انە-مىنە دەگەنشە، جۇرتتى كوك جاشىك پەن يۋتۋبكە تەلمىرتكەن "كەلىنجان" تەلەحيكاياسى مارەسىنە جەتتى. قازاق كينووندىرىسىنىڭ بوساعاسىنان سىزىلا سالەم بەرىپ كىرگەن "كەلىنجان" كوپتىڭ كوڭىلىنىڭ تورىنە جايعاستى. جۇرت ماقتاعان تەلەحيكايانى مەن دە تۇگەل كورىپ شىقتىم. سونىمەن، "كەلىنجان" نەگە حيت بولدى؟

"كەلىنجان" – ەشكىمدى ايمالاستىرماي دا، سۇيىستىرمەي دە سەريال تۇسىرۋگە بولاتىندىعىن دالەلدەگەن سوڭعى ۋاقىتتا شىققان تەلەحيكايالاردىڭ ەڭ ۇزدىگى. كوبىرەك كورەرمەن تارتۋ ءۇشىن 18 + ارەكەتتەردى كورسەتۋگە قۇمار پروديۋسەرلەردىڭ "ەتەكتى اشپاي-اق، ابىرويدى شاشپاي-اق حيت تۋىندى شىعارۋعا بولادى ەكەن عوي"،– دەپ، اۋزى اشىلىپ قالعان شىعار، ءسىرا... مادىبەك پەن ۆاليانىڭ جاسىرىن "ارەكەتىنىڭ" ءبىر شەتىن دە كورسەتپەي وقيعانى ءارى قاراي ءوربىتىپ جىبەرگەنىنە تاڭداناسىڭ.

اكتەرلەر وتە ءساتتى تاڭدالعان. ءارقايسىسى ءدال وسى ءرول ءۇشىن تۋعانداي. قۇددى ءبىر سول اۋىلدىڭ تۇرعىندارىن كاستينگتەن وتكىزىپ، تاڭداپ العانداي. ءاربىرى ءرولدى شىن سەزىنەدى، شىن سەندىرەدى. ايسارانىڭ قۇبىلمالى وبرازى مەن بالقيانىڭ جاعىمپازدىعى ەرىكسىز ەزۋىڭە كۇلكى سىيلايدى.

ءار ۇساق-تۇيەگىنە دەيىن ءساتتى ۇيىمداستىرعان. اۋىلدىڭ كيىنۋ ءستيلى، داستارحانداعى ءشاي مەن قانت، قازان-وشاقتىڭ اينالاسى، ءبارى ورىن-ورنىمەن. "مىنا جەرى وتىرىك بولىپ كەتىپتى" دەپ اتتەڭ-ايعا" سالىناتىن كادلارى از.

كورشىلەردىڭ ءپروتوتيپى دە شىنايى شىققان. قاي ۇيدە قوناق كەلسە، سول ۇيدە جۇرەتىن بايانىن كوتەرگەن ىشكىش كورشى دە، كۇيەۋىنىڭ اراق قويعانىن تىلەپ، ءتاۋىپ جاعالاعان اۋىلداعى ءنومىرى ءبىرىنشى وسەكشى ايەل دە ءوز رولدەرىن ءساتتى الىپ شىقتى.

كەيىپكەرلەر ومىردە بار. ءدال وسىنداي وتباسىنىڭ ءومىرىن كورسەتپەسە دە، ءدال وسىنداي ادامدار ومىردە بار. ءبارىمىزدىڭ اۋلەتىمىزدە ءبىر ايسارا، ءبىر بالقيا، ءبىر زيادا، ءبىر زيادا، نە ءبىر قىلىشبەك بار. ونى ءبارى مويىندايدى. ءار كەيىپكەردەن ءوزىمىزدى، نە تانىسىمىزدى تانىدىق. تەلەحيكايا بىزگە سول ءۇشىن مايداي جاقتى. ابىسىندار اراسىنداعى تايتالاس، اۋىلدان قاشقان كەلىندەر، ەنشىسىن الۋعا اسىققان وتباسى، ءبارى-بارى بار ومىردە بار ادامدار.

پروديۋسەر ناعىز اۋىلدان شىققان ادام. يا، بۇل دا تەلەحيكايانىڭ شىنايى شىعۋىنا اسەر ەتەدى. قالادا تۋىپ، قالادا وسكەن ادامنىڭ تۋىندىسى وسىنشا حالىقتىڭ جۇرەگىنە جەتپەس ەدى. ءوزىنىڭ وسكەن ولكەسى مەن كەلىن بولىپ تۇسكەن اۋىلىنىڭ تىرشىلىگىنەن كورگەن-بىلگەنىن قاعازعا ءتۇسىرىپ، ودان ۇلكەن تەلەحيكايا تۋدىرعان پروديۋسەردىڭ توككەن تەرى مەن ەتكەن ەڭبەگى اقتالدى دەگەن ءسوز.

كۇلكى دە سىيلادى، جىلاتتى دا. ۇلگى كورسەتىپ، ءجون سىلتەۋدى دە ۇمىتپادى. استارلاپ وتىرىپ تالىم-تاربيە بەردى. "بۇل ءۇيدىڭ كەتكەن قىزى قايتىپ كەلمەيدى، كەلگەن كەلىنى قايتىپ كەتپەيدى" دەگەن كەمپىردىڭ ءبىر ءسوزىنىڭ وزىندە تەرەڭ ماعىنا بار.. تالاي ونەگەلى ءسوزدى قاسىم شال ارقىلى دا ايتقىزدى. كىشى كەلىنىنىڭ سوڭعى شەشىمىنەن دە الاتىن ونەگە بار.

اقەركە ءابىلحان