وبىر دەرتىنە شالدىققان قازاقستاندىق قىز ءۇندىستاننان ەلگە قايتا الماي وتىر. بۇل - بىرنەشە كۇن بۇرىن شەتەلگە ەم ىزدەپ اتتانعان قازاق قىزىنىڭ سوڭعى ارمانى دەپ جازادى Qamshy.kz اقپارات اگەنتتىگى Tengrinews.kz پورتالىنا سىلتەمە جاساپ. 

الماتىلىق ديانا ىستىبايەۆا ءقازىر - 23 جاستا. وسىدان التى جىل بۇرىن ونىڭ شىنتاق تۇستاعى بۋىنىنان وبىر بەلگىلەرى انىقتالعان ەدى. ءبىر جىل بۇرىن اسقىنعان دەرتكە قارسى تۇرا الماعان دارىگەرلەر ونىڭ قولىن يىعىنا دەيىن كەسۋگە ءماجبۇر بولعان.

الماتىلىق قىز بىرنەشە كۇن بۇرىن اناسىمەن، اعاسىمەن بىرگە دەلي قالاسىنا ەمدەلۋ ماقساتىندا بارعان-دى. ءبىراق شەتەلدىك دارىگەرلەر دە 4-دارەجەگە دەيىن اسقىنعان دەرتتىڭ داۋاسىن تاپپادى.

"اۋىر ەكەنى بەلگىلى. ءبىراق ونىڭ ەڭ سوڭعى جان قالاۋى – قازاقستانعا ورالۋ. ديانا وتە ادەمى، ومىرگە قۇشتار قىز. "نە ءۇشىن؟" دەگەن سۇراق باسىمىزدان كەتەر ەمەس. ول وقىدى، ومىرلىك جوسپار قۇرىپ، الدىنا ۇلكەن ماقساتتار قويدى.

ديانا اۋىرعان ۋاقىتتارىندا دا قۇلاپ كەتپەدى. ايەلدەر كيىمىن ساتاتىن دۇكەن اشىپ، ءوز شارۋاسىن جۇرگىزە بەردى. ال ءقازىر مينۋتتار سانالۋدا. ءبىزدىڭ قىزىمىز اۋىر حالدە جاتىر. مەديسينا قىزمەتكەرلەرى ەشقانداي كومەك كورسەتە المايتىنىن جەتكىزدى. ول جولاۋشىلار تاسىمالدايتىن ۇشاقپەن ۇشۋعا جارامايدى.

20-مامىر كۇنى ءبىز دەليدەگى ق ر ەلشىلىگىنە حات جازىپ، قىزىمىزدىڭ سوڭعى ءوتىنىشىن ورىنداۋدى سۇرادىق. بۇگىن 23-مامىر. ءبىزدىڭ قىزىمىز ءالى - دەليدە. ول تۋىستارىنىڭ جانىنا ورالعىسى كەلەدى. ديانانىڭ وتباسى التى جىل بويى ونىڭ ەمىن قىڭق دەمەي كوتەردى. 11 ميلليون تەڭگە تۇراتىن جەكە ۇشاق جالداۋدى قالتامىز كوتەرمەي وتىر. ءوتىنىپ كومەك سۇرايمىز. ءبىزدىڭ ءوتىنىشىمىز اياقاستى بولماسا ەكەن. ديانا وتانىنا ورالعىسى كەلەدى"، - دەپ جازدى قىزدىڭ اپكەسى اناستاسيا ەۆدوكيموۆا.

ءبىرشاما ۋاقىتتان كەيىن اناستاسيا ەۆدوكيموۆا ونىڭ سۇرانىسىن تەك 28-مامىر كۇنى قاناعاتتاندىرا الاتىنى تۋرالى جاۋاپ العانىن جاريالادى. ال ديانانىڭ تۋعان-تۋىستارى كەشىگىپ قالۋدان قورقىپ وتىر.

ق ر ءسىم حابارلاۋىنشا، قۇزىرلى مەكەمە جاعدايدان حاباردار جانە قولدان كەلەتىن كومەكتىڭ بارلىعىن جاساۋدى قاراستىرىپ جاتىر.

"ءبىز دەليدەگى ەلشىلىكتەن بۇل جايت تۋرالى اقپاراتتى 20-مامىر كۇنى الدىق. سول مەزەتتە بۇل ماسەلە دەنساۋلىق ساقتاۋ مينيسترلىگىنە جىبەرىلدى. ءقازىر سول جاقتاعى ارىپتەستەرىمىز ارنايى رەيس جىبەرۋدى جەدەلدەتۋ ءۇشىن وتانداسىمىزدىڭ تىلەگىن ورىنداۋ ءۇشىن بارلىق قىزمەتتى جاساپ جاتىر.

ايتا كەتەتىن ءبىر ماسەلە بار. ءبىزدىڭ ۇشاقتارىمىزدىڭ بارلىعى ءۇندىستانعا پاكىستان ارقىلى ۇشادى. ال پاكىستاننىڭ اۋە شەكاراسى جابىق. ارنايى ۇشاق ول جاققا دەيىن قانداي باعىتپەن ۇشىپ باراتىنى انىقتالۋ ۇستىندە. وتانداسىمىزدىڭ تىلەگىن ورىنداۋ ءۇشىن بار مۇمكىندىگىمىزدى قولدانامىز"، - دەدى ءسىم وكىلى ايبەك سمادياروۆ.

اۋدارعان: ادىلەت مادەنيەت