الماتىدا ءۇش ازاماتتىڭ – جازيرا دەمەۋوۆا، گۇلزيپا جاۋكەروۆا جانە وكسانا شيەۆچۋكتىڭ ۇستىنەن ەلدە تىيىم سالىنعان "قازاقستاننىڭ دەموكراتيالىق تاڭداۋى" قوزعالىسىنىڭ قىزمەتىنە قاتىستى دەگەن ايىپپەن ءىس قوزعالدى دەپ حابارلايدى Qamshy.kz اقپارات اگەنتتىگى ازاتتىق  سايتىنا سىلتەمە جاساپ.

بۇل تۋرالى دەمەۋوۆانىڭ ادۆوكاتى گۇلنارا جۋاسپايەۆا حابارلاعان. ءۇش ازاماتقا 405-باپتىڭ 2-تارماعى (ەكسترەميزم مەن تەرروريزمگە بايلانىستى ەلدە سوت شەشىمىمەن تىيىم سالىنعان ۇيىمنىڭ جۇمىسىنا قاتىسۋ – رەد.) بويىنشا كۇدىكتى ستاتۋسى بەرىلگەن.

دەمەۋوۆا، شيەۆچۋك جانە جاۋكەروۆا 1 مامىردا الماتىدا وتكەن نارازىلىق كەزىندە ۇستالعان. پوليسيا ولاردىڭ كەيبىرىن 9 مامىردا دا قاماۋعا العان.

جۋاسپايەۆانىڭ سوزىنشە، 1 مامىرداعى نارازىلىقتان سوڭ "بەيبىت جيىن وتكىزۋ ەرەجەسىن بۇزدى" دەپ تانىلىپ، 50 500 تەڭگە ايىپپۇلعا كەسىلگەن ەكى ازاماتتىڭ – دەمەۋوۆا مەن جاۋكەروۆانىڭ ۇستىنەن تاپ سول فاكت بويىنشا قىلمىستىق ءىس قوزعالعان. جۋاسپايەۆا "بۇل زاڭعا قايشى" دەيدى. جازيرا دەمەۋوۆا 9 مامىر كۇنگى پارادقا قاتىسۋعا بارعانىن، ءبىراق پوليسەيلەر الاڭدا جۇرگەن 26 جاستاعى قىزىن ۇستاپ اكەتكەن سوڭ ءوزى دە الماتى قالالىق پوليسيا دەپارتامەنتىنە بارۋعا ءماجبۇر بولعانىن ايتادى.

«ەشتەڭە ىستەمەسەم دە، قىزىمدى اكەتۋ ءۇشىن پوليسيا دەپارتامەنتىنە باردىم. سونداعىلار جەكە كۋالىگىمدى كورە سالا، قولىما كىسەن سالىپ، ۇستىمنەن ەكسترەميزم بابى بويىنشا ءىس قوزعالعانىن ايتتى. ارتىنشا ۇيىمە اپارىپ، ءتىنتۋ جۇرگىزدى. بۇكىل گادجەتتى، كومپيۋتەردى، فلەشكامدى الىپ قويدى. مۇنان سوڭ قايتا دەپارتامەنكە كەلىپ، مەنى 48 ساعات جەرتولەدە تەرگەدى»، - دەدى دەمەۋوۆا.

ءۇشىنشى كۇدىكتى وكسانا شيەۆچۋكتى الماتى قالالىق پوليسيا دەپارتامەنتىنىڭ تەرگەۋشىسى تولعاناي ەرجانوۆا تەرگەگەن.

ىشكى ىستەر مينيسترلىگى 1 مامىردا نۇر-سۇلتان مەن الماتىدا شامامەن 80 ادامنىڭ ۇستالعانىن حابارلادى. الايدا ناقتى قانشا ادامنىڭ اكىمشىلىك جاۋاپقا تارتىلعانى تۋرالى دەرەك جوق.

ۇسىنعان: مارجان سابەت