2019 جىلدىڭ 15 قاڭتارىندا ق ر ەڭبەك جانە الەۋمەتتىك قورعاۋ ءمينيسترى ءمادينا ءابىلقاسىموۆا Total.kz تىلشىسىنە بەرگەن سۇحباتىندا قازاقستانداعى كوپبالالى اتا-انالاردىڭ الىپ جۇرگەن جاردەماقىسىن «وتە كوپ» دەگەن ەدى.

ايتۋىنشا، قازاقستاندىق انالار مەملەكەت بيۋدجەتىنەن ميلليونداعان اقشا الادى ەكەن. ءمينيستردىڭ ايتقانىنا شامدانباعان، اشۋعا مىنبەگەن حالىق جوق، ءبارى دەرلىك ورە تۇرەگەلدى. ولار  مينيسترگە رەنىشتەرىن ءبىلدىرىپ، الىپ جاتقان جاردەماقىلارىنىڭ مولشەرىن مىسالعا كەلتىرىدى. الەۋمەتتىك جەلى قولدانۋشىسى 5 بالانىڭ اناسى اقمارال باسيروۆا 2009 جىلدان بەرى مەملەكەتتىڭ بەرگەن جاردەماقىسىن تاپتىشتەپ ساناپ، سونىڭ ءبارىن ءمينيستردىڭ وزىنە قايتارماق. اقمارال باسيروۆانىڭ Facebook-تەگى جازباسى تومەندەگىدەي:

«كوپبالالى انا رەتىندە مىنانى ايتايىن: الگى ەڭبەك جانە الەۋمەتتىك قورعاۋ ءمينيسترى ءابىلقاسىموۆا قاتتى قاتەلەسىپ وتىر نەمەسە وزگە عالامشاردا ءومىر سۇرەتىن سەكىلدى مە؟! قولىنا بيلىك ءتيىپ، كوكتە سامعاپ ءجۇر-اۋ شاماسى. ءتىپتى ءوز ەلىندەگى كوپبالالى اتا-انالاردىڭ قالاي، قانداي جاعدايدا ءومىر سۇرەتىنىن بىلمەيدى دە. جەرگە ءتۇسىڭىز، ءابىلقاسىموۆا حانىم!

ونداي وتباسىلارعا مەملەكەت قالاي قامقورلىق جاساپ جاتقانىن جاقسى بىلەمىن.

5 بالانى دۇنيەگە اكەلىپ، ءوسىرىپ وتىرعان مەن 10 000 تگەڭگە الاتىنمىن. ياعني، ءار بالاما شاققاندا 2000 تەڭگە.

2018 جىلدىڭ شىلدەسىندە جاردەماقىنى الىپ تاستاپتى، جەكە كومپانيام بارىن كورگەن بولۋ كەرەك.

الايدا بۇعان قاباق شىتقان مەن جوق. 10 000 تەڭگە الىپ، بايىپ كەتكەن جوقپىن نەمەسە الماي كەدەيلەنىپ كەتپەدىم. الايدا ءتىپتى ءبىر نان مەن سۇتكە اقشا تاپپاي قالعان ساتتەر بولۋشى ەدى، وندايدا مەملەكەتتىڭ بەرگەن تيىن-تەبەنى كومەكتەسەتىن. جارايدى، ءبىزدى قويشى، اۋىل ايماقتارداعى كوپ بالالى انالاردىڭ ءحالى نە بولىپ جاتىر؟ بۇل سۇراق ءمادينا ءابىلقاسىموۆانى تىم بولماعاندا ءبىر رەت الاڭداتتى ما ەكەن؟ ولاردىڭ قانداي جاعدايدا ءومىر ءسۇرىپ جاتقاندارىن ءوز باسىم جاقسى بىلەمىن. ءابىلقاسىموۆا حانىم، مەنىمەن بىرگە اۋىل مەن اۋدانداردى ارالاپ شىعۋعا قالاي قارايسىز؟ كوزىڭىزدى اشايىن!

تەك «تۋساڭدار، وزدەرىڭ ءۇشىن، مەملەكەت سەندەرگە مىندەتتى ەمەس» دەپ ايتۋدىڭ قاجەتى جوق. ال ەگەر سول كوپبالالى وتباسىنان شىققان ءبىر بالاقاي چەمپيون بولىپ، قازاقتىڭ اتىن شىعارسا، اينالىپ-تولعانىپ كەتەسىڭدەر عوي.

«بۇل ءبىزدىڭ قازاقستاننىڭ ازاماتى! جارايسىڭ!» دەگەن قۇر ماقتاۋدان اۋىزدارىڭىز بوساماي جاتادى.

قۇددى ءبىر مەملەكەتىمىزگە جەڭىس سىيلاعان بالاعا وزدەرىڭىز قوراپتاپ التىن بەرگەندەي... سىيلامايسىزدار، اسىرەسە، انالاردى قۇرمەتتەمەيسىزدەر! سىزدەر كوپبالالى انالارعا «تۋىپ الىپ، بالاسىن باعا الماي وتىرعان ءبىر بەيباق» دەپ قارايسىزدار.

ۇيات! ماسقارا!» - دەپ جازعان انا كەلەسى كۇنى-اق مەملەكەتتەن العان جاردەماقى كولەمىن شىعارىپ بەردى. ماقساتى – سونىڭ ءبارىن مەملەكەتكە قايتارىپ بەرۋ!

«2009 جىلى دۇنيەگە ءتورتىنشى بالام – سۇلتان كەلدى دە، مەن كوپبالالى انا اتانىپ شىعا كەلدىم.

سول ساتتەن باستاپ اي سايىن جاردەماقى الىپ تۇردىم. ءار ايدىڭ 5ء-ى كارتوچكاما اقشا تۇسەتىن.

2011 جىلى دۇنيەگە كاۋسار اتتى ءتاتتى قىز الىپ كەلدىم.

ال ەندى 2009 جىلدان باستاپ مەملەكەتتەن العان جاردەماقى مولشەرىن ساناپ بەرەيىن سىزدەرگە.

2009 جىلى ءتورت بالام ءۇشىن – 5472 تگ = جىلىنا 60 660 تگ؛

2010 جىلى – 5940 تگ = 66 132 تگ؛

2011 جىلى بەس بالام ءۇشىن – 6006 تگ = 72 072 تگ؛

2012 جىلى – 6428 تگ = 77 136 تگ؛

2013 جىلى – 6876 = 82 512 تگ؛

2014 جىلى – 8246 تگ = 98 952 تگ؛

2015 جىلى – 8705 تگ = 104 460 تگ؛

2016 جىلى – 8824 تگ = 105 888 تگ؛

2017 جىلى – 9440 تگ = 113 280 تگ؛

2018 جىلى – 10 005 تگ = ماۋسىمنان باستاپ توقتاعانىنا بايلانىستى جالپى 60 030 تگ الىپپىن.

سونىمەن بايلىعى تاسىپ تۇرعان مەملەكەتىمە مەن، كوپبالالى انا 841 112 تەڭگە قارىزبىن. ءارى سول قارىزدى ءمادينا ءابىلقاسىموۆاعا قايتارىپ بەرەتىنىمدى اشىق تۇردە جانە ماقتانىشپەن مالىمدەيمىن. ول 1 000 000 تگ ايلىعىن ازدىق ەتەتىن سەكىلدى».