قازاقستان پرەزيدەنتى قاسىم-جومارت توقايەۆ اباي قۇنانباي ۇلىنىڭ 175 جىلدىق مەرەيتويىن جوعارى دەڭگەيدە مەرەكەلەۋ تۋرالى جارلىققا قول قويدى دەپ حابارلايدى Qamshy.kz اقپارات اگەنتتىگى اقوردا سايتىندا سىلتەمە جاساپ.
قازاق حالقىنىڭ ۇلى اقىنى، اعارتۋشىسى اباي قۇنانباي ۇلىنىڭ 175 جىلدىعى 2020 جىلى وتەدى.
وسىعان بايلانىستى مەملەكەت باسشىسى ۇكىمەتكە ءبىرقاتار تاپسىرما بەردى.
اتاپ ايتقاندا، بيىل 1 شىلدەگە دەيىن اباي قۇنانباي ۇلىنىڭ 175 جىلدىعىن دايىنداۋ جانە وتكىزۋ جونىندەگى مەملەكەتتىك كوميسسيا قۇرىلۋى ءتيىس. ال 1 قازانعا دەيىن مەرەيتويدىڭ جالپىرەسپۋبليكالىق جوسپارىن بەكىتۋ كەرەك.
ابايدىڭ "جيدەباي-بورىلى" مەملەكەتتىك تاريحي-مادەني جانە ادەبي-مەموريالدىق قورىق مۋزەيىن كەشەندى جاڭعىرتۋ ءۇشىن ءتيىستى شارالار قابىلداۋدى تاپسىردى.
2020 جىلى نۇر-سۇلتان قالاسىندا اباي قۇنانباي ۇلىنىڭ 175 جىلدىق مەرەيتويىنا ارنالعان حالىقارالىق عىلىمي-پراكتيكالىق كونفەرەنسيا وتەدى.
توقايەۆ ابايدىڭ شىعارمالارىنىڭ كەڭ تارالعان نەگىزگى شەت تىلدەرىندەگى ساپالى اۋدارماسىن باسپادان شىعارىپ، حالىقارالىق دەڭگەيدە ناسيحاتتاۋعا تاپسىرما بەردى.
سونىمەن قاتار، ابايدىڭ 175 جىلدىعىن يۋنەسكو مەن تۇركسوي (حالىقارالىق تۇركى مادەنيەتى ۇيىمى) اياسىندا تويلاۋ ماسەلەسى پىسىقتالۋى ءتيىس.
جارلىقتىڭ ورىندالۋىن باقىلاۋ قازاقستان پرەزيدەنتىنىڭ اكىمشىلىگىنە جۇكتەلدى. قۇجات قول قويىلعان كۇنىنەن باستاپ قولدانىسقا ەنەدى.
ۇسىنعان: ماقپال سەمباي
