ەستە جوق ەسكى زاماندا ساقتار قولعا تۇسكەن تۇتقىننىڭ ەكى كوزىن ويىپ، قۇلدىققا سالادى ەكەن. شاماسى، كوشپەندى وركەنيەتتىڭ اتتىڭ جالىندا، تۇيەنىڭ قومىندا الەمدى باعىندىرعان كەزى بولسا كەرەك. ات تۇياعى جەتكەن جەردى ءوز مەنشىگى ساناعان باھادۇرلەر تاعى بىردە الىس ايماققا سوعىسۋعا اتتانادى.

قازىرگىدەي ۇشاقپەن ۇشىپ بارىپ، بومبالاپ قايتىپ كەلەتىن زامان ەمەس، 20 جىلداي ءجۇرىپ قالىپتى. ەلدە قالعان ايەلدەرى جاڭاعى سوقىر قۇلدارمەن اۋەيى بولىپ، سولارعا كۇيەۋگە ءتيىپ، بالا تاپسا كەرەك. جيىرما جىلدان سوڭ قىلشىلداعان جاس سارباز قىرما ساقال قىرقىلجىڭعا اينالىپ، ەلگە قايتادى. جاڭاعى قۇلدان تۋعان بۋىن ساقتاردى ءوز وتانىنا كىرگىزبەي، قىرعىن شايقاس بولادى. ساقتاردىڭ دا قاتارى سەلدىرەي تۇسەدى. سوندا قولباسشىنىڭ كەڭەسشىسى، كوپتى كورگەن داناگوي اقساقال: "بۇلار كەشەگى ءبىزدىڭ قۇلاق كەستى قۇلدارىمىز ەمەس پە؟ قۇلدىڭ قورقىنىشى – قامشى. قارۋ-جاراقتى تاستاپ، قولعا قامشى الىڭدار"، - دەپ كەڭەس بەرەدى. اسكەر اراسىندا سىبىر-كۇبىر كوبەيەدى. "قىلىشتان قايتپاي سوعىسىپ جاتقاندا قامشىسى نەسى" دەگەن سوزدەر دە ەستىلىپ قالادى. اقساقال بولسا "قامشىنى كورسە قۇل ەكەندەرى ەستەرىنە تۇسەدى. ماسەلە جۇرەكتە ەمەس، سانادا" دەپتى. سودان، قولباسشى اسكەرگە قولدارىڭا قامشى الىڭدار دەپ ءامىر بەرەدى. و، عاجاپ، جاڭا عانا بۇرىنعى قوجايىندارىنان قايمىقپاي سوعىسىپ جاتقاندار قامشىنى كورگەندە تىم-تىراقاي بولىپ قاشىپتى.

ءقازىر ءبىزدىڭ قوعامعا دا ءبىر قامشى ابدەن كەرەك-اق. اتا-بابا داستۇرىنەن بەزىپ، باسقىنشى ەلدىڭ تىلىندە شۇلدىرلەگەندى ابىروي كورەتىندەر بىزدە دە جەتىپ ارتىلادى. ۇلتتى ۇلت قىلاتىن نەگىزگى دىڭگەگى ءتىل مەن ءدىل.

ر.S. كەيدە تۇسىمدە كۇن باتىستى بەتكە الىپ بارا جاتقان عۇنداردىڭ قالىڭ قولىن كورەمىن. الدىندا اق بوز اتقا ءمىنىپ، قول باستاپ بارا جاتقان "قۇدايدىڭ قاھارلى قامشىسى" ەدىل قاعان. ارتىنا بۇرىلىپ، قامشىمەن ءبىر تارتاتىن سياقتى.

وڭعار قابدەنوۆ