"نايك" – امەريكالىق سپورتتىق كيىمدەر كومپانياسى. ونىڭ نەگىزىن ورەگون ۋنيۆەرسيتەتىندەگى جەڭىل اتلەتيكا جاتتىقتىرۋشىسى بيلل بوۋەرمان مەن ونىڭ بۇرىنعى ستۋدەنتى فيل نايت  "Ribbon Sports" دەگەن اتپەن قالاعان بولاتىن. Nike برەندىنىڭ  شىعۋ تاريحى ستۋدەنت فيل نايت سپورتتىق اياق كيىمىنىڭ ىڭعايسىزدىعىن بايقاعان 1964 جىلدان باستالادى دەپ جازادى Qamshy.kz اقپارات اگەنتتىگى.

فيل نايت سپورتشى بولعاندىقتان جاتتىعۋعا ىڭعايلى اياق كيىم كەرەك ەدى. ءبىراق  60-جىلدارى بارلىق چەمپيوندار كيەتىن Adidas برەندتىك كروسسوۆكاسى دا، ارزان 5 دوللارلىق كروسسوۆكانىڭ دا ساپاسى تومەن بولعان. فيل نايت ورەگون ۋنيۆەرسيتەتىنىڭ ەكونوميكا بولىمىندە وقىپ جۇرگەندە ماركەتينگتىك سەمينارلاردىڭ بىرىندە ونىڭ ويىنا ءوزىنىڭ تاۋارلىق برەندىن قۇرۋ يدەياسى كەلەدى. ءار ستۋدەنت وزىندىك جوباسىمەن اينالىسقاندا ءۇي تاپسىرماسى رەتىندە ءوز برەندىن دامىتۋ ستراتەگياسىن جانە ماركەتينگ جوسپارىن جاساۋ تاپسىرىلعان. وسىلايشا، جاھاندىق برەندتى قۇرۋداعى العاشقى قادامدار جاسالدى.

فيل ءوزىنىڭ جوسپارىنا اياعىنا دەيىن سەندى. سوندىقتان، قولجەتىمدى جانە جوعارى ساپالى اياق كيىمدى شىعارۋ ءۇشىن ستۋدەنت جاپونياعا بارىپ، شەتەلدىك جەرگىلىكتى كومپانيامەن كەلىسىمشارت جاساسادى. سولاي ءوز كروسسوۆكالارىن شىعارا باستايدى. باستاپقىدا ءفيلدىڭ "Ribbon Sports" (كومپانيا العاش وسىلاي اتالعان) كومپانياسىندا ءتىپتى جەكە دۇكەن دە جوق بولعان. ول بۇكىل ەلدى جۇك ماشيناسىمەن ارالاپ، كوشەدە اياق كيىم ساتقان.

ءبىر كۇنى ول دجەفف دجونسون ەسىمدى سپورتشىنى كەزدەستىرەدى. سودان بەرى بارلىعى وزگەرەدى. تاجىريبەلى سپورتشى برەندتى العا جىلجىتۋدى بىلەتىن ۇزدىك ماركەتولوگ بولىپ شىعادى. وسىلاي فيل مەن دجونسوننىڭ كروسسوۆكالارى ساتىلا باستادى.

1965 جىلى ولار كومپانيا ءۇشىن جاڭا اتاۋ "Nike"-تى ويلاپ تاپتى. سەبەبى دجونسون تۇسىندە نيك اتتى قاناتتى جەڭىس قۇدايىن كورەدى.

1971 جىلى الەمگە تانىمال "نايك" لوگوتيپى پايدا بولدى. ونى پورتلەند ۋنيۆەرسيتەتىنىڭ ستۋدەنتى كەرولين ديەۆيدسون بار بولعانى 30 دوللارعا ويلاپ تاپقان.  كەيىنىرەك فيل نايت ونى گاۋھار تاستارمەن كومكەرىلگەن مۇسىنشەمەن ماراپاتتاپ، ءتىپتى كومپانيا اكسياسىنىڭ ءبىر بولىگىن بەرەدى.

اتاقتى لوگوتيپ اعىلشىنشا «Swoosh» دەپ اتالادى جانە ماعىناسى جەڭىس اكەلەتىن نيك قۇدايىنىڭ قاناتىن بىلدىرەدى.

شىنىندا دا، Nike كوپتەگەن باسەكەلەستەرىن ارتتا قالدىردى، ءبىراق ونىڭ باستى جەتىستىگى –  بۇكىل الەمدەگى كوپتەگەن ادامداردىڭ سەنىمى مەن العىسى.

1990 جىلى كومپانيا ءوزىنىڭ شەتەلدىك كاسىپورىندارىنداعى ەڭبەك شارتتارىنىڭ اشكەرەلەنۋىنەن زيان شەكتى، ءبىراق سپورتتىق اياق-كيىمدەر مەن جوعارى كلاستى كيىمدەر وندىرەتىن كاسىپورىن رەتىندە ساقتالدى. قازىرگى كەزدە "Nike" كومپانياسى ءارتۇرلى سپورت تاۋارلارىن جاساۋدا كوشباسشى بولىپ كەلەدى.