الەمدەگى ءارتۇرلى سانكسيالار، اقش - تىڭ ءبىرقاتار ەلدەرمەن اراداعى ساۋدا سوعىسىنا بايلانىستى تورتكۇل دۇنيەدەگى بايلاردىڭ تۇراقتى تابىسى بيىل كىلت تومەندەپ جاتىر. ارينە، مۇنىڭ سەبەبى ءارتۇرلى ەكەنى ءسوزسىز. ءبىراق Bloomberg اگەنتتىگى 2018 جىلى كوپتەگەن كومپانيالار ءۇشىن ءساتسىز جىل بولعانىن العا تارتۋدا. حالىقارالىق نارىقتاعى  كۇردەلى جاعدايعا بايلانىستى الەمنىڭ بايلارى بيىل 511 ميلليارد دوللار جوعالتقان. از اقشا ەمەس. سوندا ولار كىمدەر؟

مىسالى، Amazon كومپانياسىنىڭ قوجايىنى دجەفف بەزوس قىركۇيەك ايىنىڭ وزىندە 168 ميلليون دوللار تابىس تاپقان، الايدا  ونىڭ كاپيتالى جىل سوڭىنا دەيىن 69 ميلليارد دوللاردان 53 ميلليارد دوللارعا كۇرت تومەندەگەن.

ال  Facebook الەۋمەتتىك جەلىسىنىڭ يەسى مارك سۋكەربەرگ داعدارىستىڭ اسەرىنەن 23 ميلليارد دوللار جوعالتقان.

2018 جىل ازيالىق كاسىپكەرلەر ءۇشىن دە قولايلى جىل بولا قويعان جوق. مىسالى، Dalian Wanda Group كەومپانياسىنىڭ نەگىزىن قالاۋشى ۆان ءسزيانليننىڭ ءوندىرىسى  11،1 ميلليارل دوللار شىعىنعا ۇشىراعان. تاياۋ شىعىستا دا جاعداي وڭىپ تۇرعان جوق. ساۋد ارابياسىنداعى ءبىرقاتار بيزنەسمەندەردىڭ سىبايلاس جەمقورلىققا بايلانىستى ۇستالۋىنا بايلانىستى ولار دا  وراسان زور اقشا جوعالتتى. حانزادا ءال ءۆاليدتىڭ بايلىعى 3،4 ميللديارد دوللارعا ازايعان. بيىلعى جىلى ەۋروپالىق كاسىپكەرلەردىڭ دە ەڭسەسى ءبىرشاما ءتۇسىپ تۇر. اۆتوكولىك بولشەكتەرىن وندىرۋمەن اينالىساتىن Schaeffler Gruppe كومپانياسىنىڭ قوجايىنى شەففلەردىڭ اۋلەتى 17 ميلليارد دوللار زيان شەكتى. مەكسيكالىق ميللياردەر كارلوس سليم لاتىن امەريكاسىنداعى باي ادام ءارى موبيلدىك بايلانىستىڭ ەڭ ءىرى وپەراتورى رەتىندە  بۇرىنىراقتا الەمدەگى بايلاردىڭ كوشىن باستاعانى بەلگىلى. بيىل ءبىرشاما شىعىنعا ۇشىراعان كاسىپكەر داعدارىستان كەيىن تىزىمدە التىنشى ورىنعا ءتۇستى. الايدا ونىڭ بايلىعى ءبارىبىر از ەمەس.

مۇناي باعاسىنىڭ قۇلدىراۋى، اقش پەن ەۋروپا ەلدەرىنىڭ سانكسيالارى رەسەيلىك كاسىپكەرلەردىڭ وندىرىسىنە دە اسەر ەتۋدە. بارىنەن بۇرىن رەسەيلىك بيزنەسمەن ولەگ دەريپاسكانىڭ ءال-اۋقاتى 5،7 ميلليارد دوللارعا تومەندەگەن كورىنەدى.

ءبىراق بۇل ءبىر ساتتىك نارسە ەكەنىن ايتا كەتكەن ءجون. جالپى الەمدەگى بايلاردىڭ تابىسى بىردە تومەندەپ، بىردە جوعارىلاپ تۇراتىنى انىق.