ناماز وقىمايتىن، ىشىمدىك ىشەتىن ءارى باسقا دا كۇنالار جاسايتىن ادامنىڭ ورازاسى قابىل بولمايدى دەپ كەيبىر «بىلگىشتەر» ايتىپ جاتقاندا، «راسىمەن سولاي ما؟» دەگەن ساۋال بىردەن ويمىزعا ورالا كەتەدى. نەگىزىندە، بۇل دۇرىس ەمەس. مۇنداي پىكىرلەر اسىل دىنىمىزگە قاراما-قايشى كەلەدى.
ەگەر ادام ناقتى ءبىر كۇنالاردى جاساپ جۇرسە، وزگە دە كۇنالاردى جاساۋى كەرەك دەۋ بولمايتىن نارسە. كىمدە-كىم ورازا ۇستاي ءجۇرىپ، كەيبىر كۇنالاردى جاساپ جۇرەتىن بولسا، ورازا ءۇشىن بەرىلەتىن ۇلكەن سىيدى الماۋى مۇمكىن، ءبىراق اقيرەتتە «نەلىكتەن ورازا ۇستامادىڭ؟» دەگەن سۇراققا الىنبايدى، ويتكەنى ول ورازا ۇستاۋ پارىزىن وتەدى عوي، ەندى سول ۇستاعان ورازاسىنىڭ ارقاسىندا جاساپ جۇرگەن كۇنالارىنان باس تارتۋعا مۇمكىندىك الارى عاجاپ ەمەس. يمام رابباني بىلاي جازعان ەكەن: «تاۋبەگە كەلۋ مەن بارلىق كۇنالاردان باس تارتۋ ۇلى نىعمەت بولىپ تابىلادى. ەگەر ادام بارلىق كۇناسىنەن باس تارتا الماسا دا، كەيبىر كۇنالارى ءۇشىن تاۋبەسىنە كەلەر بولسا ول دا نىعمەت بولىپ سانالادى. مۇمكىن ول تاۋبەگە كەلۋ بەرەكەسىنىڭ ارقاسىندا باسقا دا كۇنالارىنان باس تارتۋ مۇمكىندىگىنە قول جەتكىزەتىن بولادى. ەگەر الدەبىر نارسەگە تولىقتاي قول جەتكىزە المايتىن بولعاندا، تىم بولماسا ونىڭ ءبىر جارتىسىنا قول جەتكىزۋدەن باس تارتۋدىڭ قاجەتى جوق».
ءبىزدىڭ اسىل دىنىمىزدە ورازاعا قاراعاندا ناماز اسا ماڭىزدى ورىن الاتىنىنا قاراماستان، ناماز وقىمايتىندارعا: «ورازا ۇستاماڭدار»، - دەپ ايتۋعا بولمايدى، سەبەبى ناماز وقىماي ۇلكەن كۇنا جاساپ جۇرگەندەر ەندى ورازا ۇستاماي دا كۇناعا باتىپ كەتۋى مۇمكىن عوي...
ەگەر الدەبىر ادام كەيبىر كۇنالاردى جاساپ جۇرگەنىمەن دە جىل سايىن ورازاسىن ۇستاپ، زەكەتىن تولەپ جۇرگەن بولسا، وندا وعان: «بۇل امالدارىڭدى تاستاما»، - دەپ ايتۋ كەرەك. ويتكەنى ادام اتالمىش قۇلشىلىقتاردى دا جاسامايتىن بولسا، وندا ول دىنىمىزدەن مۇلدە الىستاپ كەتەتىن بولادى. بەلگىلى ءبىر سەبەپتەرمەن ناماز وقي الماي جۇرگەن ادامداردى ودان ارى ۇرەيلەندىرمەي، كەرىسىنشە، مۇنداي امالداردى جاساۋ ارقىلى قانداي سىيعا قول جەتكىزەتىنىن ايتىپ قۋاندىرىپ وتىرۋ كەرەك. حاديستەردىڭ بىرىندە بىلاي ايتىلعان: «كىمدە-كىم وزگەلەردى اللانىڭ راقىمىنان ءۇمىتىن ءۇزدىرىپ، دىنگە دەگەن جيىركەنىشىن تۋدىراتىن بولسا، سوعان لاعىنەت بولسىن. جەڭىلدەتىڭدەر دە قيىنداتپاڭدار».
كىمدە-كىم جان-تانىمەن بەرىلىپ ءشاھادات ايتار بولسا، سول مۇسىلمان بولىپ تابىلادى. الدەبىر كۇنا جاساپ قويعانى ءۇشىن ول دىننەن شىعىپ كەتپەيدى. مىنە، ءاھلۇ سۇننەت ءۋال-جاماعات اقيداسى وسىنداي. الايدا بۇل كۇنالارعا نەمقۇرايلى قاراۋ كەرەك دەگەندى بىلدىرمەيدى، ويتكەنى كەز-كەلگەن كۇنا ادام جۇرەگىنە قارا داق قالدىرىپ وتىرادى ءارى توزاق وتىندا ماڭگىگە قالۋدىڭ سەبەبىنە اينالىپ كەتۋى مۇمكىن. جوعارىدا ايتقانداردى ەسكەرە وتىرىپ، كەز-كەلگەن كۇنادان بويىمىزدى اۋلاق سالۋعا تىرىسۋىمىز كەرەك، ويتكەنى اللا تاعالانىڭ اشۋى كۇنالارعا جاسىرىلعان دەپ ايتقىمىز كەلەدى.
ليزا دارحانبەكوۆانىڭ Facebook يماناشار پاراقشاسىندا جاريالانعان جازباسىنان الىندى
ۇسىنعان: نازەركە لابيحان
