ەلباسى نۇرسۇلتان ءابىش ۇلى نازاربايەۆ 19 ناۋرىز كۇنى وكىلەتتىلىگىن توقتاتۋ جايىندا مالىمدەگەنىمەن قاتار، الداعى ۋاقىتتاعى قىزمەتىمەن دە بولىسكەن بولاتىن. بۇل تۋرالى Qamshy.kz اقپارات اگەنتتىگى حابارلايدى.

"وزدەرىڭىز بىلەسىزدەر، زاڭدارىمىزعا سايكەس مەن تۇڭعىش پرەزيدەنت – ەلباسى (ۇلت كوشباسشىسى) مارتەبەسىنە يە بولدىم. ەلەۋلى وكىلەتتىگى بار قاۋىپسىزدىك كەڭەسىنىڭ ءتوراعاسى رەتىندە قىزمەت ەتە بەرەمىن. «نۇر وتان» پارتياسىنىڭ ءتوراعاسى، كونستيتۋسيالىق كەڭەستىڭ مۇشەسىمىن. ياعني وزدەرىڭىزبەن بىرگە بولامىن. ەلىمىزدىڭ، حالقىمىزدىڭ قامى – مەنىڭ مۇددەم بولىپ قالا بەرەدى.

تاۋەلسىز قازاقستان مەملەكەتىنىڭ نەگىزىن قالاۋشى رەتىندەگى الداعى مىندەتىم – باسشىلاردىڭ جاڭا بۋىنىنىڭ بيلىككە كەلۋىن قامتاماسىز ەتۋ. ولار ەلىمىزدى جاڭعىرتۋ پروسەستەرىن جالعاستىراتىن بولادى. "- دەگەن بولاتىن ەلباسى.

ەندەشە ەلباسىنىڭ بيلىكتە سەنىم ارتىپ وتىرعان جاس بۋىن وكىلدەرى كىمدەر بولۋى مۇمكىن؟ 

باۋىرجان بايبەك، الماتى قالاسىنىڭ اكىمى

الماتى قالاسىنىڭ اكىمى  باۋىرجان بايبەك  «نۇر وتان» پارتياسى ءتوراعاسىنىڭ ءبىرىنشى ورىنباسارى قىزمەتىن اتقارعان. باۋىرجان قىدىرعالي ۇلى 1974 جىلى 19 ناۋرىزدا الماتى قالاسىندا تۋعان. ول  «بولاشاق» باعدارلاماسى بويىنشا گەتە ينستيتۋتتىن (برەمەن قالاسى، 1995) «نەمىس ءتىلى»؛ «بولاشاق» باعدارلاماسى بويىنشا ليۋبەك قالاسىنداعى جوعارى مەكتەپتى (گفر، 1998) پەداگوگ؛ ورتالىق ازيا ۋنيۆەرسيتەتىن (2002) حالىقارالىق ەكونوميست ماماندىقتارى بويىنشا بىتىرگەن.

الماتىنىڭ جاڭا اكىم بولىپ اۋىسقاندا باۋىرجان بايبەككە ەلباسى: «باۋىرجان بايبەك - وسىنداي لاۋازىمعا تاعايىندالىپ وتىرعان "بولاشاق" باعدارلاماسىنىڭ ءبىرىنشى تۇلەگى. ول سىرتقى ىستەر مينيسترلىگى جۇيەسىندە، پرەزيدەنت اكىمشىلىگىندە جۇمىس ىستەدى، "نۇر وتان" پارتياسى ءتوراعاسىنىڭ ءبىرىنشى ورىنباسارى بولدى. قاسىمدا جۇمىس ىستەي ءجۇرىپ، مەنىڭ قىزمەتىمدى كوردى، بۇكىل رەسپۋبليكامىزدى ارالادى، ماڭىزدى سايلاۋ ناۋقاندارىنا قاتىستى، ال ءبىزدى الدا پارلامەنتتىك سايلاۋ كۇتىپ تۇر، بۇل وڭاي سىناق ەمەس. ونىڭ قالا الدىندا تۇرعان مىندەتتەردى ەلدە جۇزەگە اسىرىلىپ جاتقان باعدارلامالار اياسىندا سىزدەرمەن بىرلەسىپ شەشە الاتىنىنا سەنىمدىمىن»، - دەپ باعا بەرگەن.

داۋرەن ابايەۆ، قازاقستان رەسپۋبليكاسى اقپارات جانە قوعامدىق دامۋ ءمينيسترى

دارەن ابايەۆ 2001 جىلى ءال-فارابي اتىنداعى قازاق مەملەكەتتىك ۇلتتىق ۋنيۆەرسيتەتىن ۇزدىك بىتىرگەن. وسى ۋاقىتقا دەيىن داۋرەن ابايەۆ  قازاقستان رەسپۋبليكاسى سىرتقى ىستەر مينيسترلىگىنىڭ ورتالىق اپپاراتىندا جۇمىس ىستەدى. سونىمەن قاتار، قازاقستان رەسپۋبليكاسىنىڭ ازەربايجانداعى جانە نيدەرلاند كورولدىگىندەگى ەلشىلىكتەرىندە ديپلوماتيالىق قىزمەت اتقاردى. 2007 جىلدىڭ مامىرى مەن 2007 جىلدىڭ جەلتوقسانى ارالىعىندا - قازاقستان رەسپۋبليكاسى سىرتقى ىستەر مينيسترلىگىنىڭ باسپا ءسوز قىزمەتى ءبولىمىنىڭ باستىعى بولىپ تاعايىندالىپ،  2007 جىلدىڭ جەلتوقسانى مەن 2008 جىلدىڭ جەلتوقسانى ارالىعىندا – قازاقستان رەسپۋبليكاسى پرەزيدەنتى پروتوكولىنىڭ باس ساراپشىسى، كونسۋلتانتى بولدى. 2008 جىلدىڭ جەلتوقسانى مەن 2009 جىلدىڭ قازانى ارالىعىندا - قازاقستان رەسپۋبليكاسى پرەزيدەنتى باسپا ءسوز حاتشىسىنىڭ ورىنباسارى، 2009 جىلدىڭ قازانىنان - قازاقستان رەسپۋبليكاسى پرەزيدەنتى اكىمشىلىگىنىڭ مەملەكەتتىك باقىلاۋ جانە اۋماقتىق-ۇيىمداستىرۋ جۇمىسى ءبولىمىنىڭ مەملەكەتتىك ينسپەكتورى، 2011 جىلدىڭ قازانىندا مەملەكەت باسشىسىنىڭ وكىمىمەن قازاقستان رەسپۋبليكاسى پرەزيدەنتىنىڭ باسپا ءسوز حاتشىسى بولىپ تاعايىندالدى. 2011 جىلعى شىلدەدەن - قازاقستان رەسپۋبليكاسى پرەزيدەنتىنىڭ كەڭەسشىسى بولسا، 2016 جىلعى 6 مامىردان قازاقستان رەسپۋبليكاسى اقپارات جانە قوعامدىق دامۋ ءمينيسترى قىزمەتىن اتقارادى. 

التاي سەيدىر ۇلى كولگىنوۆ، باتىس قازاقستان وبلىسىنىڭ اكىمى.

التاي سەيدىر ۇلى كولگىنوۆ 1978 جىلى دۇنيەگە كەلگەن. التاي كولگىنوۆ ا.ياسساۋي اتىنداعى حالىقارالىق قازاق-تۇرىك ۋنيۆەرسيتەتىن، ق ر پرەزيدەنتى جانىنداعى مەملەكەتتىك باسقارۋ اكادەمياسىن، «بولاشاق» باعدارلاماسى بويىنشا ۇلىبريتانيانىڭ ابەردين ۋنيۆەرسيتەتىن بىتىرگەن. مەملەكەتتىك جانە جەرگىلىكتى باسقارۋ ماگيسترى، حالىقارالىق كوممەرسيالىق قۇقىق ماگيسترى. 2000 جىلى قازاقستان رەسپۋبليكاسىنىڭ قارۋلى كۇشتەرىندە قىزمەت ەتكەن. 2001-2008 جىلدارى قازاقستان رەسپۋبليكاسى ادىلەت مينيسترلىگى، مەملەكەتتىك قىزمەت ىستەرى اگەنتتىگى جانە باس پروكۋراتۋرا ورگاندارىندا ءار ءتۇرلى لاۋازىمدا قىزمەت اتقارادى. 2008-2010 جىلدارى — «الاشمەدياگرۋپپ» ج ش س باس ديرەكتورىنىڭ ورىنباسارى. 2010-2012 جىلدارى ق ر پرەزيدەنتى اكىمشىلىگىنىڭ ايماقتىق-ۇيىمداستىرۋ جانە مەملەكەتتىك باقىلاۋ جۇمىستارى ءبولىمىنىڭ مەملەكەتتىك ينسپەكتورى قىزمەتىن اتقاردى. 2012-2013 جىلدارى باتىس قازاقستان وبلىسى اكىمىنىڭ ورىنباسارى. 2013-2016 جىلدارى ورال قالاسىنىڭ اكىمى قىزمەتىندە بولدى. 2016 جىلدىڭ 26 ناۋرىزىنان باتىس قازاقستان وبلىسىنىڭ اكىمى.

ەستەرىڭىزگە سالا كەتسەك 2016 جىلى ەلباسى نۇرسۇلتان ءابىش ۇلى التاي كولگىنوۆتى باتىس قازاقستان وبلىسىنىڭ اكىمى ەتىپ ءوزى تاعايىنداعان بولاتىن.

سامات ءابىش – ۇقك ءتوراعاسىنىڭ ءبىرىنشى ورىنباسارى

سامات ساتىبالدى ۇلى ءابىش 1978 جىلى 20 تامىزدا الماتى وبلىسىندا تۋعان. "ءداۋىر" باسپاسىنىڭ جەتەكشىسى. ق ر ۇقك اكادەمياسىن (2000)؛ رف سبق اكادەمياسىن (2002) بىتىرگەن. قازاق، ورىس جانە نەمىس تىلدەرىن بىلەدى. 2000 جىلدان - ق ر ۇقك ورگاندارىندا قىزمەت اتقارعان. 2006 جىلدىڭ ماۋسىم ايىنان - ق ر ادىلەت مينيستىرلىگى قىلمىستىق-ۇدەرىستىك، قىلمىستىق اتقارۋ باسقارماسىنىڭ قىلمىستىق-اتقارۋ زاڭناماسى ءبولىمىنىڭ باستىعى قىزمەتىن اتقاردى. 2006 جىلدىڭ قىركۇيەك ايىنان - ق ر ادىلەت مينيسترلىگى تىركەۋ قىزمەتى كوميتەتى ءتوراعاسىنىڭ ورىنباسارى، 2007 جىلى كوميتەت ءتوراعاسى، 2008 جىلدىڭ قازان ايىنان - ق ر ادىلەت مينيسترلىگىنىڭ جاۋاپتى حاتشىسى، 2010 جىلدان بەرى - ق ر ۇلتتىق قاۋىپسىزدىك قىزمەتى ورتالىق اپپاراتى ماماندار دەپارتامەنتىنىڭ باستىعى بولىپ تاعايىندالعان.

2007 جىلى «ەرەن ەڭبەگى ءۇشىن»، 2008 جىلى "استانانىڭ 10 جىلدىعى" مەدالدارىمەن ماراپاتتالعان.

جاقسىلىق ومار، وسكەمەن قالاسىنىڭ اكىمى

جاقسىلىق مۇقاش ۇلى ومار 1980 جىلى 28 قىركۇيەكتە الماتى وبلىسى الاكول اۋدانى ءۇشارال اۋىلىندا دۇنيەگە كەلگەن. 2001 جىلى اباي اتىنداعى الماتى مەملەكەتتىك ۋنيۆەرسيتەتىن ءتامامداعان.

جاقسىلىق ومار – ەكونوميكا عىلىمدارىنىڭ ماگيسترى. ەڭبەك جولىن 2001 جىلى مادەنيەت، اقپارات جانە قوعامدىق كەلىسىم مينيسترلىگىندە جەتەكشى مامان بولىپ باستاعان. ءار جىلدارى ق ر قارجى مينيسترلىگىندە، «قازاقستان» تەلەراديوكورپوراسياسىندا، شقو ىشكى ساياسات باسقارما باسشىسىنىڭ ورىنباسارى، كەيىن باسشىسى بولىپ قىزمەت ەتتى. 2011 جىلدان 2013 جىلعا دەيىن شقو مادەنيەت باسقارماسىنىڭ باسشىسى بولدى. وسكەمەن قالاسىنىڭ اكىمى بولعانعا دەيىن الماتى وبلىسى اكىمىنىڭ ورىنباسارى قىزمەتىن اتقارعان.