كەشە ماسكەۋدە گەرمانيا كانسلەرى انگەلا مەركەل حانىم رف پرەزيدەنتى ۆلاديمير پۋتينمەن كەزدەستى، دەپ حابارلايدى ريا نوۆوستي.

9 مامىر قارساڭىندا مەركەلدىڭ  ماسكەۋگە بارۋىن باتىس جۋرناليستەرى سىڭارجاق باجايلاعانىمەن، انگەلا مەركەل ساپارىنىڭ ماقساتى بولەك ەدى.

بىرىنشىدەن، ەكىنشى دۇنيەجۇزىلىك سوعىستىڭ اياقتالعانىنا، جەڭىستىڭ 70 جىلدىعىنا وراي، ەكى ەل باسشىلارى "بەلگىسىز جاۋىنگەردىڭ" مونۋمەنتىنە گۇل شوقتارىن قويىپ، تاعزىم جاسادى. بۇل جەڭىمپاز كەڭەستەر وداعىنىڭ مۇراگەرى - رەسەي ءۇشىن ابىروي، مىندەت سانالسا، جەڭىلىس تاپقان سول كەزدەگى فاشيستىك، قازىرگى بىتىمگەر - گەرمانيا ءۇشىن سوعىس قۇرباندارىنا، ارداگەرلەرگە قۇرمەت بولعانداي. مەركەل حانىم بۇل قادامى ارقىلى - وزدەرىنىڭ بويىنداعى "ءفاشيزمدى" جەڭگەندىكتەرىن كورسەتتى. پۋتين مىرزا شە؟

ەكىنشىدەن، مەركەل حانىم ماسكەۋگە رەسمي ىس-ساپارمەن كەلدى. ول كرەملدە ۆ. پۋتينمەن ەكى ەل اراسىنداعى ىنتىماقتاستىقتىڭ كەلەشەگى تۋرالى سويلەستى. الداعى ۋاقىتتا دا حالىقارالىق ماسەلەلەردى بىرلەسىپ شەشۋگە، ەكى جاقتى قاتىناستى كۇشەيتۋگە قاتىستى ماسەلەلەردى تالقىلادى. ەكى ەل باسشىلارىنىڭ كەزدەسۋى 2 ساعاتقا سوزىلىپ، ناتيجەسىندە رف مەن ەو اراسىنداعى بايلانىستى ارتتىرۋ، ۋكراينا داعدارىسىن بىرلەسىپ شەشۋ تۋرالى كەلىسىمدەرگە قول قويىلدى. ال دونباسستاعى جاعدايعا رەتكە كەلتىرۋگە  قاتىستى پۋتين مەن مەركەل "نورماد تورتتىگى" فورماتىندا كەلىسسوزدەر وتكىزۋ تۋرالى كەلىسىمگە كەلدى.

اشىق كەلىسسوزدەر بارىسىندا گەرمانيا كانسلەرى "ساياسي تۇراقسىزدىق جانە داعدارىس كەزەڭىندە ەو مەن رف-نىڭ بىرلەسىپ جۇمىس ىستەۋى ماڭىزدى جانە ءبىز  ماسەلەنى شەشۋدىڭ ديپلوماتيالىق جولىن قاراستىرۋىمىز كەرەك"، دەدى. "سونىڭ ىشىندە بۇكىل الەمنىڭ نازارىنداعى "ۋكراينا داعدارىسى" بۇگىنگى كۇننىڭ باستى ماسەلەسى بولىپ وتىر جانە ول الەمدىڭ ماشستابتاعى ماسەلە"،-دەدى انگەلا مەركەل.

ال رەسەي پرەزيدەنتى پۋتين مىرزا، "2014 جىلعى كييەۆ بيلىگىندەدى "انتيكونستيتۋسيالىق" مەملەكەتتىك توڭكەرىستەرگە قاتىستى ەۋرو وداق ەلدەرى مەن رەسەي كوزقاراستارى ءبىر ۇدەدەن شىقپاسا دا، ءبىز ۋكراينا داعدارىسىنا قاتىستى، ونداعى جاعدايدى رەتكە كەلتىرۋدە ارى قاراي بىرلەسىپ جۇمىستار اتقارۋعا دايىنبىز"،-دەدى. سونداي-اق پۋتين، نورماد فورماتى دەپ اتالاتىن (قۇرامىندا رف، گەرمانيا، فرانسيا جانە ۋكراينا بار) كەلىسسوزدەر  ءوزىنىڭ تيىمدىلىگىن كورسەتىپ وتىر. ءبىز ءدال وسى فورماتتا تالقىلاۋلار وتكىزۋىمىز كەرەك،دەدى پۋتين مىرزا.

ايتپاقشى، پۋتين ءوزىنىڭ ءسوزىنىڭ سوڭىندا، مينسك كەلىسسوزدەرىنە قاتىستى، "پروسەستەر بەلگىلى ءبىر دەڭگەيدە سۇراقتارعا جاۋاپ تاۋىپ بەرگەنىمەن، كەيبىر كۇردەلى ماسەلەلەردى شەشۋگە قاۋقارسىزدىق تانىتادى"، دەدى.

مەركەلدىڭ ماسكەۋگە ساپارىنىڭ نەگىزگى ماقساتى - ۋكراينا داعدارىسىن شەشۋگە باعىتتالعان. ءيا، باسقا-باسقا ەمەس، گەرمانيا ۋكراينا داعدارىسىنا، قىرىم اننەكسياسىنا، دونەسك رەسپۋبليكاسى مەن لۋگانسك رەسپۋبليكالارىنداعى ماسەلەلەرگە قاتىستى بىتىمگەرلىك جۇرگىزىپ وتىرعان ەكى مەملەكەتتىڭ ءبىرى بولىپ وتىر عوي.

نۇرگەلدى ءابدىعاني ۇلى