بىرنەشە كۇننەن بەرى ديماش تۋرالى ءتۇرلى پىكىرلەر ايتىلىپ تا، جازىلىپ تا جاتىر. ەڭ ءبىرىنشى حالىق ءارتىسىنىڭ ۇلى ءالي وقاپوۆ ديماش قۇدايبەرگەنوۆتىڭ حيت ءانى جوق ەكەنىن ايتىپ، باسى بالەگە قالعان ەدى. كەيىن ول ديماشتىڭ جانكۇيەرلەرىنەن كەشىرىم سۇرادى. سونداي-اق ول ديماشتى عاجاپ داۋىستى ءانشى ەكەنىن مويىندايتىنىن دا ايتقان بولاتىن. ەندى روزا رىمبايەۆا ۇلى تۋرالى جاعىمسىز پىكىرلەرگە جاۋاپ بەردى دەپ جازادى Qamshy.kz اقپارات اگەنتتىگى ۆرەميا سايتىنىڭ دەرەگىن نەگىزگە الىپ. 

روزا رىمبايەۆانىڭ ايتۋىنشا، جاعىمسىز پىكىرلەر ايتىلعان كەزدە اقتالىپ، كەشىرىم سۇراۋدىڭ قاجەتى جوق. ول مۇنداي جايتتان ۇندەمەي، جۇرتتىڭ سوزىنە ءمان بەرمەۋ كەرەكتىگىن ايتتى. 

"اركىم ءوز ويىن ايتۋعا قۇقىعى بار. ءالي كاسىبي مامان رەتىندە پىكىر ءبىلدىردى. سونداي-اق ول ديماشتى جامان مۋزىكانت دەپ ايتقان جوق. ديماش عاجاپ داۋىستىڭ يەسى. بۇكىل الەم ديماشتىڭ ۇلى ءانىن كۇتۋدە"، دەدى روزا رىمبايەۆا. 

سونداي-اق كسرو-نىڭ حالىق ءارتىسى لاكي كەسوگلۋ دا داۋلى ماسەلەگە قاتىستى دا ءوز پىكىرىن ءبىلدىردى. ونىڭ ايتۋىنشا، ءالي وقاپوۆتى جامانداپ، داتتاي بەرۋدىڭ قاجەتى جوق. 

"شىنىمەن دە، ديماشتىڭ ايتىپ جۇرگەن حالىق اندەرىنەن باسقا ءوزىنىڭ حيت اندەرى جوق. ءبىراق بۇل ديماشتىڭ كىناسى ەمەس. بۇعان ديماشقا ءان شىعارا الماي جۇرگەن قازاقستاندىق كومپازيتورلار كىنالى. ال ءالي بولسا وتە تالانتتى، ساۋاتتى ءانشى. ءوز پىكىرىن اشىق ايتقان ادامدى جەردەن الىپ، جەرگە سالۋدىڭ قاجەتى جوق"، - دەدى كسرو-نىڭ حالىق ءارتىسى. 

كسرو-نىڭ حالىق ءارتىسى ءاليدى داتتاعانداردىڭ كوبىسى ديماشتىڭ جانكۇيەرلەرى ەكەنىن ايتتى. 

"ارينە ديماشتىڭ بارلىق جانكۇيەرلەرى ءاليدى جەك كورىپ كەتتى دەپ ايتا المايمىن. ءبىراق ءاليدى بالاعاتتاپ، وتباسى تۋرالى جاعىمسىز پىكىردىڭ قاجەتى جوق"، - دەپ ءسوزىن اياقتادى  كەسوگلۋ. 

اۋدارعان: اسەل بولات قىزى