كحدر-نىڭ اقش ىستەرى جونىندەگى مەملەكەتتىك كەڭەسىنىڭ ارنايى وكىلى كيم حوك چحول حانويداعى سامميتكە قاتىسقان سولتۇستىك كورەيا سىرتقى ىستەر مينيسترلىگىنىڭ ءتورت قىزمەتكەرىمەن بىرگە جازالاندى دەپ حابارلايدى Qamshy.kz اقپارات اگەنتتىگى. بۇل تۋرالى وڭتۇستىك كورەيانىڭ Chosun Ilbo باسىلىمى جازدى.
باسىلىمنىڭ مالىمەتىنە سايكەس، سولتۇستىك كورەيا كوشباسشىسى كيم چەن ىن ديپلوماتتاردى اقش پەن كحدر باسشىلارى اراسىنداعى ەكىنشى سامميتتە پرەزيدەنت دونالد ترامپپەن وڭ ناتيجەلى كەلىسىمگە كەلە الماعانى ءۇشىن جازالاعان.
دەرەككوزدەردىڭ حابارلاۋىنشا، بەس لاۋازىمدى تۇلعا پحەنيانداعى ميريم اۋەجايىنىڭ اۋماعىندا "اقش تىڭشىسى" دەگەن ايىپپەن اتىلدى. سونداي-اق سولتۇستىك كورەيالىق ليدەردىڭ ءبىرىنشى ورىنباسارى كيم ەن چول تۇرمە جۇمىستارىنا جەگىلگەنى تۋرالى دا ايتىلعان.
باسىلىم حانويدا كيم چەن ىننىڭ قاسىندا بىرگە بولعان قارىنداسى كيم ءو چجوننىڭ سامميتتەن كەيىن ۇشتى-كۇيلى جوق بولىپ كەتكەنىن دە جازدى.
ەستەرىڭىزگە سالا كەتسەك، 2019 جىلدىڭ اقپانىندا اقش پەن كحدر-دىڭ ەكى ەل باسشىلارىنىڭ قاتىسۋىمەن ەكىنشى سامميت وتكەن. اتالمىش سامميت بارىسىندا ەكى جاقتى كەلىسىمگە قول قويىلمادى. اقش پرەزيدەنتى ترامپ پەن سولتۇستىك كورەيا كوشباسشىسى كيم چەن ىننىڭ بىرلەسكەن باسپا ءسوز ءماسليحاتى دا بولماي، كەزدەسۋ مەرزىمىنەن بۇرىن ناتيجەسىز اياقتالعانى بەلگىلى.
اۋدارعان: داۋرەن سىبانباي
وقي وتىرىڭىز:
♦ كيم چەن ىن تۋرالى 10 قىزىقتى دەرەك : ول دارەتحاناعا بارمايدى
