الەۋمەتتىك مەديسينالىق ساقتاندىرۋ قورىنىڭ مالىمەتى بويىنشا، جالپى قايتىس بولعان ادامداردىڭ 74 پروسەنتى سوزىلمالى اۋرۋلار سالدارىنان كوز جۇمعان. كورسەتكىشتىڭ ەڭ كوبى، ياعني 41 پروسەنتى قان اينالىمى جۇيەسىنىڭ، 22 پروسەنتى -  تىنىس الۋ مۇشەلەرى، 20 پروسەنتى - ونكولوگيالىق اۋرۋلاردىڭ سالدارىنان بولىپ جاتادى. قالعان 17 پروسەنتتە جازاتايىم وقيعالار، جاراقاتتار مەن ۋلانۋ جانە اس قورىتۋ جۇيەسى اۋرۋلارى سەبەپكەر بولادى.

مۇنداي كورسەتكىشتەر حالىقتىڭ اۋرۋلاردىڭ الدىن الۋعا دەن قويا بەرمەيتىندىگىنىڭ دالەلى. قازاقستاننىڭ ءاربىر ونىنشى تۇرعىنى مەديسينالىق كومەككە قىسىلتاياڭ جاعدايدا عانا جۇگىنەدى. جىل سايىنعى 2،9 ملن گوسپيتاليزاسيانىڭ 68 پروسەنتى نەمەسە 1،9 ملن ادام – بۇل شۇعىل پاسيەنتتەر.

استانا قالاسى بويىنشا «ءامسق» كەاق فيليالىنىڭ ديرەكتورى نۇرلىبەك قابدىقاپاروۆتىڭ ايتۋىنشا، قازاقستاندا 2017 جىلى دەنساۋلىق ساقتاۋ سالاسىنا جۇمسالعان جالپى شىعىن كولەمى جالپى ىشكى ءونىمنىڭ 3،7 پروسەنتىن قۇرادى. دەنساۋلىق ساقتاۋ سالاسىنا جۇمسالاتىن شىعىن جالپى ىشكى ءونىمنىڭ 6 پروسەنتىن قۇرايتىن، دامۋ جاعىنان قازاقستان ءتارىزدى ەلدەرگە قاراعاندا، بۇل اناعۇرلىم تومەنىرەك كورسەتكىش. قازاقستاندا 2017 جىلدىڭ قورىتىندىسى بويىنشا دەنساۋلىق ساقتاۋ سالاسىنا جۇمسالعان شىعىندار 41 پايىزدى قۇرادى، بۇل شەكتىك دەڭگەيدەن ەكى ەسە جوعارى. سونىمەن قاتار جەكە شىعىنداردىڭ 30 پروسەنتتەن استامى كەپىلدەندىرىلگەن تەگىن مەديسينالىق كومەك كولەمى شەڭبەرىندە ماعلۇمدالعان اقىلى مەديسينالىق قىزمەتتەردى ساتىپ الۋعا جۇمسالادى.

قازاقستاندا نەگىزگى دەموگرافيالىق ترەند رەتىندە ءومىر ءسۇرۋ ۇزاقتىعى، تۇرعىنداردىڭ جاس-جىنىستىق قۇرامىنىڭ وزگەرۋى قاراستىرىلادى. ەلىمىزدە 2006 جىلدان بەرى ءومىر ءسۇرۋ ۇزاقتىعى 6،3 جىلعا ۇلعايدى، بۇل كورسەتكىش كەلەشەكتە وسەدى دەپ بولجانىپ وتىر. الداعى ۋاقىتتا مەديسينالىق قىزمەتتەردى بەلسەندى تۇتىنۋشىلاردىڭ سانى ارى قاراي وسەدى دەپ كۇتىلۋدە. 2025 جىلعا قاراي قازاقستاندا بالالار سانى 5،6 ميلليوننان 6،9 ميلليون ادامعا دەيىن، ياعني 23 پروسەنتكە وسەدى دەپ بولجانىپ وتىر. سونىمەن قاتار ەگدە جاستاعى ادامدار سانى 41 پروسەنتكە 1،9-دان 2،8 ميلليون ادامعا دەيىن وسەدى. وسى تۇرعىدا وتاندىق دەنساۋلىق ساقتاۋ سالاسى تۇرعىنداردىڭ قاجەتتىلىكتەرىن تولىعىمەن قامتاماسىز ەتۋى ءتيىس. 

مىندەتتى الەۋمەتتىك مەديسينالىق ساقتاندىرۋدى ەنگىزۋ دەنساۋلىق ساقتاۋ جۇيەسىن قارجىلاندىرۋ ءۇشىن قوسىمشا قۇرالداردى ەنگىزۋدى قاراستىرادى، ياعني، ءوز تاراپىنان ازاماتتاردىڭ ءال-اۋقاتىن جوعارىلاتۋ مەن قازاقستانداعى ءومىر ساپاسىن جاقسارتۋعا سەپتىگىن تيگىزەدى.

مۇرات راحيمجانوۆ