وزبەكستان بيلىگى پرەزيدەنتكە ارناپ ولەڭدەر جازۋعا، بەينەكليپتەر تۇسىرۋگە تىيىم سالدى. اتالمىش مالىمدەمە «وزبەككونسەرت» مەملەكەتتىك مەكەمەسىندە جاسالدى.

«وزبەككونسەرت» ديرەكتورى ازامات حايداروۆ ايتۋىنشا، مەملەكەت باسشىلارىنا كليپ ءتۇسىرۋ نەمەسە ولەڭ ارناۋ ەتيكاعا جاتپايدى.

بىرنەشە اپتا بۇرىن 49 جاستاعى ءانشى ءارى اكتريسا ديلفۋزا يسمايلوۆا پرەزيدەنتكە ارناپ «بۇل ادەمى مەكەننىڭ سۇلتانى امان بولسىن» دەگەن كليپ تۇسىرگەن. ۆيدەروليك YouTube ارناسىندا 21 مامىردا پايدا بولدى، الايدا كوپ ۇزاماي ونى ءوشىرىپ تاستاعان. ءاننىڭ سوزدەرى پرەزيدەنتتى «قۇدايدىڭ كولەڭكەسى ءارى سۇيىكتى ق ۇلى» رەتىندە كورسەتتى. بيلىكتىڭ مۇنداي شەشىم قابىلداۋىنا ءانشىنىڭ وسى ءانى سەبەپ بولعان.

ايتا كەتەيىك، بىرنەشە اي بۇرىن الەۋمەتتىك جەلىدە قازاقستاندىق اقىن بالتابەك نۇرعالييەۆتىڭ اتى جەر جارىپ تۇردى. ول پرەزيدەنت نۇرسۇلتان نازاربايەۆقا، ونىڭ اكەسى ابىشكە، اناسى ءالجانعا، قىزى داريعاعا جەكە-جەكە ولەڭ ارناپ، جەلىدەگى پاراقشاسىنا جاريالاپ تۇراتىن. ءتىپتى مەملەكەتتىك قىزمەت ىستەرى جانە سىبايلاس جەمقورلىققا قارسى ىس-اگەنتتىگىن ماداقتاپ جازعان وداسى دا جەلىگە تاراپ، حالىق اراسىندا قىزۋ تالقىلانعان. وقىرماندار بالتابەكتىڭ شىعارمالارىن قاتتى سىناپ، «جاعىمپازدىقتىڭ شىڭى» دەپ باعالادى. بۇل تۋرالى اقىننىڭ ءوزى ەلباسىنا دەگەن ىستىق ىقىلاسىن بىلدىرە وتىرىپ، دانىشپاندىعىنا يلاناتىنىن ايتقان. بۇعان قوسا «ەلدى نازاربايەۆتار ديناستياسى بيلەۋ كەرەك» دەپ قالىڭ جۇرتتى شالقاسىنان ءبىر تۇسىرگەن.