«اكىم بول، حالقىڭا جاقىن بول!». ورىندالمايتىن وسى تالاپ قۇرعاق اقىل كۇيىندە قالا بەرەتىن سياقتى. قۋ قۇلقىننىڭ قامى ءۇشىن جۇرگەندەر «ىشىپ-جەم قويماسىنىڭ» ىسىنۋىنەن باسقاعا باس قاتىرمايدى. تەك بۇگىنىمەن عانا ءومىر سۇرۋگە اۋەس.

بىردە اقمولا وبلىسىنىڭ قاراجار اۋىلدىق وكرۋگىنە اكىم بولعىسى كەلگەن سونداي بىرەۋ ۇستالىپ ەدى. ءاتى-جونى – ۆالەنتينا ماركەر. ول جالعان ديپلوممەن 15 جىل بويى ورتا مەكتەپتە ورىس ءتىلى مەن ادەبيەتىنەن «ساباق بەرىپ» كەلگەن. نەبارى 55-اق مىڭ تەڭگەگە ساتىپ العان قولداعى قۇجاتى بويىنشا، «اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ فيلولوگيا فاكۋلتەتىن ءتامامداعان». ال جوعارى وقۋ ورنىندا مۇلدەم وقىماعانى ەندى مەملەكەتتىك قىزمەتتى ءبىراز شايقاعىسى كەلگەندە ءبىر-اق اشكەرەلەندى. وعان دەيىن اۋىل ءمۇعالىمىنىڭ ءبىر رەت تە سەسسياعا سۇرانىپ، الماتىعا بارماعانىن بىلە تۇرا، ەشكىم تەكسەرمەپتى. اكىمدىككە ۇمتىلماعاندا، «ۇستازدىعىن» زەينەتكە شىققانشا جالعاستىرا بەرەتىندەي ەكەن. وعان قاراجار اۋىلدىق وكرۋگىنىڭ اكىمى مىندەتىن 5 اي اتقارىپ تاستاعانىن قوسىپ قويىڭىز... سوندا، ول سوتتالعان بولسا دا ءبارىبىر سياقتى ما، قالاي؟..

وسىعان ۇقساس ەكىنشى دەرەك 2013 جىلى قىزىلوردا وبلىسىنىڭ قازالى اۋدانىندا تىركەلدى. ونداعى تاسارىق اۋىلى اكىمىنىڭ مىندەتىن اتقارعان شەنەۋنىكتىڭ دە وقۋعا ۋاقىتى بولماسا كەرەك. جۇمساق ورىنتاعىنان جالعان ديپلومى جارعا جىققانشا تۇسپەي كەلگەن.

كەزەكتى «ساتىپ الۋشى» قوستاناي وبلىسىنىڭ امانكەلدى اۋدانىندا ۇستالدى. ول دا جەرگىلىكتى مەكتەپتە جۇمىس ىستەگەن. جوعارى جالاقى الۋ ماقساتىندا 2005 جىلدىڭ 5 ماۋسىمىندا ى.التىنسارين اتىنداعى ارقالىق مەملەكەتتىك پەداگوگيكالىق ينستيتۋتىن «ءتامامداپتى». ونىسى اۋدانداعى ءبىر اۋىلعا اكىم رەتىندە سايلاۋعا تۇسپەكشى بولعاندا انىقتالدى.

ايتەۋىر، جەمقورلاردى ماۋجىراتىپ قوياتۇعىن جىلى ورىندا جىلتىراپ وتىرۋدى ماقسات ەتكەندەر كوپ-اق. جىلى-جۇمساقپەن مەلدەك اتقىسى كەلەدى. قالاي دا ولاي سوعان جەتۋى كەرەك. ارام جولمەن. ارلانباستان. اكىمدىك اكەسىنەن قالعانداي. ەن بايلىقتان ەنشىسىن العانداي.

P.S. ەكىنىڭ ءبىرى كەڭسە مەن ءۇيىنىڭ اراسىندا شىرەنىپ جۇرگىسى كەلسە، الدىمەن وقۋدى وڭدىرۋى ءتيىس قوي. «دۆوەچنيكتەر» ەلىندە جۇرگەن جوق شىعارمىز...

ەركەعالي بولات ۇلى