رەسەيگە بەت العان اۆتوبۋس كەنەتتەن ءورت قۇشاعىنا ورانعان كەزدە جەدەل قيمىلداپ، قايسارلىق تانىتقان قازاق جىگىتى بۇگىنگى تاڭدا قۇجاتسىز، ءبىر تيىن اقشاسىز كورشى ەلدىڭ كوشەلەرىن كەزىپ ءجۇر ەكەن دەگەن اقپاراتتى كوزىمىز شالدى. رەسەيلىك سايتتارعا كىرىپ قاراساق، قازاقستاننان نوۆوسىبىرگە جولعا شىققان اۆتوبۋس شىنىمەن دە تاڭعى ءتورت شاماسىندا ورتەنىپ كەتىپتى. قالىڭ ۇيقىدا جاتقان 48 ادامدى وياتىپ، ولاردى قۇتقارعان قازاق جىگىتى بولىپ شىقتى. «وتانداسىمىز قايدا؟ ونىڭ مۇنداي كۇي كەشۋىنە نە سەبەپ بولدى؟» دەگەن ءبىزدىڭ سۇراققا «كومسومول شىندىعىن» جازاتىن جۋرناليستەر جاۋاپ تابا ءبىلدى. ماسەلەنىڭ ەگجەي-تەگجەيىن بىلگەن رەسەيلىك ارىپتەسكە ريزامىز. 48 ادامنىڭ قۇتقارۋشىسى 37 جاستاعى گرەك-ريم كۇرەسى بويىنشا بالالار جاتتىقتىرۋشىسى ەرجان ومارحانوۆ سول تۇنگى وقيعانى بىلايشا ەسكە الىپتى: «ءتۇتىننىڭ ءيىسىن سەزىپ، قالىڭ ۇيقىدان شىرت ويانىپ كەتتىم. جۇرگىزۋشىگە «ەسىكتى اش! ورتەنىپ جاتىرمىز!» دەپ ايقايلادىم. ەشكىم ءۇن قاتار ەمەس. ولاردى وياتۋ ءۇشىن ۇرۋعا ءماجبۇر بولدىم. سوسىن ەسىكتى تەبە باستادىم. سول كەزدە اۆتوبۋس قوزعالىسىن توقتاتتى. ءبىرىنشى كەزەكتە كىشكەنتاي بالالاردى قۇتقاردىم. اۆتوبۋس جۇرگىزۋشى ەشقانداي كومەك كورسەتپەدى. شوشىنعاننان سىلەيىپ قاتىپ قالدى».

وزىمەن بىرگە قۇجاتى، تەمىر تۇلپار ساتىپ الۋعا جيناعان قاراجاتى بولعان ەرجان بارىنەن ايىرىلىپتى، قىسقاسى. ءقازىر تۇگى جوق. «ءتىپتى باسىمداعى كەپكام دا ورتەنىپ كەتتى. اۆتوبۋستاعى ادامدار «ساعان اقشا جيناپ، كومەكتەسەيىك» دەدى. ءبىراق مەن كومەكتەن باس تارتتىم. ەندى قۇجاتتارىمدى قايتا قالىپقا كەلتىرۋ ءۇشىن ءبىراز جۇگىرەيىن دەپ تۇرمىن. ال، اقشاما كەلەتىن بولساق، ول اقشا مەندە بولعانىن ءالى دالەلدەۋىم قاجەت ەكەن» دەپ قىنجىلىپتى.

12 بالانى، 36 ەرەسەك ادامدى ولىمنەن قۇتقارعان ەرجان ومارحانوۆتىڭ جاعدايى، مىنە، وسىنداي. ورتەنىپ كەتكەن اۆتوبۋس رەسەيدىكى. تاسىمالداۋشى – نوۆوسىبىرلىكتەر. تاسىمالداۋشى كومپانيا ءوز قاتەلىگىن مويىنداپ، جاپا شەككەن جولاۋشىلارعا كومەك قولىن نەگە سوزبايدى دەگەن زاڭدى سۇراق تۋىندايدى. وزگە ەلدە ۇلتاننىڭ كۇيىن كەشىپ جۇرگەن وتانداسىمىز ەلگە امان-ەسەن ورالادى دەپ ۇمىتتەنەمىز. رەسەيدەگى قازاق ەلشىلىگى دە اتالمىش جاعدايعا ارالاسىپ، بەلسەندىلىك تانىتادى دەگەن سەنىمدەمىز.