اكاگاۆا دزيروۋ 1948 جىلى جاپونيانىڭ فۋكۋوكا پرەفەكتۋراسىندا دۇنيەگە كەلگەن. دوحو جوعارى مەكتەبىن بىتىرگەن سوڭ كومپانيا قىزمەتكەرى بوپ جۇمىس ىستەيدى. ون بەس جاسىنان اڭگىمە، ماقالا جازۋمەن اۋەستەنگەن اكاگاۆا وزگە ماماندىقتىڭ يەسى بولا تۇرا قالامىن قولىنان ءبىر ساتكە تاستامايدى. 1976 جىلى پروزالىق تۋىندىلارى ءۇشىن «وۋرۋ يوميمونو كايكي شوۋسەتسۋ شيندزين» دەپ اتالاتىن ادەبي سىيلىقتى يەلەنەدى. 1978 جىلى كومپانيا جۇمىسىن ءبىرجولاتا تاستاپ، بار ءومىرىن شىعارماشىلىعىنا ارنايدى. 1980 جىلى «جامان ايەلگە ارنالعان رەكۆيەم» تۋىندىسى ءۇشىن وعان كادوكاۆا ادەبي سىيلىعى تاپسىرىلادى. ال 1985 جىلى «ورىنباسارسىز وتكەن دۇيسەنبى» دەگەن كىتابى ناوكي سىيلىعىن العان.

ەڭ العاشقى «Ghost train» دەگەن اڭگىمەسىنەن باستاپ، اكاگاۆانىڭ كوپتەگەن تۋىندىلارى وقىرماننىڭ سۇرانىسىنا يە بولىپ، سىنشىلار تاراپىنان زور باعالانعان. «Ghost train» 1976 جىلى جارىققا شىققان سوڭ «بۋنگەي شۋندجۋ» ادەبيەت كومپانياسى تاعايىنداعان «جىلدىڭ ەڭ ۇزدىك ادەبي تۋىندىسى» گرانتىنا يە بولعان.

اكاگاۆانىڭ «جاتىن بولمە جانىنداعى وقيعا»، «اسپاننان جەتكەن داۋىس» دەگەن پوۆەستەرىنىڭ نەگىزىندە انيمە مەن مانگا (بالالارعا ارنالعان سۋرەتتى كىتاپ) قۇراستىرىلىپ، مۋلتيپليكاسيالىق فيلم تۇسىرىلگەن. «فۋكۋتۋ كيكاندزۋ ماتروسى» دەگەن الەۋمەتتىك-رەاليستىك تۋىندىسى كوركەم فيلمگە نەگىز بولدى.

اكاگاۆا دزيروۋدىڭ شىعارمالارىندا رەاليستىك پافوس پەن ميستيكالىق استارلاۋ باسىم. سويلەمدەرى قىسقا دا، نۇسقا. كوركەمدىك بەينەلەۋ، مەتافورا، سيمۆول ءتارىزدى ادىستەردەن قاشۋ بايقالادى. اكاگاۆا قالامىنا ءتان باستى ۇعىم — ناقتىلىق.  پوستمودەرنيست بولعاندىقتان جازۋشى تۋىندىلارىنان ينۆەرسيا، فيلوسوفيالىق تولعانىس، پسيحولوگيالىق شەگىنىس، وي اعىسى دەگەن كەزدەسپەيدى.

اكاگاۆا دزيرونىڭ مودەرنيستىك شىعارمالارىنىڭ ءبىرى «ۇرەي» رومانى. ءارقايسىسى بولەك-بولەك اڭگىمەگە ۇقسايتىن رومان تاراۋلارىنداعى وقيعالار اعىمى بىر-بىرىمەن ىشتەي جالعاسىپ جاتىر. تۋىندىنىڭ تاقىرىبى ايتىپ تۇرعانداي، شىعارما دەتەكتيۆ جانرىندا جازىلعان. جازۋشى رومانىنا كەيىپكەر پورترەتى، پەيزاج، مىنەز سۋرەتتەرى مۇلدەم ءتان ەمەس. تۋىندى تۇتاس ارەكەتكە نەگىزدەلگەن. جاڭاشىل جاپون جازۋشىلارى قىسقا جازۋعا تىرىسادى.

قازىرگى جاپوننىڭ جاس جازۋشىسىنىڭ وقىرمانعا بەرەتىنى: ديالوگ پەن ارەكەت. اكاگاۆا رومانىندا وقيعالاردىڭ توعىسۋى، شيەلەنىستەر ءجيى كەزدەسەدى. دەتەكتيۆتىڭ تىرەگى — قىلمىس جانە وعان قاتىستى كىسىلەردىڭ ارەكەتىن بايانداۋ بولعاندىقتان، اكاگاۆا «ۇرەي» رومانىندا كاپيتاليزمنىڭ  بەت پەردەسىن قاراپايىم تۇردە اشۋعا تىرىسقان. جازۋشى كاپيتاليستىك قوعامنىڭ بار بولمىسىن ەلەس ارقىلى كورسەتەدى. «جان تىنىشتىعى جوق، ەلەس كەزىپ، ۇرەي بيلەگەن زامان» دەگەن ويدى ايتادى.

شارافات جىلقىبايەۆا، جاپونتانۋشى