كەشەلى بەرى قىتايدان قاشىپ، شەكارانى زاڭسىز كەسىپ وتكەن سايراگۇل ساۋىتبايدىڭ دەنساۋلىعىنا قاتىستى اقپارات تارالدى.

WhatsApp جەلىسى ارقىلى تارالعان اقپاراتقا سايكەس، تالدىقورعان قالاسىنداعى ۋاقىتشا تەرگەۋ يزولياتورىندا قاماۋدا وتىرعان سايراگۇل ساۋىتباي الماتى وبلىستىق اۋرۋحاناسىنىڭ نەيروحيرۋرگيا بولىمىنە جەتكىزىلگەن. ساۋلە ابەدينوۆا باستاعان ءبىر توپ جۋرناليست مۇنى انىقتاۋ ءۇشىن تىكەلەي اۋرۋحاناعا باردى. اۋرۋحانا قىزمەتكەرلەرى ايەلدىڭ ميى شايقالعانىن، ەسىنەن تانىپ قۇلاعانىن جەتكىزدى. الايدا ءقازىر جاعدايى قالاي ەكەنىن ءارى وپەراسيانىڭ جاسالعان-جاسالماعانىن اشىپ ايتپادى.

ادۆوكاتى ابزال قۇسپان دا اقپاراتتى راستاعانىمەن، «تەرگەۋ بارىسىندا سايراگۇلدىڭ جاعدايى قالىپتى بولعان، دەنساۋلىعىنا شاعىم تۇسىرمەگەن» دەيدى. كۇيەۋى دە جارىنىڭ دەنى ساۋ بولعانىن ايتادى.

جۋرناليستەر مەن بەلسەندىلەر قازىرگى ۋاقىتتا الماتى وبلىستىق اۋرۋحانادا سايراگۇل ساۋىتبايدىڭ دەنساۋلىعىنا قاتىستى قانداي دا ءبىر مالىمەت انىقتاۋعا تىرىسىپ ءجۇر. بىرنەشە ۋاقىت بۇرىن دارىگەرى قايرات ساعىندىقۇلىمەن دە تىلدەستى. الايدا اۋرۋحانا قىزمەتكەرى ايەلدىڭ دەنساۋلىعىنا قاتىستى جارىتىپ ەشتەڭە ايتا قويمادى. تەك ەسىنەن تانىپ قۇلاعانىن جەتكىزدى. ال سەبەبى ايتىلمادى. ايەلدىڭ جاعدايى جايلى ماعلۇماتتى ناقتى ءبىلۋ ءۇشىن بەلسەندىلەر اۋرۋحانا باسشىلىعىنىڭ رۇقساتىن كۇتىپ وتىر. 

ايتا كەتەيىك، بيىل ءساۋىردىڭ ورتاسىندا قازاقستانعا وتكەن سايراگۇلدى مامىردىڭ 22ء-سى كەشكە 21.00-21.30-دار شاماسىندا شەكارا قىزمەتكەرلەرى، ۇيىندە وتىرعان جەرىنەن ۇستاپ اكەتكەن. سەبەبى جارى مەن ەكى بالاسىنا اسىققان ايەل قازاقستان شەكاراسىنان قۇجاتسىز وتكەن. ال ايەلىنىڭ قۇجاتسىز قالاي وتكەنىنەن جولداسى ءۋالي ءسىلام حابارسىز ەدى. العاشىندا جاركەنتتىڭ ۋاقىتشا تەرگەۋ يزولياتورىندا وتىردى. بىر-ەكى اپتا بۇرىن تالدىقورعان ۋاقىتشا تەرگەۋ يزولياتورىنا اۋىستىردى.