«نۇر وتان» پارتياسىنىڭ حاتشىسى تامارا دۇيسەنوۆا قازاقستانداعى مەنينگوكوكك ينفەكسياسىنا بايلانىستى دەنساۋلىق ساقتاۋ مينيسترلىگىن سىنعا الدى دەپ حابارلايدى Qamshy.kz اقپارات اگەنتتىگى.

تامارا دۇيسەنوۆا بۇل تۋرالى «نۇر وتان» پارتياسىنىڭ ورتالىق اپپاراتىنىڭ وتىرىسىندا باياندادى. جيىن بارىسىندا پارتيا حاتشىسى دەنساۋلىق مينيسترلىگىنىڭ وكىلدەرى مەن وڭىردەگى باسقارمالاردىڭ جۇمىسىن نازارعا الدى.

"جيىنعا قاتىسىپ وتىرعانداردىڭ بارلىعى ءوز ءىسىنىڭ بىلىكتى ماماندارى. مەن بارلىعىڭىزدى جاقسى بىلەمىن. بىرگە جۇمىس ىستەدىك. ۇلكەن شارۋالار اتقاردىق. الايدا بۇگىن كوڭىلدەرىڭىزدى قالدىرۋىم مۇمكىن. سىزدەر ۇلكەن پروبلەماعا تاپ بولدىڭىزدار جانە ءالى دە بۇل ماسەلەنى شەشەتىن شامالارىڭىز جوق"، - دەدى تامارا دۇيسەنوۆا.

"بىرىنشىدەن، سىزدەر قاداعالاپ وتىرعان مەكەمەلەردە ءتارتىپتىڭ جوقتىعى بايقالىپ قالدى. بۇل ءسىز قاداعالايتىن ۇيىمدارعا قاتىستى، الەكسەي ۆلاديميروۆيچ"، - دەدى تامارا دۇيسەنوۆا دەنساۋلىق ساقتاۋ ۆيسە-مينيسترى الەكسەي سويعا.

بۇرىنعى دەنساۋلىق ساقتاۋ جانە حالىقتى الەۋمەتتىك قورعاۋ ءمينيسترىنىڭ پىكىرىنشە، (ەسكەرتۋ:كەيىنىرەك - حالىقتى الەۋمەتتىك قورعاۋ ءمينيسترى) جۇقپالى اۋرۋلارعا بايلانىستى قىراعىلىق تومەنگى دەڭگەيدە.

"وسى نارسەلەر دەنساۋلىق ساقتاۋ جۇيەسىنىڭ جۇمىسىنا كەرى اسەرىن تيگىزەدى. مەن 24 ساعات مەديسينالىق كومەك كورسەتەتىن دارىگەرلەردىڭ قاتارىندا بىلىكتى ماماندار جوق دەگەن پىكىردەن اۋلاقپىن. بارلىعىنا جالپىلاما باعا بەرۋ دۇرىس ەمەس. الايدا بىزدەگى جاعداي اتالعان ەكى پروبلەمانىڭ ۋشىعىپ تۇرعانىن ناقتىلاپ بەردى"،- دەدى دۇيەنوۆا.

"مەنينگيت ينفەكسياسىنىڭ ءورشۋى بيىل عانا ۋشىققان پروبلەما ەمەس. بۇل جىل سايىن كوتەرىلەتىن ماسەلە. جۇقپالى اۋرۋدىڭ جاڭا ءتۇرى پايدا بولىپ، كۇرەسۋ جولدارى بەلگىسىز بولسا تۇسىنەر ەدىم. ماسەلە ءبىزدىڭ مۇنداي جاعدايدا قالاي ارەكەت ەتۋدى بىلمەيتىندىگىمىزدە"، - دەدى پارتيا حاتشىسى.

سونىمەن قاتار، تامارا دۇيەنوۆا 2015 جىلى مەنينگيت بويىنشا 424 جاعداي تىركەلگەنىن، الايدا ادام ءولىمىنىڭ دەڭگەيى تومەن بولعانىن اتاپ ءوتتى.