«زەينوللا سانىك جانە ۇلتتىق رۋح». ءدال وسىنداي اتاۋمەن سەمەيدەگى وبلىستىق اباي اتىنداعى امبەباپ كىتاپحاناسىندا بەلگىلى جازۋشى، ەتنوگراف، پۋبليسيست، قازاقستان جازۋشىلار وداعىنىڭ، سونداي-اق، جۇڭگو مەملەكەتتىك جازۋشىلار قوعامىنىڭ مۇشەسى زەينوللا سانىك پەن ونىڭ جارى ءشامشابانۋ حامزا قىزىنىڭ كوپ تومدىق شىعارمالار جيناعىنىڭ تانىستىرىلىمى ءوتتى.

قازاقتا ۇلت رۋحانياتىنا قىزمەت ەتكەن جاندار جەتەرلىك. اسىرەسە بۇعان ارعى بەتتەن كەلگەن اعايىندار وراسان ۇلەس قوستى. وسى رەتتە زەينوللا سانىكتىڭ ورەسى بيىك. ول قۇنداقتالعان قۇندىلىقتاردى تىرنەكتەپ جيناقتاپ، ۇلتتىق مادەنيەتتىڭ جاڭعىرۋىنا سەپتەسكەن نارتۇلعا. جازۋشىنىڭ «قاراكەرەي قابانباي»، «حاس باتىر قابانباي»، «تۇعىرىل حان»، «دەمەجان باتىر»، «حالىق كۇيشىسى قايراقباي» جانە «باسپاي» سىندى ىرگەلى ەڭبەكتەرى تالعامپاز وقىرماننىڭ جوعارى باعاسىن الدى.

-بىرىنشىدەن زەينوللا سانىك جازۋشى دەيتىن بولساق، ول كىسى 20-دان اسا اڭگىمە، 4 حيكايات جانە 2 رومان جازعان. ال فولكلور تانۋشى رەتىندە قازاقستاندا جوق ماتەريالداردى قىتايدا جيناپ، زەرتتەپ ەلگە اكەپ، جارىققا شىعاردى. مىسالى مىنانداي جاعداي بولدى. الماتىدا ماقسۇت شافيعي دەگەن عالىممەن اڭگىمەلەسىپ وتىرىپ، قابانباي باتىردىڭ 300 جىلدىق مەرەيتويىنا وسى زەينوللا اعادا اتسالىسقانىن ءبىلدىم. ماسەلەن قازاقتىڭ باس باتىرىنا ارنالعان اڭىز-جىردىڭ بارلىعى قىتايدا ساقتالعان ەكەن. ونى ەلگە اكەلىپ، ناسيحاتتاعان بىردەن-بىر تۇلعا وسى زەينوللا سانىك. بۇدان بولەك، ول كىسى ەتنوگرافيا سالاسىنا ايتارلىقتاي ۇلەس قوستى. ۇمىت بولعان سالت-داستۇرلەردى جاڭعىرتتى دەسەم قاتەلەسپەيمىن. سول سەكىلدى قازاقتىڭ ءداستۇرلى ەمشىلىك ونەرى جايلى دا تولىمدى ەڭبەكتەر قالدىردى، — دەيدى سۇلەيمەن دەميرەل اتىنداعى ۋنيۆەرسيتەتتىڭ دوسەنتى، فيلولوگيا عىلىمدارىنىڭ كانديداتى جولداسبەك مامبەتوۆ.