قىتايدىڭ سزيانسي ايماعىندا جەردى ۇنەمدەۋ ءۇشىن مايىتتەردى ورتەۋدى مىقتاپ قولعا الماق. ءقازىر جەرگىلىكتى تۇرعىنداردىڭ دايىن تابىتتارىن كۇشتەپ تارتىپ الىپ جاتىر، دەپ جازادى South China Morning Post.

ايماق بيلىگى ادام قالدىقتارىن جويۋ ءۇشىن تەك كرەماسيا ءادىسىن پايدالانۋدى ەنگىزبەك. 2018 جىلدىڭ قىركۇيەك ايىنان باستاپ كرەماسيانى مىقتاپ قولعا الۋدى جوسپارلاپ وتىر.

شەتەلدىك باق-تىڭ حابارلاۋىنشا، اۋىل مەن گانچجوۋ، سزيان جانە يچۋن قالالىق ءوڭىر تۇرعىندارىنان جەرلەۋگە ارنالعان زاتتار تارتىپ الىندى. جينالعان اعاش تابىتتاردى ەكسكاۆاتور جوق قىلعان. قاريالار تابىتتاردى ساقتاپ قالۋ ماقساتىندا ولارعا جاتىپ العان، الايدا ەشتەڭەگە قاراماستان تابىتتاردى تارتىپ العان.

بيلىك اتالمىش شەشىمدى قابىلداعاننان كەيىن جەرلەۋگە ارنالعان زاتتاردى شىعارۋعا تىيىم سالىنعان.

قىتايدا جەرلەۋگە قاتىستى مۇنداي جاعداي ءبىرىنشى رەت بولىپ تۇرعان جوق. بۇعان دەيىن شاندۋن ولكەسىندە ءداستۇرلى جەرلەۋ ءراسىمىن وتكىزۋگە تىيىم سالىنعان. جاڭا زاڭعا سايكەس، قايتىس بولعانداردىڭ دەنەسىن ورتەپ، ونىڭ تۋىستارى كرەماسيا جاساعانى تۋرالى سەرتيفيكات كورسەتىلەدى.

قىتايدىڭ كەيبىر ادامدارى ءۇشىن ادامدى جەر قوينىنا وتكىزۋ ماڭىزدى. سوندىقتان كەيبىر جۇڭگو ازاماتتارى «ادام دەنەسىن ساۋدالايتىنداردان» دەنەنى ساتىپ الىپ ونى ورتەپ، سەرتيفيكات الادى دا تۋىستارىن جاسىرىن جەرگە كومەدى.

ساۋىردە بەس ەر ادام شاندۋن ولكەسىندە ولىكتەردى ۇرلاپ، ساۋدالاعانى ءۇشىن قاماۋعا الىنعان.