سوڭعى بەس جىلدا جەتىمدەر ۇيىندەگى بالالاردىڭ سانى 40 پايىزعا قىسقارعان (10 مىڭنان 6 مىڭعا دەيىن)، دەپ حابارلايدى Qamshy.kz اقپارات اگەنتتىگى.  

4445 بالا تۋعان اكە-شەشەسىنە ورالعان. وسى وڭ وزگەرىستەرگە وراي قازاقستاندا 50 بالالار ءۇيى  جۇمىسىن توقتاتتى.

ق ر بعم مالىمەتىنە سايكەس قازاقستاندا بەس ميلليون بالا تىركەلگەن. ونىڭ ىشىندە 26 مىڭى – جەتىم جانە اتا-اناسىنىڭ قامقورىنسىز قالعان بالالار.

جەتىم بالالاردىڭ جالپى سانىنان 20 375 (78 %) بالا قازاقستاندىق ازاماتتاردىڭ وتباسىندا قامقورلىقتا، تەك 5631 (21 %) بالا جەتىم بالالارعا ارنالعان مەكەمەلەردە تاربيەلەنىپ جاتىر.

مۇنداي مەكەمەلەردىڭ قىسقارۋ سەبەبى – اتا-انالارىنىڭ قامقورلىعىنسىز قالىپ، ينتەرناتتارعا جىبەرىلگەن بالالار سانىنىڭ ازايۋى بولىپ وتىر (2015 جىل – 2598، 2016 – 1854، 2017 – 1166).

ارنايى قىزمەت پەن ينتەرنات مەكەمەلەرىندە جۇمىس جاسايتىن اسىراپ الۋشى اتا-انالار مەكتەبىنىڭ ارقاسىندا قامقورلىقسىز قالعان بالالاردىڭ جەتىمدەر ۇيىنە جىبەرىلۋى ازايىپ كەلەدى.

بالانىڭ بيولوگيالىق اتا-اناسىمەن قالۋى ۇيدەگى پروبلەمالاردى ەرتە انىقتاۋ ارقىلى، مەملەكەتتىك ورگانداردىڭ جاعدايى تومەن وتباسىلارعا جان-جاقتى كومەك كورسەتۋىمەن قامتاماسىز ەتىلەدى.

2017 جىلدىڭ مامىر ايىنان باستاپ ق ر ءبىلىم جانە عىلىم مينيسترلىگى جاعدايى تومەن بالالاردى قولداۋ ورتالىقتارىنىڭ جۇمىسىنىڭ جاڭا ەرەجەلەرىن بەكىتتى. ەندى ولاردىڭ قىزمەت كورسەتۋ اياسى كەڭەيىپ، از قامتىلعان وتباسىلاردان شىققان بالالارعا عانا ەمەس، سونداي-اق قاتىگەزدىكتەن زارداپ شەككەن بالالاردىڭ قولايسىز جاعدايلارىنا دا كومەكتەسۋگە باعىتتالعان.