«ەكوسەرۆيس-س» ج ش س تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ تاپسىرىسى بويىنشا الماتى قالاسىنىڭ قورشاعان ورتا ساپاسىنىڭ نىسانالى كورسەتكىشتەرىن تانىستىردى، دەپ حابارلايدى Qamshy.kz اقپارات اگەنتتىگى. 

«ەكوسەرۆيس-س» ءجشس-نىڭ عىلىم جانە ساراپتامالىق زەرتتەۋلەر دەپارتامەنتىنىڭ ديرەكتورى ناتاليا ياكوۆليەۆا نىسانالى ينديكاتورلاردى تانىستىرۋ بارىسىندا الماتى قالاسىنىڭ ەكولوگياسىن زەردەلەۋ بويىنشا وسىنداي اۋقىمدى جۇمىستاردىڭ سوڭعى 10 جىلدا العاش رەت جۇرگىزىلگەنىن اتاپ ءوتتى.

ناتيجەسىندە قالانىڭ ەكولوگيالىق جاعدايىن باعالاۋعا كەشەندى ءتاسىل ەنگىزىلگەن. اتموسفەرالىق اۋا، جەر ءۇستى جانە جەر استى سۋلارى، وسىمدىك جامىلعىسى، توپىراق سىندى بارلىق سالالاردا تالداۋ جۇرگىزىلگەن. قالدىقتاردى وڭدەۋ جۇيەسىنە دە باعا بەرىلدى. اۋا لاستانۋىنىڭ اۋماقتىق ەرەكشەلىكتەرىن زەرتتەۋ قولعا الىنىپ، قورشاعان ورتا جاعدايىنىڭ تاۋەلسىز مونيتورينگى زەرتتەۋ بارىسى تالداندى.

«ەڭ باستى پروبلەما اتموسفەرالىق اۋانىڭ لاستانۋى بولىپ تۇر.  ءبىز قازگيدرومەتتىڭ 10 جىلعى دەرەكتەرىن تالدادىق. زەرتتەۋ جۇمىستارى قالا اينالاسىنا عانا ەمەس جاقىن ماڭداعى اۋماقتاردى دا قامتىدى. جالپى  اۋانىڭ لاستانۋ پروبلەماسى قالانىڭ بارلىق اۋماعىندا تىركەلسە، 12ء-شى ۋچاسكەدەگى رايىمبەك-ناۋرىزباي باتىر كوشەلەرىنىڭ اۋماعىندا اۋانىڭ لاستىعى بەلگىلى شەكتەن اسىپ كەتكەن»، - دەدى ياكوۆليەۆا.

«مونيتورينگ ناتيجەسىندە ايگەرىم 2، اقبۇلاق، شاڭىراق 1، شاڭىراق 5، حالىق ارەنا، وتەنەن باتىر، سەيفۋللين-رايىمبەك، بوكەيحانوۆ كوشەلەرى لاستانعان اۋماق تىزىمىنە ەندى. وتەگەن باتىر اۋىلىنا ەرەكشە نازار اۋدارۋ كەرەك، سەبەبى ول جاقتا جەس-3 ورنالاسقان» - دەدى سپيكەر.

«سونىمەن قاتار ءبىز ارنايى قۇرال ساتىپ الىپ، دالالىق زەرتتەۋ جۇمىستارىن جۇرگىزدىك. 4000-نان استام ستاسيونارلىق لاستاۋ كوزدەرىنىڭ اسەرىن تالدادىق. 2014 جىلعا دەيىن ساپاسىز قالدىقتاردىڭ شىعارىلۋى كوپ بولسا، كەيىنگى جىلدارى بۇل كورسەتكىش تومەندەگەن. بۇل قالا باسشىلىعىنىڭ، ەكولوگيالىق قىزمەتتىڭ، قوعامنىڭ ونەركاسىپ ورىندارىنا ارنايى جاساتقان زەرتتەۋلەرىنىڭ ناتيجەسى. ءبىز كاسىپورىندار ورنالاسقان ايماقتاردا اۋا لاستانۋى جوعارى بولادى دەپ كۇتكەنبىز»، - دەدى مامان.