1 مامىر قازاقستان حالقى بىرلىگى كۇنىن تويلاپ جاتقاندا، بەيبىت ەلدىڭ بەرەكەسىن قاشىرۋدى كوزدەگەن الدە ءبىر پروۆاكاتلار الماتى قالاسىنىڭ، ساين جانە شالياپين كوشەلەرىنىڭ قيىلىسىندا موتوشەرۋ ۇيىمداستىرىپ، وزدەرىمەن بىرگە قىلىشىنان قان تامعان كەڭەستەر ودارىعىنىڭ قىزىل بايراعىن كوتەرىپ شىققان.

سوڭعى ۋاقىتتا الەۋەتكە يە بولىپ كەلە جاتقان الەۋمەتتىك جەلى قولدانۋشىلارى مۇنى پروۆاكاسيالىق ارەكەت دەپ ءتۇسىنىپ، زاڭ الدىندا جاۋاپقا تارتۋ كەرەك دەگەن پىكىرلەر بىلدىرۋدە. دەسە دە، قۇزىرلى ورگانداعىلار ازىرگە ءۇنسىز. ياكي، شاتاققۇمار شەرۋشىلەردىڭ ۇستىنەن ءالى شاعىم تۇسپەگەن.

ەستەرىڭىزدە بولسا، قازاقتىڭ ماقتانىشى گەنا گولوۆكيننىڭ كەزەكتى جەڭىسىنەن كەيىن، استانالىق جىگىت قۋانىشىن ءبولىسىپ، ءوز ءۇيىنىڭ كوشەگە قاراعان بولكونىنا ق ر مەمەلەكەتتىك تۋىن ءىلىپ قويعاندا، ءبىزدىڭ شاش ال دەسە، باس الاتىن پوليسايلار پاتريوت جىگىتتكە 400 مىڭ تەڭگە كولەمىندە ايىپپۇل سالعان بولاتىن. بۇل كەزدە دە الەۋمەتتىك جەلى قولدانۋشىلارى بەلسەندىلىك تانىتىپ، جالپى حالىق بولىپ جاس پاتريوتقا اراشا تۇسكەن بولاتىن.

راس، قازاقستاننىڭ اكىمشىلىك قۇقىق بۇزۋشىلىق تۋرالى كودەكسىندە مەملەكەتتىك رامىزدەردى زاڭسىز پايدالانۋعا جاۋاپكەرشىلىك كوزدەلگەن. اتالمىش زاڭنىڭ بۇرىنعى نۇسقاسىندا، مۇنداي ارەكەتى ءۇشىن 200 اەك (ايلىق ەسەپ كورسەتكىشى) كولەمىندە ايىپپۇل كوزدەلگەن. ال كورشى رەسەيدە ءدال وسىنداي جاعدايدا ازاماتقا 2000 رۋبل كولەمىندە عانا ايىپپۇل سالىنادى. سول كەزدە، ءبىزدىڭ پارلامەنتتەگىلەر وزدەرى ماقۇلداعان زاڭنىڭ جاڭساق ەكەنىن ءتۇسىندى مە، ايتەۋىر ءبىرقاتار دەپۋتات اعالارىمىز پاتريوت جىگىتكە قولداۋ بىلدىرگەن بولاتىن. ءتىپتى، بۇرىنعى سەنات دەپۋتاتى عاني قاسىموۆ مىزرا "مۇنداي ءپاتريوتيزمنىڭ ۇلگىسىن كورسەتكەن جىگىتكە 400 مىڭ ايىپپۇل ەمەس، 400 مىڭ تەڭگە سىياقى بەرۋ كەرەك"، دەگەن ەدى.

بۇل مەملەكەتتىك ءرامىز. دۇرىس!  ونى قۇرمەتتەۋىمىز كەرەك، زاڭسىز جەرلەرگە پايدالانا بەرمەۋىمىز كەرەك. ايتپەگەندە، ايىپپۇل سالىنىپ، زاڭ الدىندا جاۋاپقا تارتىلادى ەكەنبىز.

ال تاپا-تال تۇستە، اشىقتان-اشىق، ناسيستىك، ناسيوناليستىك ارەكەتكە بارعان باسسىزدىققا قۇقىق قورعاۋشىلار (پوليسايلار) تاراپىنان قانداي جاۋاپ بولادى؟

مىسالى، وسىنىڭ الدىندا ليتۆانىڭ ۆيلنيۋس قالاسىنىڭ تۇرعىنى، زەرگەر ارۆيداس گۋرياۆيچيۋستى  قۇقىق قورعاۋ قىزمەتكەرلەرى ءوز بالكونىنا كەڭەس وداعى مەن كەڭەستىك ارمەنيانىڭ تۋلارىن ءىلىپ قويعانى ءۇشىن تۇتقىنداعان.

ليتۆادا كەڭەستىك جانە ناسيستىك رامىزدەردى دارىپتەۋگە 2008 جىلدان باستاپ تىيىم سالىنعان. كسرو تۋى، سونداي-اق وراق پەن بالعا، قىزىل بەسبۇرىشتى جۇلدىز سياقتى كەزىندەگى كەڭەستىك سيمۆوليكالار ليتۆادا زاڭمەن قۋدالانادى. ءتىپتى، كەڭەستىك باسشىلاردىڭ پورترەتتەرىنە دە مۇندا قاتاڭ تىيىم سالىنعان.

سونداي-اق، ۋكراينا مەملەكەتى دە كسرو سيمۆولدارىن دىرىپتەۋگە، تۋىن، گيمنىن نەمەسە باسقا دا بەلگىلەرىن ەل تەرريتورياسىندا قولدانۋعا زاڭمەن تىيىم سالعان. لاتۆيادا دا ءدال وسىنداي زاڭ كۇشىنە ەنگەن. مۇنداي ارەكەت ءۇشىن 2،5 مىڭ لات نەمەسە 15 تاۋلىككە قاماۋعا الىنادى. بۇلاردىڭ قاتارىنا ۆەنريا، ەستونيا، پولشا جانە گرۋزيادا دا كىرەدى. ياعني، بۇل ەلدەردە كسرو سيمۆولدارىنا كونستيتۋسيامەن تىيىم سالىنعان.