حالقىمىزدىڭ سالت-ساناسىنداعى قاسيەتتى ۇعىمداردىڭ ءبىرى – ۇلكەن ءۇي، قارا شاڭىراق. بۇگىنگى ۇرپاق سول قارا شاڭىراقتى قاستەرلەۋ تۇگىلى، وسى ءسوزدىڭ قانشالىقتى ماعىناسىنىڭ بار ەكەنىن تۇسىنۋدەن قالىپ بارا جاتقانداي ما، قالاي؟
كورشىمىز ۇيىنە ناۋرىز كوجەگە شاقىرىپ، ۇلكەندى-كىشى ىرگەدەگى ۇلكەن بولمەدە وتىرعانبىز. ۇياتتى كىسىلەر كەلىپ قالسا دەگەن ەسەپپەن تورگى جاققا بىر-ەكى بوس ورىن الىپ قويدىق. ءۇي يەلەرى قۇراق كورپەشەنى قالىڭداۋ سالعان ەكەن، ءبىر-بىر قۇس جاستىقتى قولتىقتاپ جانتايا كەتتىك. ارى-بەرىدەن اڭگىمە قىزىپ جاتىر. «باياعى قاريالار جوق-اۋ» دەپ قويامىن ىشتەي. ايتاتىنى – ساياسات، ۇساق-تۇيەك پەندەشىلىك ءازىل-قالجىڭ. ءبىر-بىرىن قاعىتىپ، رۋشىلدىقتان ارىگە بارا المايدى.
الدەن ۋاق جاسى 80ء-دى القىمداعان كەيۋانا كەلىپ كىردى. اجەمىزدى تورگە ۇزاتپاق بوپ ورنىمىزدان ورە تۇرەگەلدىك.
– وتىر، تۇگە! – دەپ تىيىپ تاستادى تاياعىن شوشاڭ ەتكىزىپ. – قايناعام جوق ەكەن دەپ قارا شاڭىراعىن سىيلاماي تورگە شىعاتىن مەنى ءبىر كورگەنسىز دەپ پە ەڭدەر؟ ءارۋاعىن اتتاسام، كىم بولعانىم؟ – دەدى دە، ىرگە جاققا وتىرا سالدى. 
شىركىن، باياعىنىڭ ادامدارى-اي! وسىدان قانشاما جىل بۇرىن و دۇنيەگە اتتانىپ كەتكەن قايناعاسىنىڭ قارا شاڭىراعىن سىيلاپ، وسى اۋلەتتى قۇرمەت ەتىپ، ءوز ورنىن بىلگەن اڭقىلداق اپام-اي!
سالدەن سوڭ «جۇمىستان كەش شىعىپ ەدىك» دەپ وسى اۋلەتتىڭ قىزمەت ۇستاعان بىرنەشە كەلىندەرى كەلىپ كىردى. تورگە شاقىرىپ ەدىك، سومكەلەرىن قولتىقتاعان كۇيى جەڭىل سالەم سالعانسىپ، تىزەمىزدى اتتاي ءوتىپ، تورگە ۇزادى. الگى قىسىر اڭگىمەنىڭ قىزىعىنا بەرىلگەن قارتتاردى توقتاتىپ قويىپ:
– قارا شاڭىراق – مەيلى، ول كىم بولسىن، كەلىن بە، كۇيەۋ مە، بولە مە، جيەن بە، ءبىر اۋلەتتەن تاراعان بۇكىل جۇمىر باستىنىڭ ءتۇپ تامىرى، – دەگەن ءتامسىلدى ايتتىق. – ونى سىيلاۋ – وسى اۋلەتتىڭ اتا قازىعى – ۇلكەن بابالارىمىزدى سىيلاۋ. وسىنى ۋاقىتشا وتىرعان كرەسلوسىن بۇلداپ، «مەن وزگەدەن ءبىر قادام توردە وتىرۋىم ءتيىس» دەپ ويلايتىن كەيىنگى كەلىندەر ەستەن شىعارماسا ەكەن دەيسىڭ.
بىلمەيمىن، قىزمەتكەر-كەلىندەر ۇيالدى ما، الدە رەنجىدى مە، ايتەۋىر، ءبىر پيالا شايلارىن ۇرتتاپ، «جۇمىسقا اسىعىس ەدىك» دەپ، تىزىلە شىعىپ كەتتى. ىرگەدە وتىرعان اجەم دە "ءاي، وتىرمادىڭدار ما؟" دەپ توقتاۋ سالمادى...

بەكجىگىت سەردالى