بۇل تاقىرىپتىڭ باس كەيىپكەرى – بريتانيالىق مايور ۋولتەر ساممەرفورد. ونىڭ باسىنان وتە سيرەك كەزدەسەتىن جاعدايلار وتكەن. ول فلاندرياداعى اسكەري تولقۋلار ۋاقىتىندا ات ۇستىندە جۇرگەن كەزىندە العاش رەت نايزاعاي سوققىسىن الادى.

اسكەري قىزمەتكەرگە بۇل سوققى وڭاي بولمادى. دەنەسى بەلدەن تومەن جۇمىس جاساماي قالعان ساممەرفورد اسكەري قىزمەتىن اياقتادى دا، كانادا-ۆانكۋۆەرگە كەتىپ قالدى.

ارادا 6 جىل وتكەندە...

1924 جىلى وتستاۆكاداعى مايور جاعادا بالىق اۋلاپ وتىرعان ساتىندە تاعى دا كەلەڭسىزدىك ورىن الادى. مايوردىڭ جانىنداعى اعاشقا نايزاعاي ءتۇسىپ، ساممەرفورد زارداپ شەگەدى.

مايور ەكىنشى نايزاعاي سوققىسىنان دەنەسىنىڭ وڭ جاق بولىگى جانسىزدانىپ، ارەڭ قالىپقا كەلەدى. اراعا ەكى جىل سالىپ، ۋولتەر اياققا تۇرۋعا تالپىنا باستادى. كۇندەلىكتى جاتتىعۋ ارقىلى مايور ءۇي مەن ساياباق اراسىنداعى جولدى ءجۇرىپ وتۋگە داعدىلاندى. ەكى رەت دارىماعانىنا نامىستانعان نايزاعاي ونى جايىنا قالدىرمادى.

ارادا تاعى دا التى جىل وتكەندە، 1930 جىلى جاسىن وتى وعان قايتا اينالىپ سوقتى. ءۇشىنشى رەت سوققى العان مايوردىڭ دەنەسى تۇگەلدەي ىستەن شىعىپ، ءبىرشاما ۋاقىت وتكەننەن كەيىن دۇنيەدەن وزدى.

نايزاعاي ونى تاعى ىزدەدى...

ساممەرفوردتىڭ ەرەكشە تاريحىنا ءولىمى نۇكتە قويمادى. ونىڭ جەرلەۋ راسىمىنەن ءتورت جىل وتكەننەن كەيىن مايوردىڭ كوكتاسىنا نايزاعاي قايتا اينالىپ سوقتى. مايور تاريحى سول ۋاقىتتا ۇلكەن تانىمالدىلىققا يە بولدى. ەندى شە، نايزاعاي ءبىر ادامدى تىرىسىندە ءۇش رەت، ولگەننەن كەيىن تاعى ءبىر رەت ىزدەپ كەلسە؟!

تاعى ءبىر ۇقساس جاعداي!

بۇل تيپتەس جاعداي تاريحتا جالعىز ەمەس. 1899 جىلى يتاليالىق ازامات نايزاعاي سوققىسىنان قايتىس بولادى. ارادا 30 جىل وتكەندە ونىڭ بالاسى ءدال سول جەردە جاي ءتۇسىپ، جەر جاستانادى. ال 1949 جىلى ونىڭ نەمەرەسى دە جاسىن وتىنىڭ اسەرىنەن و دۇنيەگە اتتانعان.

تاڭ قالماسىڭا شارا جوق...