9 مامىر كۇنى ورال قالاسىندا «جەڭىس كۇنىن» سىلتاۋراتقان زاڭسىز اۆتوشەرۋ ءوتتى. ەستەرىڭىزدە بولسا، بىلتىرعى جىلى دا ورال قالاسىندا رەسەيدىڭ، كەڭەس وداعىنىڭ تۋىن كوتەرگەن اۆتوشەرۋ ۇيىمداستىرىلعان بولاتىن. (پەتروپاۆلدا دا وتكەن) بيىلعى 7 ماي كۇنى باتىس قازاقستان وبلىسى ىشكى ىستەر دەپارتامەنتى، جول-كولىك پوليسياسى بۇنداي اۆتوشەرۋ وتكىزۋگە تيىم سالىنعاندىعى تۋرالى حابار تاراتقان. الايدا، ونى قۇلاعىنا دا قىستىرماعان  ۇيىمداستىرۋشىلار اۆتوشەرۋدى كولەمدى ەتىپ جاساقتاپتى.

ورال قالاسىنداعى «دينا» ساۋدا ورتالىعىنىڭ الدىنا جينالعان اۆتوشەرۋدىڭ ءتۇرى-تۇسى، ءمان-مازمۇنى ادام تىكسىنتەردەي. كەڭەس وداعى مەن رەسەيدىڭ تۋىن جەلبىرەتىپ، «كولورود» تاسپاسى، ستاليننىڭ سۋرەتى باسقا ءتۇرلى-تۇستى سوۆەتتىك سيمۆولدارمەن بەزەندىرىلگەن كولىكتەر 50-دەن اسادى. ءتىپتى، كەيبىر ماشينالاردى اسكەري تەحنيكا تۇرىندە جاساپ، توبەسىنە «پۋشكا» ورناتىپ العاندارى دا بار. «ۋرالسكوە (يايسكوە) كازاچە ۆويسكا» بەلگىسى بار اسكەري كيىم، كەڭەس سولداتىنىڭ فورماسىن كيىنىپ، كەۋدەسىنە «الا قوڭىز» بەلگىسىن تاققان ورىس جاستارى، قىز-كەلىنشەكتەرى، ءتىپتى بالالارىنا دەيىن اۆتوشەرۋدە ءجۇر. «ستالين ءۇشىن»، «گيتلەر كاپۋت»، «بەرلينگە اتتاندىق» دەگەن سەكىلدى ايقۇلاق ۇراندار ءار ماشينانىڭ استى-مەن ۇستىندە ءورىپ ءجۇر. قىسقاسى، اگرەسسياعا تولى ءبىر اۋقىمدى ارەكەتكە بەتالعان ادامداردىڭ كەيپىن اڭداۋ قيىن ەمەس.

تيىم سالىنعان سوڭ، جول پوليسەيلەرى ولاردىڭ شەرۋ ۇيىمداستىرۋىنا رۇقسات بەرگەن جوق. بارلىعىنىڭ قۇجاتتارىن تەكسەرىپ، كەيبىرەۋىنە كولىكتەرىنە زاڭسىز قۇرىلعىلار (پۋشكا) ورناتىپ العانى ءۇشىن ايىپپۇل دا سالدى. بقو ىشكى ىستەر دەپارتامەنتىنىڭ باسشىسى ماحامبەت ابيساتوۆ ولارعا تيىم سالىنعان اۆتوشەرۋگە قاتىسۋعا بولمايتىنى تۋرالى ءتۇسىندىردى. اۆتوشەرۋ قالا كوشەلەرىندەگى قاتىناس قوزعالىسىنا كەدەرگى كەلتىرەتىنىن ايتىپ، ولاردى تاراپ كەتۋگە ۇندەدى.

ەندىگى سۇراق، ولار 9 مامىردا اۆتوشەرۋگە تيىم سالىنعانىن بىلە تۇرا نەگە ادەيى وسى شارانى ۇيىمداستىردى دەگەننەن تۋادى. ورال قالاسى رەسەيگە جاقىن تۇر جانە ونداعى ورىس-كازاكتاردىڭ سانى تىعىز ورنالاسقان. جەڭىستى سىلتاۋراتىپ، الدەبىر ارانداتۋ ارەكەتىنە ۇمتىلىپ وتىرماسىنا كىم كەپىل؟ مۇمكىن، وسى ارقىلى بيلىكتىڭ، حالىقتىڭ تامىرىن باسىپ كورگىسى كەلەتىن شىعار. جەڭىس كۇنىن تويلاي بەرسىن-اق، ونىڭ مەملەكەت كولەمىندە دە اتاپ ءوتىپ جاتىرمىز. ءبىراق، ءۇي ىشىنەن ءۇي تىككەندەي بولعان ورالدىق ورىستار تيىم سالىنعان اۆتوشەرۋمەن قالانى دۇرلىكتىرىپ، تۋ كوتەرىپ، نەنى دالەلدمەك؟ كەڭەس وداعىنىڭ تۋىن جەلبىرەتكەندەرى ءوز الدىنا، ال قازاقستاندا رەسەيدىڭ تۋىن كوتەرەتىن نە جوندەرى بار؟ ايتپاقشى، جول پوليسەيلەرى سول شەرۋدەگى ءبىر كولىكتىڭ قازاقستان تۋىن الىپ جۇرۋىنە رۇقسات ەتپەدى. سەبەبى، زاڭسىز شەرۋ، قيتۇرقى قيمىلداردا مەملەكەتتىك تۋىمىز قولجاۋلىق بولماۋى كەرەك. بۇل وتە دۇرىس قادام بولدى.

قورىتىندىلاي ايتساق، ۇيىمداستىرۋشىلار بۇل شەرۋگە ەرتە دايىندالىپ، ۇلكەن ماقساتپەن كىرىسكەنى بايقالادى. وسىنشا كولىكتى بەزەندىرىپ، ادامداردى ۇيىمداستىرىپ، زاڭسىز شەرۋگە الىپ شىعۋ، قۇقىق قورعاۋ وىندارىنىڭ تيىمىنا تۇكىرىپ قاراۋ ولاردىڭ ارعى ويىندا ءبىر ارامدىق بارىن اڭداتقانداي. ارينە، تىرناق استىنان كىر ىزدەپ، «جەلپ» ەتكەننىڭ ءبارىن جاۋ قىلۋ ويىمىزدا جوق. ءبىراق، ساقتىق تا كەرەك. ۋكراينانىڭ شىعىسىن ويرانداپ، قىرىمدى جاۋلاپ، كورشىلەرىنە لاڭ سالىپ جاتقان رەسەي سەپەراتيستەرى قازاقستاندى دا توڭىرەكتەمەيدى دەپ ايتا المايمىز. ولار وسىنداي «ۇلى جەڭىس» دەگەن ۇرداجىق ۇراندارمەن وزگەلەردى ەلەۋرەتىپ، سوڭدارىنا ەرتكىسى كەلەدى. ەلدىڭ تىنىشتىعى مەن بىرلىگىنە، وتاننىڭ تۇتاستىعىنا ىرىكتى سالعىسى كەلەدى. ءبىراق، قازاق حالقى ەندى ءوزىنىڭ ءبىر سۇيەم جەرىن دە وزگەلەردىڭ سۋماقى قولىنا بەرە المايدى جانە بۇنداي ارانداتۋشى، ارام ويلى «اۆتوشرۋلەردىڭ» لايىقتى تۇردە الدىن الىپ، اياعىنا تۇساۋ سالادى. ونداي كۇش بىزدە بار.

جەبە نويان

سۋرەت: tengrinews.kz