زۇلمات. وتكەندە استانادا ءبىراز تاريحشىلارمەن اقىلداسقانداي بولدىق. مىناداي وي كەلدى. بۇگىندە ساياسي احۋال دا، بيلىگىمىزدىڭ ساياساتى دا تاريحتىڭ شىنايى زەرتتەلۋىنە مۇمكىندىك بەرىپ جاتقان جوق. ساياسات تا، تاريح عىلىمى دا بەلگىلى دارەجەدە تىعىرىققا تىرەلىپ وتىر. جاڭا تاريحي جانە ساياسي كونسەپسيالار اۋاداي قاجەت ەكەنى سوقىرعا دا كورىنىپ، كەرەڭگە دە ەستىلىپ جاتىر. مەنىڭ ويىمشا، 1931-1933 جىلعى اشارشىلىقتى ستاليندىك-بولشيەۆيكتىك جۇيەنىڭ باسقا دا قىلمىستارىنان ءبولىپ الىپ كورسەتۋ مۇمكىن
ەمەس. شىنداپ كەلەتىن بولساق بۇل زۇلمات 1916 جىلعى كوتەرىلىستەن باستالىپ، ۇزىلمەي جالعاسقان قازاققا قارسى، ادامگەرشىلىككە قارسى جاسالعان وتارشىلدىق قىلمىس. ياعني بۇنىڭ بارلىعىن كەشەندى تۇردە قاراستىرۋ قاجەت. كەلەسى جىلى 1916 جىلعى كوتەرىلىستەردىڭ ءجۇزجىلدىعى بولادى. ەستۋىمشە قىرعىز باۋىرلارىمىز اتاپ وتۋگە مىقتاپ دايىندالىپ جاتىر. بىزدە بىرەن-ساران عالىمدارىمىز بولماسا تاقىرىپتى زەرتتەپ، قاۋزاپ جۇرگەندەردىڭ سانى شامالى. مەملەكەتتىك دارەجەدە اسا ۇلكەن قادامدار جاسالادى دەگەنگە سەنە بەرمەيمىن. قاۋىم بولىپ باستاماساق، قوعامدى اياعىنان تىك تۇرعىزباساق ءۇنسىز قالاتىن ءتۇرى بار. ايتپاعىم: وسى 2016 جىلى ءبارىمىز جابىلىپ 1916-1933 جىلدار ارالىعىنداعى زۇلمات، تاريحتاعى "القاكول سۇلاما" دەگەن سياقتى زوبالاڭ كەزەڭ دەگەندى ناسيحاتتاپ، عىلىمي، اقپاراتتىق تۇرعىدان ناسيحاتتاپ، زاڭداستىرىپ كورسەك.
جانە دە بۇنى وزگە تىلدەرگە اۋدارۋدىڭ قاجەتى جوق. زۇلمات دەپ الىپ، وزگە تىلدەرگە دە ەنگىزىپ كورۋ قاجەت. ەۆرەيلەر ءوز تراگەدياسىن حولوكوست دەپ الەمگە مويىنداتتى. ۋكرايندار گولودومور دەپ الىپ، بۇۇ، ەۋروپارلامەنت دارەجەسىندە دالەلدەدى. بىزدەر دە وسىعان ۇمتىلۋىمىز قاجەت.
جانە دە مىنانى ءۇستى-ۇستى ايتا بەرۋىمىز قاجەت: ۇلت تراگەدياسىن، قازاق قاسىرەتىن ايتقاندا بىزدەر بىرەۋدەن كەك الۋ ءۇشىن ايتىپ جاتقان جوقپىز. بۇل اتا-بابالار، ارۋاقتار الدىنداعى پەرزەنتتىك، ۇرپاقتىق پارىزىمىز. بۇنى باسقاعا قايتالاپ، قان قاقساتۋ ءۇشىن ەمەس، ۇىمتپاۋ، قايتالاتقىزباۋ ءۇشىن ايتىپ وتىرمىز.
تاريح تەك مەيرامنان، جەڭىستەردەن قۇرالمايدى. ۇلتتىڭ ۇلىلىعى، زيالىلىعى تراگەديادان ساباق الا الۋىندا. ءبىزدىڭ ۇلت رەتىندەگى وتارسىزدانۋىمىزدىڭ قاعيداسى بىرەۋ: ءبىز قۇل ەمەسپىز، ەندى ەشقاشان قۇل بولمايمىز، ەشكىمدى قۇل قىلعىمىز كەلمەيدى.ايدوس سارىم. facebook
