پوەزيا ادام رۋحىنىڭ بوستاندىققا ۇمتىلۋى. ولەڭ ءوزىن ولىمگە بايلاپ، اقىنعا وي ەركىندىگىن سىيلايدى. يوسيف برودسكيي و.ە.ماندەلشتام جونىندە جازعان ماقالاسىندا وسىنداي ويدى مەڭزەگەن. (ارداق نۇرعازى ۇلى. «قازاقتىڭ مودەرنيستىك پوەزياسى») وسىنداي وي جەلىسى نەگىزىندە سىزدەرگە شەتەل اقىندارىنان

پارتالى ءبىر توپ ولەڭ ۇسىنىپ وتىر.

فريدريح شيللەر نەمىستىڭ ۇلتتىق مادەنيەتىنە ۇلكەن ۇلەس قوسقان. دۇنيە ءجۇزى ادەبيەتىنىڭ كلاسسيكتەرى قاتارىنان كورنەكتى ورىن الاتىن اقىن، دراماتۋرگ فريدريح شيللەردىڭ شىعارمالارىن الەم حالقى ەڭ تاڭداۋلى مادەنيەت مۇراسىنىڭ قورىنا قوسىپ باعالايدى.  

شاشىراپ شىققان كۇننىڭ پەرزەنتتەرى، اسەم گۇل قىزىل الا ورنەكتەرى، ماحاببات، سۇلۋلىقتىڭ بەلگىسى دەپ، سىزدەردى كوپ بولدى الەم تەربەتكەلى. ساقينا ورنەگى بوپ فلورانىڭ، كوركىندەي كەلەسىڭدەر بۇل ارانىڭ. ءبىراقتا ويلانىڭدار، تولعانىڭدار، جايناعان جاس سۇلۋلارى گۇل الاڭنىڭ. جىلاڭدار: ءومىردىڭ سىرت سۇلۋلىعى، قۇيا الماس جاندارىڭا ءسىرا ءبارىن. بۇلبۇلدان، تورعايدان سوڭ ورىستەپ ءۇن، شىعادى سىزدەر جايلى شەرلى ىشتەن مۇڭ. جاپىراقتارىڭىزدا تەربەتىلىپ، ۇيىقتايدى قالعىپ قىزى پەرىشتەنىڭ. سىزدەردىڭ تاجدەرىڭىز ەلدەن ەرەك، ديانا قىزىن سيقىر كۇيگە بولەپ. جىبەردى اينالدىرىپ كوبەلەكتىڭ جاساۋلى كىلەمىنە ءبىر كەرەمەت. جىلاڭىز، جاس توگىڭىز، كۇن بالاسى، بەلگىلى كوڭىلىڭنىڭ مۇڭ – نالاسى. سىزدەردەن الىس كەتىپ اۋلاق جاققا، الشاقتاپ ماحابباتتىڭ تۇر اراسى. ءبىراق تا ايرىلىسۋ، قايعى – مۇڭدى، قارسى الام جيماي ەشبىر ايىلىمدى. قادىرلى دوسىم، نانني! بۇل ساۋساقتار سىي توقىر وزىڭە ارناپ قايىرىمدى. جىرىمدى، جۇرەگىمدى، ءومىرىمدى، سىر تولى، نازىك كۇيلى كوڭىلىمدى، مەن سىزگە تاپسىرامىن امانات قىپ، وسيەت، ەڭ اقىرعى سەنىمىمدى. تاباسىڭ بۇل سوزىمنەن نە كەرەكتى، وسى ءبىر الاقانداي ەلە بەتتى. ەڭ كۇشتى تاڭىردەن ۇشىراتپاس كورەسىڭ قۇپيا ءبىر كەرەمەتتى.  

اشىل، سايدىڭ تۇمانى! تارا، تۇنەك مۇنارى. قۇشارمىن قايدان ارماندى، قانارما جاننىڭ قۇمارى؟ جالىنداپ گۇلمەن لاۋلايتىن، قىزىل توبە كورەمىن. قاناتىم قايدا سامعايتىن، باسىندا سول ءبىر توبەنىڭ؟ كوڭىلىڭ قالار جەڭىلدەپ، ۇنىمەن سىرلى شەكتەردىڭ. سوعادى قوڭىر جەل ۇرلەپ، لەبى بوپ نۇرلى كوكتەمنىڭ. سول جەردە جەمىس جارقىلداپ، اعاشتى تۇرار التىنداپ. دوڭەستە، جازىق كوگالدا، سوقپايدى بوران اڭقىلداپ. و، سۇلۋلىق، ماس قىلدىڭ! كەرەمەت كوكتەم سول جەردە جۇتقانداي ءيسىن جاس گۇلدىڭ، تۋلايدى جۇرەك كەۋدەڭدە. ۇشامىن سوندا... قيال قۇر! وتەتىن جولىم جوق مەنىڭ. الدىمدا اسۋ قيا تۇر، ارقىراتىپ كوك سەلىن. قايىق تۇر... باستار قايدا ادام، جونەلدىڭ... سىندا بىلەك بۇل. جەلكەنى قانات بايلاعان، ەسكەگى نايزا ءبىر وتكىر. سەن جۇرەككە تاۋەكەل، قۇدايعا سەنبە نە كەرەك. كەرەمەت بولسا ءتاۋ ەتەر، جول باسشىڭ سول ءبىر كەرەمەت.  

سوڭىنا ەرىپ ءۇمىتتىڭ، كەتتىم بالعىن شاعىمدا؛ ءۇيىمدى دە ءۇمىتتىم، جان قالعان جوق جادىمدا. تىم جۇپىنى كيىمىم، جاس بالاداي كوڭىلىم. ايدادى الىس ءيىرىم، ءۇمىتىم تەك سەرىگىم. كورىنبەدى جول الىس، دەدى ماعان ءبىر داۋىس: «تارت شىعىستى بەتكە الىپ! تۇرار سەنىڭ جولىڭدا، جەر جۇماعى نە كەرەك، قاسيەتتى ورىنعا تاپ بولاسىڭ كەرەمەت». تاڭ كەشىمەن جالعاندى، كەش اۋىستى تاڭمەنەن. ىزدەپ سول ءبىر ارماندى كەتتى مەنەن ءال – دارمەن. شىڭىراۋلار سۇستيىپ، شىڭ جوتالى تاۋ تۇردى. سالدىم كوپىر كۇش جيىپ، ءور تاسقىندار ارقىلى. كوردىم كەنەت شىعىسقا، تارتقان وزەن كوك الا. تەربەتىلىپ اعىسقا، تۇر ءبىر قايىق جاعادا. ۇمىتپەنەن، قاۋىپپەن، كەشتىم وزەن تەرەڭىن. باقىتىمدى تاۋىپ مەن الاتىنداي كورەمىن! مۇحيتتان ءبىر بەلگىسىز، شىقتى مەنىڭ قايىعىم. الدىم تۇمان كورگىسىز، كۇتەم كىمنەن قايىرىم؟ اسپان مەن جەر ماڭگىلىك، قاۋىشپايتىن سەكىلدى. كەتتى باقىت دال قىلىپ، كۇيگە سالىپ نە ءتۇرلى. ولەڭدەردى اۋدارعان: س. ماۋلەنوۆ

پەرسي بيشي شەللي اعىلشىننىڭ ۇلى اقىنى. 1972 جىلى 4 تامىزدا اۋقاتتى وتباسىندا دۇنيەگە كەلگەن. وتىز جاسىندا وپات بولعان اقىننىڭ كوزقاراسىندا، ونىڭ جىرلارىندا بايرون لەبى ەسەدى. ول دا حالىقتىڭ سارقىلماس كۇشىنە، ونىڭ ساۋلەتتى بولاشاعىنا شەكسىز سەنگەن اقىن. ۇلى اقىن شىعارماشىلىعىنىڭ ءون بويىندا ادامنىڭ سۇلۋلىعى، جەڭىلمەس رۋحى، ەرتەڭگى نۇرلى بولاشاعى، سول جولداعى بىتىسپەس كۇرەسى پاش ەتىلگەن.  

  تۇسىمە ەندىڭ سەن جاڭا، ويانا كەتتىم ويعا الا. حوش ءيستى اينالا، جۇلدىزدار جۇزگەن جاي عانا. تۇسىمە ەنىپ ۇيىتتىڭ، اڭعارا الماي قالدى جان. اشىلدى كەپ، سۇيىكتىم، تەرەزەڭ تاپ الدىمنان. جەلدەي ءالسىز شارلاعان، سايالى القاپ ىعىندا. گۇلدەي سەزىم قالماعان، قۇلاعىن تۇرمەي بۇلبۇلعا. بەينە تۇستەي ءومىرسىز، الدىندا وتكىر كوزىڭنىڭ. ءولىپ بارام كوڭىلسىز، كەڭ كەۋدەڭدە ءوزىڭنىڭ. تۇرعىز مەنى، بەر كومەك، سەزىمىم جوق، حالىم جوق. ويان – داعى جەدەل دەت، سەبەلە نۇر جاۋىن بوپ. سالقىن ماعان بۇل ماڭدا، سوققان جۇرەك قابىنىپ. ءوز كەۋدەڭە قۇلاردا، كەتەر جۇرەك جارىلىپ. اۋدارعان: س. ماۋلەنوۆ  

  1 جانارىم جاستان بۇلدىراپ، تۇرسا دا، قالدىم سىر بەرمەي. كوزىمدى بۇردىم تۇنجىراپ، ويىڭدى سەنىڭ بىلگەندەي. ىنتىزار وتى كوزىڭنەن، جارىق ەتپەي قالاي بەزىنەم. 2 ماڭدايدىڭ سورى بەس ەلى، جەگىدەي جەيمىن ءوزىمدى. ۋايىمنىڭ جەڭىپ كەسەلى، جۇرەگىم مۇڭنان ەزىلدى. ءۇمىتسىز حالىم – جاسقاعان، جاسىرام ونى باسقادان. 3 ەشكىمدە كوڭىل بولگەن جوق، وزىڭمەن ءوزىڭ ەدىڭ سەن. جىلدار دا ءوتتى كەرۋەن بوپ، ماحابباتىم بوپ كەلدىڭ سەن. پەيلىڭمەن ءبىر ءسات ەمدەدىڭ، سونان سوڭ ازاپ – كورگەنىم. 4 ءتىرىلتتىڭ مەنى قايتادان، مەيىرىمىڭ توگىپ ءۇن بەردىڭ. بازارى مۇلدە تارقاعان، جاينادى سولعان گۇلدەرىم. ەرنىڭە ەرنىم تامساندى، كوزىڭنەن ءىشتىم كاۋساردى. باقىتتى ءسىرا بولماسپىز، بايلاۋلى قولىم، جولىم دا. ءبىر عۇمىر كەشە الماسپىز، وڭىم دا دۇشپان، سولىم دا. نار ءسوزدى قايدان تابايىن، بۇعاۋدىڭ بۇزار تالايىن! 5 ۇركەكسىڭ، نازىك، اسەمسىڭ، تىرلىك جوق سەنسىز، عاشىقپىن. مەن ءۇشىن شىرىن، اسەلسىڭ، سەرتىڭە سەنىڭ اسىقپىن. جاناسىڭ ءوزىڭ وت بولىپ، قارايسىڭ بە ەكەنسىڭ جەك كورىپ؟! اۋدارعان: ج. قىدىروۆ  

  كورول – توپاس، بوستاندىقتىڭ قاس جاۋى، الجىعان قىرت ءتاجدى كيگەن باسىنا. شاھزادا دا سول تۇقىمنان – لاس جانى، ءىرىپ – ءشىرىپ بىتكەن جەتپەي جاسىنا. ەل – جۇرتىڭدى بيلەيتۇعىن – سۇلىكتەر، كۇندىز – ءتۇنى بال قانىڭدى سورادى. كوز اشقاننان اشتىققا بوپ كىرىپتار، بار – جوعىڭدى توق جۇرگەندەر تونادى. اسكەر دەگەن – كىسى ولتىرگىش حاس نادان، التىنعا قۇل بولىپ زاڭىڭ جارالعان. شىركەۋلەردە سيىنادى اقشاعا، پارلامەنتتە باياعىدا – اق جوق ادام، ءبارى وسىنىڭ – انگلليا دەر ەدىم، الىس بولماس ازاتتىقتا كەلەر كۇن. اۋدارعان: ج. قىدىروۆ  

  ايتشى ماعان، جارىق جۇلدىز، سىرىڭدى، ايتشى ماعان، قايدا تارتتىڭ، شىنىڭدى. قارا اسپاندا كىرپىك قاقپاي جاناسىڭ، ۇيقى قايدا، قاي كەز شىرىم الاسىڭ؟ ايتشى ماعان، بوزارعان اي، تەگىندە، نەعىپ جۇرسىڭ ەلسىز اسپان شولىندە. تىنىم الار ءبىر ءساتتى ىزدەپ، ماڭگىلىك، جۇرگەنىڭ بە جاداپ – جۇدەپ قاڭعىرىپ؟ جيھانكەزدەي سەن – تاعاتسىز جەل ەدىڭ، كوك تۇتىندەي ءبىر بۇرق ەتىپ جونەدىڭ. ءجونىڭدى ايتشى، نە قۋالاپ ءجۇرسىڭ سەن، قانداي مۇڭ بار كوكەيىڭدە، كىمسىڭ سەن؟ اۋدارعان: ج. قىدىروۆ   دايىنداعان: ءقۋانالى الماسبەك ۇلى