بەۋ تالگو، تالگو،

زىمىرا تەك العا.

قاناتىڭ – قارا جەر،

شارشاما، سەن تالما.

بەۋ تالگو، تالگو،

جۇردەكسىڭ جولدا.

ەكى جەر اراسىن،

جەلى بوپ سەن جالعا.

زۋلا، سامعا، تالما،

بەۋ تالگو، تالگو...

بۇل كۋپە ىشىندە وتىرىپ، زۋ-زۋ ەتىپ ارتىمدا قالىپ جاتقان دالاعا قاراپ ىڭىلداپ ايتقان ءان سىماعىم. جۇردەك پوەزد قانشا جىلدام بولسا دا، سوڭىنان قۋىپ، ءتونىپ كەلە جاتقان ىمىرت قۇشاعى  ونى قۇتقارار ەمەس...

اياداي عانا كۋپەدە ءتورت جانبىز. ءوزىم، ايەلىم جانە ەكى قىزىم. شاعىن ۇستەل ۇستىندەگى ءتۇرلى اس-داممەن كەشكى شايىمىزدى ءىشىپ، كوڭىلدى وتىرمىز. باعىتىمىز – الماتى - شىمكەنت. ارى قاراي سارىاعاش ساناتوريالارى. ءبىز مىنگەن “011X” پويىزىنىڭ ءىشى مۇنتازداي تازا، ءارى رەتتى. جولسەرىك ەكى ورىمدەي قازاق جىگىتتەرى كىشى پەيىلدىلىك تانىتىپ قىزمەت كورسەتىپ ءجۇر. تەك كاريدورى انتەك تارلاۋ جانە ءار كۋپەدە اۋا جەلدەتكىشتى قالاۋىڭىزشا رەتتەيتىن تەتىگى جوق. ءبىر ۆاگوندا ءبىر عانا ايىرىپ-قوسقىش، ونى جولسەرىك قانا اشىپ-جابا الادى ەكەن. ال شىمكەنتتەن الماتىعا قايتقانىمىزدا مىنگەن “050س” تالگو پويىزىنىڭ 08 كۋپەسىنىڭ تازالىعى ونداي بولمادى. سودان بولار قايتارىمدا “تالگو” ءانىمدى ايتا المادىم...

تاڭ اتا شىمكەنتكە جەتتىك، شامامەن باس-اياعى 11 ساعات جۇردىك-اۋ. شىمكەنتتەن سارىاعاشقا دەيىن ءبىر تاكسيدى 7000 تەڭگەگە الدىق.تاكسيدىڭ باعالارى دا 6000-8000 ارالىعىندا كورىنەدى. ەكى اراسى 130 شاقىرىم شاماسىندا ەكەن. ءبىر جارىم ساعاتقا جەتەر-جەتپەس ۋاقىتتا جەتىپ الدىق.

الماتىدان اتتانباس بۇرىن، ينتەرنەت ارقىلى سارىاعاش ساناتوريالارىن ءبىر رەت “ءسۇزىپ” شىعىپ، ەم-دومى، جاتىن ورىن جاعدايى، تازالىعى، قارجىمىزدىڭ كولەمى دەگەندەيىن ولشەمدەرىمىزگە ساي كەلەدى-اۋ دەگەن ويمەن “اق جايىق” ساناتورياسىن كوڭىلىمىزگە بۇگىپ كەلدىك. تاكسي دىتتەگەن جەرىمىزگە جەتكىزدى. اۋلاسى اسا ۇلكەن بولماسا دا، مۇنتازداي تازا، ادەمى گۇلدەرمەن كومكەرىلگەن، سايالى اعاشتارى قاز-قاتار ساپ تۇزەگەن، ەسىكتىڭ الدى مەن باقشانىڭ اراسىنداعى سايالى جول جاعالارىنا قويىلعان ارقالى ۇزىن ورىندىقتار ءبارى دە جاراسىمدىلىق تاۋىپ الدە كۇدىك، الدە ۇمىتپەن كەلگەن الابۇرتقان كوڭىلىمىزدى بىردەن جادىراتىپ جىبەردى. ماڭدايىنا “اق جايىق” دەگەن ۇلكەن جازۋى بار ەڭسەلى ءۇش قاباتتى ۇيگە كىرگەنىمىز سول ەدى، اۋاسى كەڭ، جيھازدارى ادەمى كىرە بەرىستە المات ەسىمدى جاس جىگىت الدىمىزدان شىعىپ، جىلى جۇزبەن امانداسىپ، حال-جاعدايىمىزدى سۇراپ جاتتى. ءبىزدى ەرتىپ بولمەلەرىن، اسحاناسىن، استىڭعى قاباتتاعى ەمدەۋ-ساۋىقتىرۋ ورىندارىن كورسەتتى. نە كەرەك ءبارى كوڭىلىمىزدەن شىقتى. ءبىرىنشى قاباتتاعى ليۋكس بولمەسىنە ورنالاستىق. اۋەلدە “بىرەر كۇن كورەيىن، بولماسا باسقا ساناتوريالارعا بارايىن” دەگەن باسىمداعى كۇماندى وي، كورگەن سوڭ “ءىزىن سۋىتتى”. سودان ەش ەككىلەنبەستەن  اقشامىزدى ءبىر جولاتا تولەدىكتە ورنالاستىق.

ەكى بولمەلى ليۋكس ءىشى تاپ-تازا، قىمبات جيھازدار، ادەمى كىلەمدەر مەن پەردەلەر كوڭىل-كۇيىڭدى ودان بەتەر كوتەرە تۇسەدى. ايەلىم مەن قىزدارىم تىپتەن ءماز. ءار كىمى ءبىر-بىر شيفان يەلەپ، ءوز كيىمدەرىن جايعاستىرا باستاعان، جۇزدەرىنەن ريزاشىلىقتىڭ لەبى ەسەدى. كەنەت مۇزداتقىشتىڭ ۇستىندەگى تەلەفون شىر ەتە قالدى. كوتەرىپ ەدىم، ارعى جاقتان نازىك قىز داۋىسى:

– سالەمەتسىز بە اعاي، قوش كەلدىڭىزدەر. ءقازىر تاڭعى اس مەزگىلى، سىزدەر اسحاناعا كەلەسىزدەر مە، الدە بولمەلەرىڭىزگە جەتكىزىپ بەرەيىك پە؟-دەدى جىلى لەبىزبەن. مەن مويىنىمدى بۇرىپ بالا-شاعامنان سۇراپ ەدىم:

– اكە، وسىندا اكەلسىن دەپ ايتىڭىز-دەپ ەكى كىشكەنە قىزىم اناسىنان بۇرىن جاۋاپ بەرىپ ۇلگەردى. سونىمەن ءتورت دوڭگەلەكتى رازنوسقا سالىنعان  شاعىن اس ءمازىرى بولمەمىزگە كەلدى. تاڭعى استارى تويىمدى، ءارى ءدامدى ەكەن. اس ۇستىندە باستاۋىشتا وقيتىن قىزدارىمنان سۇرادىم:

– تاڭعى استى نەگە بولمەگە الدىردىڭدار - دەپ. ول ەكەۋى:

– كينودان كورەمىز عوي، ومىردەن دە كورەيىك دەدىك - دەپ سىقىلىقتاپ كۇلەدى. استان سوڭ، استىڭعى قاباتتاعى ەمدەۋ-ساۋىقتىرۋ ورنىنا باردىق. ءبىزدى  ۋلحودجايەۆا كۋليپا ەرمانوۆنا ەسىمدى ورتا بويلى، بيداي ءوڭدى وسى ساناتوريانىڭ باس دارىگەرى ءوزى قابىلدادى. ءبارىمىزدى مۇقيات تىڭداپ، ءتيىستى ەم-دومىن جازىپ بەردى. ءبىز بولمەمىزگە كەلىپ، ۇستىمىزگە تازا حالاتتارىمىز بەن ۇلكەن اق سۇلگىلەرىمىزدى الىپ (ەرەسەكتەرگە حالات بەرىلەدى، ال بالالارعا بەرىلمەيدى) ەم قابىلداۋدى باستاپ كەتتىك.

تۇسكى ساعات 13-00 -دە تۇسكى اس دايىن بولدى. تاڭعى استاعىداي تۇسكى استا بولمەمىزگە جەتكىزىلدى. جاقسىگۇل ەسىمدى بۇل قىزمەتشى قىزدىڭ ءجۇزى دە، ءسوزى دە جىلى ەكەن. قىزدارىمىزدى ەركەلەتىپ قويادى. تۇسكى استان سوڭ، ازداپ مىزعىپ الىپ، تۇستەن كەيىن سارىاعاشتىڭ مينەرالدى سۋىنىڭ ۆانناسىنا بارىپ “سۇڭگىدىك”. ۇلكەن، ەرەسەك ادام ەمەن-ەركىن سياتىن ۆاننا بولمەلەرىنىڭ ماڭدايشاسىنا ىستىق ۆاننانى قابىلداۋعا قاتىستى ەسكەرتپەلەر جازىلعان ەكەن. شاماسى 10 مينۋت ارتىق جاتپاۋ ەسكەرتىلىپتى.  ال ۆاننانى ءوزىڭ كەلگەنشە دايىنداپ قوياتىن قىز-جىگىتتەر ىزەتتىك تانىتىپ:

– كورىڭىز اعا، سۋ ىستىق پا الدە قالىپتى ما؟ - دەپ قيىلا سۇرايدى. قولىڭدى مالىپ كورىپ، ىستىق الدە سالقىن ەكەنىن ايتاسىڭ. ءبىرى ىستىق ەكىنشىسى سالقىن سۋ اعاتىن شۇمەكتى اعىتىپ، قولايىڭىزعا قاراي رەتتەپ بەرەدى دە:

– ەم بولسىن اعا! - دەپ شىعىپ كەتەدى. باسقانى بىلمەيمىن وزىمە ەڭ ۇناعان ەم ءتۇرى وسى ىستىق ۆاننا بولدى. ماپ-مايدا، جىبەكتەي جۇمساق، جىلى سۋ دەنەڭدى ءبىر ءتۇرلى راحاتقا بولەپ، ماۋجىراتىپ جىبەرەدى. سۋدىڭ ءبارى دە جۇمساق ءبارى دە ءمولدىر-اق، الايدا، سارىاعاشتىڭ مينەرالدى سۋى ەرەكشە جايلى سەزىلدى ەكەن.    ساعات 16-00 -دە جۇرەك جالعار بەرىلەدى ەكەن. ءيىسى مۇرىن جارارداي ادەمى سامسا نەمەسە پيسسا بولماسا سول سەكىلدى ءتاتتى توقاشتار بەرىلەدى.  اس ۇستىندە مەن بالا-شاعامنان:

– سەندەر قانداي ەم ءتۇرىن قابىلدادىڭدار دەپ سۇرادىم. الدىمەن كەنجە قىزىم جاۋاپ بەردى:

– اكە ماعان ماسساج ۇنادى، باسىمنان اياعىما دەيىن ءبىر تاتە جاقسى جاساپ بەردى. ونان سوڭ كوكتەيل ۇنادى-دەدى كوزدەرى كۇلىمدەپ.

– ال ماعان، ماسساج بەن كوكتەيلدەن وزگە، سيركۋليارنىي دۋش ۇنادى-دەدى ۇلكەن قىزىم. ال ساعان شە؟-دەپ ءجۇزىمدى ايەلىمە بۇردىم.

– ماعان ءبارى ۇنادى. اسىرەسە اياعىما قويعان پارافيننىڭ ىستىعى بۋىن-بۋىنىما جەتىپ، راحاتتانا وتىرىپ تەرلەدىم. ودان سوڭ كيشەچنوە وروشەنيە العان سوڭ ءتىپتى جەڭىلدەپ سالا بەردىم. ولاردىڭ جۇزىنەن شىنايى ريزاشىلىقتىڭ نىشانىن كورىپ، ءوزىم دە قۋانىپ قالدىم.

– اكە سىزگە شە، قايسىسى ۇنادى؟- دەپ ەكى قىزىم كەزەك-كەزەك سۇراق قويدى. مەن ولاردىڭ كوتەرىڭكى كوڭىلدەرىن اۋەلەتىپ:

– ماعان ەڭ ۇناعانى  - سەندەردىڭ قۋانعان كوڭىلدەرىڭ دەدىم، ولاردىڭ باسىنان سيپاپ.

تۇستەن كەيىنگە “جۇرەك جالعار”-دان سوڭ بالالارىم سايا باقتاعى اتپەنشەكتە ويناپ، ءبىز وزگە قوناقتارمەن تانىسىپ، اڭگىمەلەسىپ كەتتىك. كەشكى ساعات 7-00 -دە كەشكى اسىمىزدى ىشتىك. تاماعى ءدامدى، شايدىڭ ءتۇر-تۇرى، كومپوت تا بار، كوڭىل قالاۋىڭىزدى ايتساڭىز بولدى، ەلپىلدەگەن كۇتۋشى قىز-جىگىتتەر لەزدە سۇراعانىڭىزدى دايىن ەتە قويادى. ءبارىنىڭ ايتارى ءبىر ءسوز - “اس بولسىن !”. سوندا سۇراپ بىلگەنىم اسقا قاجەتتى كوكونىستەردى دە، ەت-سۇت ونىمدەرىن دە وزدەرىنىڭ اۋىل شارۋاشىلىق فەرمالارىنان اكەلەدى ەكەن. بۇل دا اس ءمازىرىنىڭ باي ءارى ءدامدى بولۋىنىڭ ۇلكەن سەبەبى بولسا كەرەك. 

ۇيىقتارعا جاقىن قويۋ ۇيىتىلعان ايران جەتكىزىلەدى. سونى ءىشىپ الىپ، ۇيقىعا باس قويدىق. ءبىزدىڭ العاشقى كۇنىمىز مىنە وسىلاي ءوتتى.

ەرتەسى تاڭعى ساعات 6 جارىمدا تەلەفون شىر ەتە قالدى. كەشكىسىن دارىگەر ەسكەرتكەن بولاتىن، ەرتەڭگىسىن سىزدەرگە تيۋباج جاسايمىز-دەپ سول بويىنشا ايەلىم بارىپ، تيۋباجدىڭ سۇيىق دارىسىمەن ىستىق مينەرالدى سۋ الىپ كەلدى. ءبىز ءىشىپ الىپ، وڭ جاق قىرىمىزبەن باسىمىزدى انتەك بيىك ەتىپ جاتتىق، ءار 15 مين. سايىن ءبىر ستاكان جىلى مينەرالدى سۋ ءىشىپ تۇردىق. وسىلايشا 3 مارتە قايتالاعان سوڭ ورنىمىزدان تۇرىپ، جۋىنىپ-شايىنىپ، تاڭعى اسىمىزعا باردىق.

اركىمنىڭ قابىلدايتىن ەم-دومى نەگىزىنەن قارايلاس. ءبىراق كەلگەن كۇنى ۋزي-عا ءتۇسىپ جالپى دياگنوزىڭدى اجىراتقان سوڭ، سوعان قاراي ەم قابىلداۋدى باستايسىڭ. ءاربىر بولمەنىڭ بوس بولۋىنا قاراي رەتىمەن پروسەدۋرادان وتە بەرەسىڭ. مەن ءوزىم الدىمەن تۇيمەداق گۇلىمەن ينگالياسيا الامىن، ودان سوڭ ەلەكتروفورەز، پارافين الامىن، سول پارافين العان جەرىمە ماسساج قابىلدايمىن. ونىڭ دا وزىندىك سەبەبى بار، پارافين دە، ماسساج دا دەنەڭىزدىڭ ءبىر اۋماعىنا عانا تەگىن، ال ەكىنشى ايماعىنا اقىلى نەگىزدە بولادى. (پارافين 500 تەڭگە، ال ماسساج 1000 تەڭگە). ءوز ويىمدا پارافيننەن سوڭ دەنەڭ جۇمساپ تۇرادى عوي، مىنە سول كەزدە ماسساج الساڭ راحاتتانادى ەكەنسىڭ.   ماسساج جاسايتىن ەركىن ەسىمدى جىگىتتىڭ قولى ەپتى، مىنەزى جىبەكتەي جىگىت. ول “جاۋىرىن تۇسىنا جينالعان تۇز بار ەكەن اعا، وعان بال جاقسى كومەكتەسەدى”- دەپ بالمەن ماسساجىن جاساپ سەرگىتىپ تۇردى.  ماسساجدان سوڭ فيتو بارعا  كەلىپ، جۇمساق ورىندىقتارعا جايعاسىپ وتىرىپ ىستىق نەمەسە سالقىن سۋدى، بولماسا قايناعان دارىلىك شايدى ءىشىپ، اڭگىمە دۇكەن قۇراسىڭ. قايناتىلىپ ارناۋلى ىدىسقا قۇيىلعان شاي ءار ءتۇرلى. كۇننىڭ بەلگىلى ۋاقىتتارىندا وتكە،  بۇيرەككە ارنالعان شاي، بالانس شاي، يتمۇرىن شايى، گينەكولوگيالىق شاي، جۇيكەنى تىنىشتاندىراتىن شاي كەزەكتەستىرىپ بەرىلەدى. ءبىر بايقاعانىم، مينەرالدى سۋدى قانشا ىشسەڭ دە ىشە بەرەتىن كورىنەسىڭ. ال تاماقتانار الدىندا مىندەتتى تۇردە جارتى ساعات بۇرىن ءبىر ستاكان جىلى مينەرالدى يسۋ ىشەمىز. شايدان سوڭ لازەرلىك ەمدەۋ بولمەسىنە باسىمدى سۇعامىن. مەيىربيكە توسەككە ەتپەتىمنەن جاتقىزىپ، بۇيرەگىمنىڭ تۇسىنا، حالاتتىڭ سىرتىنان ارناۋلى اپاراتىن قويادى. ەكى بۇيرەككە كەزەك-كەزەك ءار قايسىنا 5-6 مين. شاماسىندا ەم الامىن. ول بۇيرەكتى قۇم-تۇزداردان ارىلتادى ەكەن. وسى بولمەنىڭ ىشىندە اياققا ارنالعان ماسساجور بار. سوعان ەكى اياعىڭدى سۇعىپ تابانىڭ مەن اياعىڭا ماسساج الاسىڭ، مىنە وسى كەزدە ءبىر ستاكان مينەرالدى سۋ ءىشۋ كەرەك. ول جاڭاعى لازەردەن بوساعان قۇم-تۇزداردى ايداۋعا كومەكتەسەدى. بۇل بولمەدەن  شىققان سوڭ  اۋىز-قۋىسىن، ءتىس پەن قىزىل يەكتى تازالايتىن بولمەگە كەلەمىن (ءبىر ەسكەرەتىن جاعداي تىستە كەراميكا نەمەسە پلومبا بولسا بولمايدى، ويتكەنى ولار ءتۇسىپ قالادى ەكەن). تىستەن سوڭ، جايعاسىپ وتىرىپ، ەلەكتر تاراقپەن (دارسەنۆال)  باسىمدى تارايمىن. ول جۇيكە جۇيەسىن تىنىشتاندىرادى ەكەن. مىنە ءبىر كۇندە قابىلدايتىن ەم-دومدار نەگىزىنەن وسىلار. ال تيۋباج بەن ىشەك تازالاۋ ءبىر كۇنگە قويىلمايدى ەكەن. جالپى ءبىر جەتىگە ەم الاتىن ادامدار ءۇشىن ءار ەكەۋى ەكى مارتەدەن اسپايتىن كورىنەدى. ەمنىڭ تاعى ءبىر ءتۇرى فيتو بوچكا. ول دەنەسىندە سۋىعى كوپ ادامدارعا ارنالعان دۇنيە سەكىلدى. ەسكەرەر تۇس - جۇرەگى ءالسىز، قان قىسىمى جوعارى ادامدار بايقاپ قابىلداعانى ءجون. 

الماتىدان كەلگەن كۇنگى جۇردەك پوەزدىڭ جەلدەتكىشىنەن بولدى ما، جوق الدە جۇگىمدى كوتەرەمىن دەپ اۋىرتىپ الدىم با بىلمەيمىن، سارىاعاشقا كەلگەلى بەلىم اۋىرىپ ءجۇردى. وسى جاعدايىمدى ايتۋعا دارىگەر بولمەسىنە كەلسەم، كەزەكشى دارىگەر ۆەنەرا تۇردىمۇراتوۆنا بار ەكەن. ول كىسى جىلى قابىلداپ، جاعدايىمنان حاباردار بولعان سوڭ، بىرنەشە ۋكول سالۋدى بۇيىردى. دارىگەردىڭ ءسوزىن قالت ەتكىزبەي ورىندايتىن مەيىربيكە مادينا سەرىك قىزى ەش اۋىرتپاستان ۋكولىمدى سالىپ بەردى. ءتۇسى سونداي جىلى قىزدىڭ جۇرەگىنە تەك مەيىرىم ۇيالاعانداي قاشان كورسەڭ دە كۇلىپ جۇرەدى. كومەك ەتۋگە دايىن تۇرادى. ودان كەيىنگى كۇندەرى دە كەشكىسىن ۋكولىمدى جاتىن بولمەمە كەلىپ ءار كۇنگى كەزەكشى مەيىربيكەلەر سالىپ تۇردى. ءبارى دە ءوز ىستەرىنىڭ شەبەرى ءارى وتە بيازى مىنەزدى جاندار ەكەن، ريزا بولدىم.

وسىندا ءبىر بايقاعانىم، كەلگەن قوناقتاردىڭ از-كوپتىگىنە قاراي، قىزمەتكەرلەردىڭ دە سانى رەتتەلىپ وتىرادى ەكەن. سوندىقتان بولار، بۇنداعى قىزمەتكەرلەر بارلىق ءبولىمنىڭ جۇمىستارىن اتقارا بەرەتىن سەكىلدى. ورتا بويلى، تالدىرماش جاس جىگىت  - ءدىلمۇرات (ەل-جۇرت ديماش دەپ اتايدى) انە سونداي ەلگەزەك، ەڭبەكقور جىگىت ەكەن. ءبىز بارعاننان كەتكەنگە دەيىن ۇنەمى سول قىزمەتتە بولدى. قاي بولىمگە باس سۇقساڭ دا الدىڭنان كۇلىپ ديماش شىعادى.

بىردە دالىزدە وتىر ەدىم، سۇڭعاق بويلى، يىقتى كەلگەن كەلىستى ەر كىسى كەلىپ امانداستى. سويلەسە كەلە وسى ساناتوريانىڭ ديرەكتورى دۇزەلباي نۇرتاي ۇلى بولىپ شىقتى. قىزمەتكەرلەردىڭ جۇمىسىن، قوناقتاردىڭ جاعدايىن بىلمەككە كەلگەن كەلىسى ەكەن. اڭگىمە بارىسىندا ساناتوريانىڭ بارلىق قىزمەت تۇرلەرىنە، قىزمەتكەرلەرىنە ريزا ەكەنىمدى ايتتىم. ول كىسى جىميىپ ەزۋ تارتتى دا:

– ارينە، سىزدەردىڭ ريزاشىلىقتارىڭىز ءبىز ءۇشىن ەڭ باستى ماراپات جانە مىندەت. دەسەدە، كوڭىلدەرىڭىزدەن شىقپاي قالعان، بولماسا، ۇسىنىستارىڭىز بولسا دا، ايتا وتىرىڭىز، ول ءبىز ءۇشىن قىمبات. ءبىز سىزدەردىڭ پىكىرلەرىڭىز ارقىلى كەلەسى قوناقتارىمىزدىڭ العىسىنا بولەنەمىز - دەدى شىنايى، بايىپتى ۇنىمەن. ول الداعى جوسپارلارىمەن دە ءبولىستى. ساناتوريانىڭ قاسىندا جاپسارلاس سالىنىپ جاتقان قابات ءۇيدىڭ ءبىرىنشى قاباتى تولىقتاي اكىمشىلىك پەن اسحانا بولادى ەكەن، اللا قالاسا تامىز ايىنا دەيىن ءبىتىپ قالار -دەيدى. ال ونىڭ استىڭعى قاباتىنا بارلىق سۋمەن ەمدەۋ پروسەدۋرالارى كوشىرىلىپ، تۇز شاحتاسى اشىلاتىن كورىنەدى. دۇزەلباي نۇرتاي ۇلى ىسىنە جاۋاپتى، وزىنە سەنىمدى ازامات كورىندى. كاسىپكەر ءۇشىن سەنىمدىلىك پەن جاۋاپكەرشىلىك تاپتىرماس، باعالى قاسيەت ەمەس پە؟

ءبىر جەتى ۋاقىتتىڭ قالاي تەز سىرعىپ وتە شىققانىن سەزبەي دە قالدىق. جينالىپ دالاعا شىقتىق. ساناتوريانىڭ الدى سول جايقالعان كۇيى مولدىرەپ تۇر. ءبىز بولعان بيىلعى مامىر ايىنىڭ سوڭى مەن ماۋسىمنىڭ باسىندا كۇندە ىستىق ەمەس، مامىرجاي ءوتتى. ادامدار دا كوپ ەمەس، قالىپتى بولدى. قازاقستاننىڭ ءار تۇكپىرىنەن كەلگەن قوناقتارمەن قوشتاسىپ اتتانا بەردىك. ساناتوريانىڭ بەلگىلەمەسى بويىنشا شىمكەنتتەن وزدەرى كۇتىپ الىپ، ساناتورياعا تەگىن اكەلەدى ەكەن. ال ءبىز ءوزىمىز كەلگەندىكتەن قايتار جولىمىزعا جەڭىلدىك بەرىپ وزدەرى جەتكىزىپ سالماق بولدى. كولىك تەرەزەسىنەن سىرتقا كوز جىبەرگەن قىزدارىم:

– اكە، انا باسسەيىنگە تۇسە الماي ارماندا بارامىز- دەدى ساناتوريا الدىندا كوك تەڭىزدەي كوگىلدىر تۇسكە ەنىپ جاتقان تاپ-تازا باسسەيىندى نۇسقاپ.   - كۇن  سالقىن بولدى عوي - دەدى ايەلىم.

– ونىڭ دا قايىرى بار، ول ءبىزدى كەلەر جىلى تاعى كەلۋگە شاقىرىپ جاتىر-دەدىم كۇلىپ.

– الاقاي، كەلەسى جىلى تاعى كەلەمىز -دەپ بالالار قۋانا داۋىستادى.

ءقادىرلى وقىرمان دوستارىم، وسى جاسقا كەلگەنشە ءبىراز ەل مەن جەردى شارلادىم، سودان كورگەن، تۇيگەنىمدى قاعازعا ءتۇسىرىپ وتىراتىن ادەتىم قالىپتاسىپ ەدى. كەيبىرىن جاريالادىم، كەي ءبىرى قول جازبا كۇيىندە “شاڭ باسىپ” قالدى. “تەمىردى قىزۋىندا سوق”-دەگەندەي ساپاردان كەلە، كەشىكتىرمەي “مەن كورگەن سارىاعاشتىڭ اقجايىعى”-دەگەن وسى ساپار ەستەلىگىن جازىپ، الدە كىمنىڭ كادەسىنە جارار دەگەن ويمەن باسپا بەتىنە بەرىپ وتىرمىن. ارتىق تا، كەم دە ايتپادىم، تەك كورگەنىم مەن تۇيگەن اسەرىمدى عانا جازدىم. بىرەۋگە جارناما جاسايىن دەگەن ويىم دا جوق. ءبىراق سونداعى اق ەدىل قىزمەتكەرلەرگە العىس ايتقىم كەلەدى. اتام قازاق “جاقسىنىڭ جاقسىلىعىن ايت، نۇرى تاسىسىن”-دەمەي مە؟ بارشاڭىزعا شىنايى راحمەت !...

باسقا ەمەس، ەلىمىزگە تانىمال سارىاعاش ساناتوريالارى تۋرالى ىزدەگەنىمدە ءار ساناتوريانىڭ وزدەرىن جارنامالاعان بەينە-جازبالارى مەن سۋرەتتەرى، ارى كەتكەندە ءبىراز دەم الۋشىلاردىڭ كومەنتاريلەرىنەن وزگە ماردىمدى ەشتەڭە تاپپاعان ەدىم. بۇل جازعانىم كولگە تامعان تامشىداي بولسا دا، ىزدەگەن جانعا ءبىر سەپتىگىن تيگىزەر. الدا ناعىز دەمالىس كەزەڭى كەلە جاتىر، سىزدەر دە ساياحاتتاپ بارىپ جاتساڭىزدار، بارعان جەرىڭىز تۋرالى كورگەن-بىلگەندەرىڭىزدى جازىپ وتىرىڭىزدار، وقيتىن جان تابىلادى. باستىسى، دەمالىسىڭىز كوڭىلىڭىزدەن شىقسىن، امان-ەسەندىك جانىڭىزعا سەرىك بولسىن...   

قاستەر سارقىتقان