ۇلىبريتانياداعى ساندەرلەند قالاسىنداعى ۋيرمۋت كوپىرى قايتالانباس ارحيتەكتۋرالىق كوركەمدىلىگىمەن بىردەن كوزگە تۇسەدى. بۇل كوپىردىڭ اتاعىن ارتتىرىپ جۇرگەن تاعى ءبىر فاكت بار. نە دەيسىز عوي؟ ومىرمەن قوش ايتقىسى كەلگەندەر وسى كوپىردەن سەكىرگەندى قۇپ كورەدى ەكەن.
مۇنى جاقسى بىلگەن 18 جاستاعى پەيدج حانتەر قايعىعا دۋشار بولىپ، جۇرەكتەرى جارالانىپ، ولىمنەن باسقاسىن ويلاي الماي قالعان بەيباقتارعا قول ۇشىن سوزۋدى ءجون سانايدى.
پەيدج حانتەردىڭ تاڭداعان ءتاسىلى قانداي دەسەڭىز، تاڭ قالۋعا دايىن بولىڭىز. سەبەبى پەيدج ءتۇرلى-تۇستى فلوماستەرلەردى قولدانا وتىرىپ، جىگەرلەندىرەتىن، رۋحتاندىراتىن سوزدەردى اق پاراققا جازىپ، لاميناتتاپ، كوپىردىڭ اينالاسىنداعى 40 جەرگە ءىلىپ قويعان.
«شىنايى نيەتىمدى بايقاتۋ ءۇشىن وسى سوزدەردى ادەيى قولدان جازدىم» دەپتى پەيدج ينستاگرامىندا. ولەمىن دەپ كەلگەن ادام پەيدجدىڭ جازعاندارىنا كوز ءتۇسىپ، باستاپقى ويلارىنان اينىعان. ونىمەن قويماي بويجەتكەن شۇعىل پسيحولوگيالىق كومەك كورسەتۋ ورتالىعىنىڭ تەلەفون ءنومىرىن دە قوسا جازعان.
18 جاستاعى قىزدىڭ اق پاراققا جازعاندارى:
- «مىقتى بول! سەبەبى ءبارى جاقسى بولادى. ءدال ءقازىر باسىڭا قارا بۇلت ۇيىرىلگەن شىعار. ماعان سەنشى، ەرتەڭ-اق كۇن شىعادى جارقىراپ»
- «تەرەڭ تىنىس ال. ارتقا قادام جاسا. ويىڭنان اينى. بىزگە ءبارىبىر ەمەس»
- «ەرتەڭ كەرەمەت كۇن تۋادى. ءوتىنىش، مويىماشى!»
- «كىشكەنتاي كۇرەسكەر! كورەر قىزىعىڭ مەن قۋانىشىڭ ءالى الدا»
- «قوزعالما. توقتا. دەم ال. تىعىرىقتان شىعار جول بار. بۇل الەمدە سەنى جاقسى كورەتىن ادامدار بار»
وسى جازۋلاردى بايقاپ قالىپ، ءتىرى قالعانداردىڭ رەسمي راستالعاندارى – 6 ادام. سەبەبى 6 ادام پەيدج قالدىرعان نومىرگە قوڭىراۋ شالىپ، پسيحولوگيالىق كومەك العان. ۇندەمەي، تەرىس بۇرىلىپ كەتكەندەر قانشاما!؟
پەيدجدىڭ بۇل ارەكەتى جەرگىلىكتى پوليسيانىڭ نازارىنان تىس قالمادى. ساندەرلەندتىڭ پوليسياسى ونى قۇرمەت گراموتاسىمەن ماراپاتتاپتى. سونىمەن قاتار تۆيتتەردەگى وزدەرىنىڭ رەسمي اككاۋنتىندا پەيدجگە العىس ايتا وتىرىپ، بۇل جازبالاردى «ءۇمىت وتىن جاعاتىن جولداۋلار» دەپ اتاپ ءوتتى.
بۇگىنگى تاڭدا پەيدج حانتەر ساندەرلەند قالاسىنان جاقىن ماڭدا ورنالاسقان يست ديۋررەم كوللەدجىندە وقيدى. ادامگەرشىلىگى مول، جۇرەگى مەيىرىمدىلىككە تولى قىز شەتەلدىك باق-قا بەرگەن سۇحباتىندا بىلاي دەپتى: «وتباسىم مەنى ماقتان تۇتادى. گراموتامدى قابىرعاعا ءىلىپ قويماقشىمىن. مەن جاي عانا ادامدارعا كومەكتەسكىم كەلدى».
ول مۇنىمەن توقتاپ قالعىسى كەلمەيدى. بۇگىنگى تاڭدا جىگەرلەندىرەتىن جاڭا جازبالاردىڭ ءماتىنىن ويلاستىرۋ ۇستىندە. ولاردى ۋيرمۋت كوپىرىنىڭ اينالاسىنا ءىلىپ تاستاماق.
دەرەككوز: Paige Hunter's Notes on Wearmouth Bridge in England Help Save Lives
