مەنى ىلعي ءاليحان اتامىزدىڭ ليبەرالدىق-دەموكراتتىق ۇستانىمدارى تولعاندىرادى. ويتكەنى، ءحىح عاسىردىڭ سوڭى مەن حح عاسىردىڭ باسىنداعى جالپى رەسەي جەرىندەگى ليبەرالدىق قوزعالىستار جاعدايىندا دەموكراتيالىق قاعيدالاردى جاريالاۋ اركىمنىڭ بولماسا دا، كوپشىلىك ينتەلليگەنتتەردىڭ قولىنان كەلەتىن. ءبىراق، جاي عانا ماقالالار مەن پەتيسيالاردا، باياندامالار مەن پارتيالىق تۇعىرنامالاردا سولاردى جاريالاۋ بار دا، ونى ومىرلىك ساياسي پروسەستە قولدانۋ بار. ەكەۋىنىڭ اراسى، - اڭعارىپ قاراعان ادامعا، - جەر مەن كوكتەي. الەكەڭدەر الاشوردانىڭ بيلىگىن قولعا الىپ، سەمەيگە كەلگەندە، قارقارالى ازاماتتارى پاتشا زامانىندا قۋعىن-سۇرگىن ۇيىمداستىرعان بولىستاردى جازالاۋدى ۇسىنىپتى. الەكەڭنىڭ ءىنىسى سماحاننىڭ ەستەلىگىنشە، «الەكەڭ كەك قۋماڭدار» دەپ ءدۇيىم ەلدى توقتاتقان. جاڭا بيلىك ۋاقىتىندا «كەك قۋماڭدار» دەگەن ءبىر اۋىز ءسوزدىڭ استارىندا مىڭداعان ادامداردىڭ تاعدىرىن شەشەتىن سالماق بار. بۇل جەردە الەكەڭنىڭ كىسىلىك كەلبەتىنىڭ دە ءبىر قىرى جاتىر. الەكەڭنىڭ 1913 جىلى «قازاق» گازەتىنە جازعان «ۇيات-اي» دەگەن ماقالاسى دا ادامشىلىق بيىگىنىڭ قانشالىقتى تەرەڭگە كەتكەنىن كورسەتەدى. ابىل مەن قابىلدى ەسكە الادى. ءاليحان بۇل زاماندا بەينەلەپ ايتقاندا، ۇلتتىڭ اكەسى، زيالى قاۋىمنىڭ تاربيەشىسى بولدى. سول بيىگىن مىندەتسىمەي، حالقىنا كىنا ارتپاي، ۇلتىنىڭ ارلى كوشباسشىسى بولدى. ساياساتتا اشىق كۇرەسكە شىقتى، جاۋىنىڭ وزىنە ءادىل بولۋعا بارىن سالدى. الەكەڭنىڭ 150 جىلدىعىنا 1 جىل عانا ۋاقىت قالدى. كەلەر جىل الەكەڭنەن پۇت جاساۋ ەمەس، شىن مانىندە ءاليحانتانۋ، الەكەڭنىڭ ادامي كەلبەتىن تانۋ، ساياسي جولىن ۇعىنۋ، الەكەڭنىڭ اماناتتارىنان وي قورىتۋ جىلى بولادى دەپ ۇمىتتەنەمىن.

(بولات ءمۇرسالىمنىڭ فەيسبۋكتەگى پاراقشاسىنان)