بۇرىن حالىق كوك جاشىككە تەلمىرسە، ءقازىر ەڭبەكتەگەن بالادان ەڭكەيگەن قارياعا دەيىن ۇيالى تەلەفوننىڭ بەتىنە ۇڭىلەدى دە وتىرادى. كەيدە جۇمىس اراسىندا، ساباق وقىپ وتىرىپ ءۇزىلىس جاساۋ ءۇشىن جەلىنى ءبىر شولىپ شىعامىز دەپ، ۆيرتۋالدى الەمگە بىرنەشە ساعاتقا كىرىپ كەتەتىنىمىزدى بايقاماي دا قالامىز. وسىدان 20 جىل بۇرىن تەلەديدار – ادام ساناسىنا اسەر ەتەتىن قۇرال دەسەك، ءقازىر الەۋمەتتىك جەلىنىڭ داۋرەنى ءجۇرىپ تۇر. وسكەلەڭ ۇرپاق جەلىدەگى كوپكە تانىمال جەلى «جۇلدىزدارىنا» قاراپ بوي تۇزەپ، كەيدە سان الۋان ماسەلەگە قاتىستى پىكىر قالىپتاستىرىپ جاتادى. اق پەن قارانىڭ اراجىگىن اجىراتۋعا قاۋقارسىز، ەلىكتەگىش جاسوسپىرىمدەر جەلىدەگى قوقىستى ساناسىنا ءسىڭىرىپ جاتقانى دا جاسىرىن ەمەس. ونىڭ ايقىن كورىنىسى ءدال سول الەۋمەتتىك جەلىدە.

پاراقشاسىندا تىركەلۋشىلەر سانىن ارتتىرۋ ءۇشىن ءتۇرلى قۇيتىرقى ارەكەتتەرگە بارىپ، ءتىپتى دەنەسىن جالاڭاشتاۋدان تايىنبايتىندار پايدا بولدى. سەبەبى تىركەلۋشى كوبەيگەن سايىن تانىمالدىلىعى ارتىپ، جارناما بەرۋشىلەر پايدا بولادى.

جالاڭاش دەنەسىن كورسەتكەن قىزداردىڭ فوتوسى، ىشىمدىك ءىشىپ، تەمەكىنى بۋداقتاتىپ وتىرعانداردىڭ ۆيدەوسى، ەرسى ءبيىن كامەراعا ءتۇسىرىپ، ونى ارنايى جەلىگە سالعاندار مەن ميلليونداعان وقىرمانعا بالاعات سوزدەردى قارشا بوراتقانداردىڭ ۆيدەوسى جاريالاناتىن بولدى. جەكە پاراقشاسى بولعاندىقتان نە سالسا دا ءوز ەركى عوي. دەسەك تە سولاردان ۇلگى الاتىنداردىڭ بار بولعانى قىنجىلتادى.

ۋاقىت وتە كەلە قوعامنىڭ ءتۇرلى ماسەلەگە كوزقاراسى، ۇستانىمى، تۇسىنىگى وزگەرەدى. بۇل – ءومىر زاڭدىلىعى. ادامدار 20 جىل بۇرىنعىداي ويلامايدى. ونى قوعامنىڭ العا جىلجۋى دەسەك، ەكىنشى جاعىنان كەي ماسەلەدە وي بۇرىس جاقا قاراي وزگەرگەندەي. ماسەلەن، بۇرىن قىز بالاسى ەتەك، جەڭىن قىمتاپ جۇرگەنى ابزال دەسەك، ءقازىر ءبىر لىپامەن تايراڭداپ جۇرگەندەردىڭ فوتوسىن كورىپ «جارايسىڭ»، «كوپشىلىكتىڭ پىكىرىنە قۇلاق اسپاعانى جاقسى عوي» دەپ ونى قۇددى ءبىر باتىرلىققا بالايدى. جو-جوق بىرەۋدىڭ كيىمىندە شارۋام جوق. قازاقستاندا حالىق ءۇشىن ارنايى درەسس كود جوق. كىم نە كيىپ، قالاي جۇرسەم دەسە دە ءوز قۇقىعى جانە بۇل قۇقىقتى ەشكىم شەكتەي المايدى. الايدا ۇياتتى جەرلەرىن كورسەتىپ، بالاعات ءسوز ايتىپ، تەمەكى شەگىپ، ىشىمدىك ىشكەندەردى ەركىن ويلى دەپ ەسەپتەپ، كوپشىلىكتىڭ الدىندا ارتىق قىلىق كورسەتپەيتىندەردى بەتپەردە كيىپ ءجۇر دەگەن پىكىر قالىپتاسقانى ويلاندىراتىن جاعداي.

قوعامداعى ار، ۇيات، ابىرويدى ساقتاۋدى تار قاپاسقا، ادامنىڭ ءوزى-وزى شەكتەۋى دەپ تۇسىنەدى. ار، ۇياتتان اتتاعاندارىن جانە ونى اشىق كورسەتكەندەردى باتىل ادام رەتىندە قابىلدايدى.

جاس قىزدار ولارعا ەلىكتەپ وعان ۇقساعىسى كەلگەن جاعدايلار از ەمەس. ال كوپشىلىككە جەلى ارقىلى تانىلىپ جۇرگەندەر، «مەن ەشكىمگە مەننەن ۇلگى الىڭدار دەپ ايتقان ەمەسپىن» دەپ ات تونىن الا قاشادى. ارينە ءار بالانىڭ تاربيەسى، اتا-انانىڭ موينىندا، دەسەك تە تىركەلۋشىلەرى ميلليوننان اساتىن ادامداردىڭ كوپشىلىك الدىندا جاۋاپكەرشىلىگى بار ەمەس پە؟

قازىرگى كەزدە سمارتفون، ينتەرنەتتىڭ شىرماۋىنان امان قالۋ تەك – ءبىلىم الۋ، كىتاپ وقۋ، ۇلتتىق تاربيەنى بويعا ءسىڭىرۋ. عىلىم، تەرەڭ ءارى وزدىگىنەن ويلاۋ قابىلەت پەن ۇلتتىق نامىس بار جەردە جات تۇسىنىكتەر مەن جات مادەنيەت، تەرىس تۇسىنىكتىڭ مىقتاپ ساناعا ەنۋىنە قاۋقارى جەتپەك ەمەس.