتەرگە سايكەس، ءبىلىم بەرۋ سالاسىندا سىبايلاس جەمقورلىق ەداۋىر ارتقان. ەلىمىزدە سوڭعى ءۇش جىلدا 687 جەمقورلىق فاكتىسى تىركەلىپ، 226 لاۋازىمدى تۇلعا سوتتالدى. قىلمىستىق جاۋاپكەرشىلىككە تارتىلعانداردىڭ اراسىندا 82 مەكتەپ، 17 كوللەدج ديرەكتورى، 70 بالاباقشا مەڭگەرۋشىسى، 29 ءبولىم باسشىسى مەن وبلىستىق ءبىلىم باسقارمالارىنىڭ باسشىلارى بار. قازاقستان بويىنشا ءبىلىم سالاسىندا سىبايلاس جەمقورلىق قىلمىستارىنىڭ ەڭ كوبى وڭتۇستىك قازاقستان وبلىسىندا تىركەلەدى»، - دەدى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اليك شپەكبايەۆ.
فورۋم اياسىندا «سانالى ۇرپاق» جوبالىق ءوفيسىنىڭ تۇساۋى كەسىلدى. ول «ستۋدەنتتەرگە قىزمەت كورسەتۋ ورتالىعىندا» ورنالاسقان. مۇندا تەك جوعارعى وقۋ ورنىنىڭ تالىمگەرلەرى عانا ەمەس، بارلىق ءبىلىم بەرۋ مەكەمەلەرىنىڭ وكىلدەرى باس قوسىپ، سىبايلاس جەمقورلىققا قارسى تىعىز جۇمىس جاسايدى. ياعني، مەكتەپ وقۋشىسىنان باستاپ، قالانىڭ بارشا جاستارى ءۇشىن دە ەسىك اشىق. ءتىپتى، پارا سۇراعانداردان قىسىم كورگەندەردەن دە قوڭىراۋلار قابىلدانادى. شاعىمدار راستالسا، شارا قولدانۋ ءۇشىن بىردەن ءتيىستى ورگانعا جىبەرىلەدى.
«بۇل جوبالىق كەڭسەنىڭ باستى ماقساتى - ءبىلىم بەرۋدەگى سىبايلاس جەمقورلىقتى جويۋ جانە جەمقورلىققا توزبەۋشىلىك تۋدىراتىن ورتانى قۇرۋ. نەگىزگى مىندەتتەرىمىزگە ءبىلىم بەرۋ سالاسىنداعى ساپانى جاقسارتۋ، ءارى مامانداردىڭ ادالدىق قاسيەتىن دامىتۋ جاتادى. سونداي-اق سىبايلاس جەمقورلىققا قارسى جاڭا تەتىكتەردى ەنگىزۋ بولىپ تابىلادى»، - دەدى «سانالى ۇرپاق» جوبالىق كەڭسەسىنىڭ ۇيلەستىرۋشىسى قارلىعاش ۋسەينوۆا.
ايتىپ وتسەك، فورۋمنان سوڭ كەلگەن مەيماندارعا الماتىداعى «Open Almaty» جانە قۇقىق قورعاۋ قىزمەتتەرى ورتالىعىنىڭ جۇمىسى تانىستىرىلدى. بىلتىر اشىلعان قوس مەكەمەدەگى مامانداردىڭ جۇمىسى كوڭىل كونشىتەدى. ماسەلەن، ارىز-شاعىمداردى قابىلداپ قانا قويماي، ءوز كاسىبىن باستاۋعا نيەتتەنگەن ازاماتتارعا دا كەڭەس بەرەتىن قوعامدىق قابىلداۋ ورتالىعى وسى ۋاقىتقا دەيىن 16 مىڭ تۇرعىننىڭ ماسەلەسىن قاراستىرىپ ۇلگەرىپتى. سونىڭ 72 پايىزى بىردەن شەشىلگەن. ال قۇقىق قورعاۋ قىزمەتتەرى ورتالىعى اشىلعالى بەرى 4 مىڭنان استام تۇرعىنعا كومەك بەرىپتى. قازىرگى ۋاقىتتا پروكۋرورلاردىڭ كەڭەسىنە كۇن سايىن 200-گە تارتا ادام جۇگىنەدى ەكەن.
پىكىر قالدىرۋ