قوس مەرەكە – وتان قورعاۋشىلار جانە جەڭىس كۇندەرى قارساڭىندا  ءداستۇر بويىنشا سوعىس ارداگەرلەرىن، قارتتاردى ستۋدەنتتەرمەن قاۋىشتىرۋ ادەتكە اينالعان. بيىلعى كەزدەسۋ 30 ءساۋىر كۇنى ءقازۇۋ-نىڭ «اينالاڭدى نۇرلاندىر» باعدارلاماسى اياسىندا جەڭىستىڭ 70 جىلدىعى قۇرمەتىنە ارنالعان فيلولوگيا، ادەبيەتتانۋ جانە الەم تىلدەرى فاكۋلتەتى جالپى ءتىل ءبىلىمى جانە شەتەل فيلولوگياسى كافەدراسىنىڭ ۇيىمداستىرۋىمەن الماتى قالاسىنداعى قالالىق قارتتار ۇيىندە بولدى. قارت ارداگەرلەردىڭ «ءتورت جىلداي فاشيستەرمەن سوعىسىپ «ەرلىك جاساماي» سۇراپىل سوعىستان ءتىرى ورالعانىم، 85-تەن اسقانشا جۇمىس ىستەگەنىم اڭىز عوي،»-، دەپ بايانداعانى پاتريوتتىق سەزىمدى وياتتى. وزدەرى جانە سوعىس جايىندا ءماندى ءارى ناقتى ادام سەنگىسىز دەرەكتەردى كەلتىرىپ، سۇراپىل سوعىستىڭ مايدانىن كوز الدىمىزعا ەلەستەتىپ، ءبىر اكادەميالىق ۋاقىت شەڭبەرىندە اڭگىمە سۇقپاتىن ايتتى.  ءتىرى اكە-شەشەسى بولا تۇرىپ بالالىق شاقتى كورمەگەنى، مەكتەپتە وقىعانى، بىرنەشە اشارشىلىق كەزەڭدەردەن وتكەنى، ەلدەن ەلگە كۇشتەپ كوشىرىلگەنى تۋرالى ءسوز قوزعاعاندا، جاستاردىڭ اراسىنان، «...اي، جالعان زامان-اي، كوپ جاساپ يماندى بولا بەرىڭىز...»، دەگەن سوزدەر دە ەستىلىپ جاتتى. جاسىنا قاراماي سەرگەك اقساقالداردىڭ ايتۋى بويىنشا، العاشىندا بىزدەردى تەك جۇمىس باتاليونىنا السا، سونان جامبىلدىڭ ۇندەۋى شىققان سوڭ عانا سوعىسقا شاقىرىلا باستادىق دەدى. سوعىس مەزگىلىندە قارۋ-جاراقسىز، بىرنەشە كۇن تاماقسىز قالعاندارىن، قارۋ قۇرالى ەسەبىندە بوتەلكەگە قۇيىلعان جارىلعىش زاتتارى عانا بولعانىن، ال فاشيستەردىڭ موتورلى كولىكتەرى، اۆتوماتتى قارۋلارىمەن سوعىسقانىن قىنجىلا ءارى باتىرلانا ايتتى. قىزىعى، وسىنشا كۇندەردى باسىنان كەشىرىپ جۇرگەنىن، باتىرلىق جاسادىم دەمەيدى، «سول كەزدەگى قاتارداعى جاۋىنگەردىڭ ءبىرى ەدىم،»-، دەپ قورىتىندىلادى. سوعىستان ورالعان سوڭ تەمىرجولدا تىركەۋشى جانە ءتۇرلى جۇمىستار اتقارىپ، مال اسىراپ سەكسەننەن اسقانشا وتباسىندا وتىرىپ قالماي جۇمىستان قول ۇزبەپتى، جۇبايىنان توعىز جىل بۇرىن ايىرىلعان سوڭ، تەڭدەستەرىممەن بىرگە بوليىن دەپ قارتتار ءۇيىن مەكەن ەتكەن ەكەن.  تاعى دا ءبىر اقساقالىمىز سوعىس جىلدارىندا مەكتەپ جاسىنا تولماي تۇرىپ ماقتانىڭ قاۋاشاعىن ارشىپ، كۇنىنە 20 كەلى ماقتا وتكىزگەنى ءۇشىن نانعا تالون العانىن، سول بەينەتتىڭ زەينەتىن قازىرگى كەزدە زەينەت اقىعا پرەزيدەنتتىڭ جارلىعىمەن قوسا تەڭگە تولەۋدە دەپ ريزاشىلىعىن ايتسا، تاعى ءبىرى بيدايدىڭ ماساعىن تەرگەنىن قىزىقتى مانمەن ايتىپ، جەردى وعان قوسا ەلدى ءسۇيۋدىڭ ماعناسىن بايانداي وتىرىپ، قازىرگى زاماندا ءومىر ءسۇرىپ جۇرگەندەر اتا مەن اجەلەرىنە بورىشتى ەكەنىن تىڭداۋشىلارعا اسەرلەپ جەتكىزدى. اتا-بابالارىمىزدىڭ باستاعان جولىن جالعاستىرۋ ءۇشىن كۇندەلىكتى وقۋدان اسكەريلەردەي تارتىپتە جوعارى دەڭگەيدە تەرەڭدەتە ۇزبەي ءبىلىم الىپ، وتانىمىزدىڭ قاجەتتى، سۇرانىسقا يە مامانى بولۋعا وتىرعانداردى شاقىردى. كەزدەسۋ ءماندى ءوتتى. سوعىس جانە تىل ارداگەرلەرىنە ەستەلىك رەتىندە ستۋدەنتتەردىڭ قولىمەن دايىندالعان، جاسالعان ونەر تۋىندىلارىن ۇسىنىلىپ،  العىس پەن قۇرمەت كورسەتىلدى. ءبىز بۇگىن جەڭىس كۇنىمىزدىڭ جەتپىسىنشى كوكتەمىن قارسى الۋدامىز. ەگەمەندى ەل بولدىق، قانداستارىمىزدىڭ سانى كوبەيۋدە، جەرىمىز كوركەيىپ، ەلىمىز قارقىنداپ دامۋ جولىندا. ىرگەمىز بەرىك، قادامىمىز قۇتتى. مىنە وسىنداي ارداگەر اقساقالدار بولعانى ءۇشىن بىزدەر باقىتتىمىز، ولاردىڭ جەتىستىكتەرى مەن وتباسىنىڭ كوبەيىپ وسكەنىنە كۋاگەرمىز، ەلىمىز سوعىس-تىل ارداگەر-باتىرلارىنا كوپ جاقسىلىق كورسەتىپ، توقشىلىقتا، بەيبىتشىلىكتە ءومىر سۇرە بەرۋىنە مۇمكىنشىلىك جاساپ، مايدانگەر اقساقالدارىن باستارىنا كوتەرىپ، قوشامەت كورسەتۋدە ەكەنىنە قۋانامىز.

ۇيىمداستىرۋشىلار: س.ا. سۋلەيمانوۆا، ن.ا. ۋتەمگالييەۆا، ا.ت. الياكباروۆا، گ. يسكاكوۆا

دايىنداعان: س.ا. سۋلەيمانوۆا